JINGPYNPAW 7 - KA BAIBL

U paid ki khun Israel

¹ Te hadien kane, nga la ïohi ïa ki saw ki angel kiba ïeng halor ki sawdong ka khyndew, ba ki ïabat ïa ki saw lyer ka khyndew, khnang ba ka lyer kan ym ïoh beh ha ka khyndew, lymne ha ka duriaw, lymne ha kano kano ka dieng.

² Bad nga la ïohi ïa uwei pat u angel ba u wan kiew na sha ba-mih ka sngi, u da bat ïa ka shab jong U Blei U Ba-im; bad u la pyrta da ka ktien bajam ha kita ki saw angel, ha kiba la ai bor ban pynsniew ïa ka khyndew bad ïa ka duriaw,

³ u da ong, “To wat pynsniew ïa ka khyndew, lymne ïa ka duriaw, lymne ïa ki dieng, ha ban da ngi la ïoh shon ïa ki shakri U Blei jong ngi halor ki shyllangmat jong ki.”

⁴ Bad nga la ïohsngew ïa ka jingkheiñ jong kita ïa kiba la shon, shispah sawphew saw hajar, ïa kiba la shon na ka jaid baroh ki khun Israel.

⁵ Na ka jaid Judah la shon khat-ar hajar; Na ka jaid Reuben khat-ar hajar; Na ka jaid Gad khat-ar hajar;

⁶ Na ka jaid Asher khat-ar hajar; Na ka jaid Naphtali khat-ar hajar; Na ka jaid Manasseh khat-ar hajar;

⁷ Na ka jaid Simeon khat-ar hajar; Na ka jaid Lebi khat-ar hajar; Na ka jaid Issakhar khat-ar hajar;

⁸ Na ka jaid Sabulon khat-ar hajar; Na ka jaid Joseph khat-ar hajar; Na ka jaid Benjamin la shon khat-ar hajar.

U paidbah byllien

⁹ Hadien kine kiei kiei ruh, nga la khmih, bad ha khmih, u paidbah byllien, ïa uba uno uno um lah ban ñiew, na ki kynja bynriew bad na ki jaid bad na ki paidlang bad na ki thylliej baroh, ba ki da ïeng ha khmat kata ka khet bad ha khmat uta U Khun langbrot, kiba la kup ki jaiñkup balieh, bad ki dieng Tlai ha ki kti jong ki;

¹⁰ bad ki da ïapyrta da ka ktien bajam, ki da ïa-ong, “Ka jingpynim ha U Blei jong ngi uba shong halor kata ka khet, bad ha uta U Khun langbrot!”

¹¹ Bad kita ki angel baroh ki la ïaïeng tawiar ïa kata ka khet bad ïa kita ki tymmen basan bad ïa kita ki saw ki jingthaw ba-im, bad ki la ïahap dem la ki khmat ha khmat kata ka khet, bad ki la ïamane dem ïa U Blei,

¹² ki da ïa-ong: “Amen! Ka jingkyrkhu bad ka burom bad ka jingstad bad ka jingainguh bad ka jingpyndonburom bad ka bor bad ka jinglah ha U Blei jong ngi sha ki bymjukut ki bymjukut: Amen.”

¹³ Te uwei na kita ki tymmen basan u la kylli, u da ong ha nga, “Kine kiba la kup kita ki jaiñkup balieh, hato ki long kiei bad nangno ki la wan?”

¹⁴ Te nga la ïathuh ha u, “Ko Kynrad, me tip ma me.” Te u la ong ha nga, “Kine ki long kita keiñ kiba wan na kata ka jingjynjar bakhraw, bad ki la sait ïa kita ki jaiñkup jong ki, bad ki la pynkhuid lieh ïa ki ha ka snam jong uta U Khun langbrot.

¹⁵ “Namar kata, ki long ha khmat kata ka khet U Blei, bad ki ïashakri ïa u mynsngi bad mynmiet ha ka jaka kyntang jong u; bad uta uba shong halor kata ka khet un shongkah halor jong ki.

¹⁶ Kin ym thngan shuh, lymne sliang shuh, lymne ka sngi kan ym ïoh shoh ha ki, lymne kano kano ka jingshit;

¹⁷ naba uta U Khun langbrot uba hapdeng kata ka khet un sharai ïa ki, bad un ïalam lynti ïa ki sha ki pukri um ka jingim; bad U Blei un ñiad noh ïa ka jingjaw ummat baroh na ki khmat jong ki.”