JOEL 1 - KA BAIBL

Ka jingpynjot ïa ka ri da u puit khlam

¹ Ka ktien U Trai kaba la wan ha u Joel u khun u Pethuel.

² “To sngap ïa kane, phi ki tymmen, bad to shahshkor, phi kiba shong ha ka ri. Kum kane ka la jia ha ki sngi jong phi, lane ha ki sngi ki kpa jong phi?

³ To ïathuh ïa kane ha ki khun jong phi, bad to ki khun jong phi kin ïathuh ha ki khun jong ki, bad kita ki khun jong ki ha kawei pat ka pateng bynriew.

⁴ “Kata kaba la pynsah u 'ñiang bam jhur, u la bam u puit kluiñ; bad kaba u la pynsah u puit kluiñ, u la bam u 'ñiangdkoh; bad kaba u la pynsah u 'ñiangdkoh, u la bam u puit khlam.

⁵ “To khie thiah, phi kiba buaid, bad to ïam; to lynñiar, phi ki nongdih Waiñ, namar ka Waiñ thiang; naba la pynduh noh ïa ka na ka shyntur jong phi.

⁶ Naba ka jaid bynriew ka la wan kiew halor ka ri jong nga, kaba khlaiñ, bad ka bym lah ñiew shuh; ki bniat jong u ki long ki bniat sing, bad u don ki 'niat tyngam u sing bah.

⁷ U la pynsniew ïa u dieng Waiñ jong nga, bad u la khoh ïa u dieng Dumbur jong nga: u la pynlyngkhuit plain ïa u, bad u la bred noh ïa u; ki tnat jong u ki la lieh.

⁸ “To ïambriew kum ka theisotti ba la panpoh da ka jaiñ byrni namar u tnga khynnah jong ka.

⁹ Ka jingainguh bam bad ka jingainguh dih ka la duh noh na ka ïing U Trai; ki lyngdoh, ki shakri U Trai keiñ, ki ïam sngewsih.

¹⁰ La pynsniew ïa ka lyngkha, ka ri ka ïam sngewsih; naba la pynsniew ïa u Kew, ka Waiñ thymmai ka la rngad noh, ka umphniang ka la sdot noh.

¹¹ “To sngewlehrain, phi ki nongrep, to lynñiar, phi ki nongsumar dieng Waiñ, namar u Kew bad namar u Kew Barli; naba ka jingot jong ka lyngkha ka la duh noh.

¹² U dieng Waiñ u la ïapstai noh, bad u dieng Dumbur u la sdot noh; u dieng soh Pong, u dieng Tlai ruh, bad u dieng Sohphoh, ki dieng jong ka bri baroh ki la ïapstai: naba ka jingkmen ka ïapstai noh na ki khun u bynriew.

¹³ “To panpoh ïa lade da ki jaiñ byrni, bad to ïam sngewsih, phi ki lyngdoh; to lynñiar, phi ki shakri ka duwan; ale, to thiah baroh shi miet ha ka jaiñ byrni, phi ki shakri U Blei jong nga; naba ïa ka jingainguh bam bad ka jingainguh dih la bat noh na ka ïing U Blei jong phi.

¹⁴ “To pynkyntang ïa ka jingshah jingit, to lum ïa ka jingïaseng bakyrpang, to lum ïa ki tymmen bad baroh kiba shong ha ka ri sha ka ïing U Trai uba U Blei jong phi, bad to ïam ha U Trai.”

¹⁵ Dur ka sngi! naba ka sngi U Trai ka la jan, bad kum ka jingpynjot na U Balah Baroh kan wan.

¹⁶ Hato ym shym la pynduh noh ha khmat jong ngi na ka ïing U Blei jong ngi ïa ka jingbam, ïa ka jingkmen, bad ïa ka jinglehkmen?

¹⁷ Ki symbai ki pyut hapoh ka khyndew, ki ïing buh Kew ki long ïingjah, ïa ki thiar la pynkyllon; naba u Kew u la ïapstai noh.

¹⁸ Katno ki ïa-ud ki mrad! ki kynhun masi ki ïalyngngoh, namar ba kim don phlang; ïa ki kynhun langbrot ruh la pynjot noh.

¹⁹ A Trai, ha me nga ïam: naba ka ding ka la bam duh ïa u phlang ha khlaw, bad ka thylliej ding ka la jliah ïa ki dieng baroh ha lum.

²⁰ Ki mrad ha lum ruh ki ïathynrang ha me: naba ka um ki wah duid ka la rngad, bad ka ding ka la bam duh ïa u phlang ha khlaw.