JINGPYNPAW 20 - KA BAIBL

Ki shi hajar snem

¹ Bad nga la ïohi ïa u angel ba u wan hiar na bneng, uba don uta u shabi kata ka 'liewlong bakhlem trai bad u kynjri bakhraw ha ka kti jong u.

² Bad u la kem ïa uta u ïakjakor, ïa uta u bseiñ batymmen, uba long u Ksuid bad u Soitan, bad u la khum ïa u, shi hajar snem;

³ bad u la bred ïa u sha kata ka 'liewlong bakhlem trai, bad u la set ïa ka, bad u la shon shab ïa ka halor jong u, khnang ba un ym ïoh shukor shuh ïa ki kynja bynriew tad ynda la pyndep ïa kata ka shi hajar snem; te hadien kata keiñ ka dei ban pyllait noh ïa u shi por.

⁴ Bad nga la ïohi ïa ki khet, bad don kiba la shong halor jong ki, bad la ai ka jingbishar ha ki; bad nga la ïohi ïa ki mynsiem jong kita ïa kiba la khrai khlieh na ka bynta kata ka jingphla ïa U Jisu, bad na ka bynta ka ktien U Blei, bad jar ki bym shym la ïamane dem ïa uta u mrad khlaw, lymne ïa ka dur jong u, bad kim shym la pdiang ïa kata ka dak halor ka shyllangmat jong ki bad halor ka kti jong ki; te ki la im, bad ki la synshar lem bad U Khrist, shi hajar snem.

⁵ Hynrei, kita kiba sah na kita ki baïap kim shym la im pat tad ynda la pyndep ïa kata ka shi hajar snem. Kane ka long ka jingmihpat ka banyngkong.

⁶ Uba suk bad u bakhuid long uta uba don ka bynta ha kata ka jingmihpat ka banyngkong: halor kine, kata ka jingïap ka ba-ar kam don bor shuh; hynrei, kin long ki lyngdoh jong U Blei bad jong U Khrist, bad kin ïasynshar lem bad u, shi hajar snem.

Ka jingshahjop u Soitan

⁷ Te ynda la pyndep ïa kata ka shi hajar snem, yn pyllait noh ïa uta u Soitan na ka byndi jong u,

⁸ bad un leit mih noh ban shukor ïa kita ki kynja bynriew kiba ha kita ki sawdong ka pyrthei, ïa u Gog bad ïa u Magog, ban pynïaseng lang ïa ki sha kata ka thma; ka jingkheiñ jong kita ka long kum u shyiap ka duriaw.

⁹ Bad ki la ïaleit kiew halor ka pyngkiang ka khyndew, bad ki la ïaker tawiar ïa ka jaka shong dara kita ki riewkhuid, bad ïa kata ka nongbah ïa kaba la ieit: te ka ding ka la wan hiar na U Blei na bneng, bad ka la bam duh ïa ki.

¹⁰ Te ïa uta u Soitan uba shukor ïa ki la bred keiñ sha kata ka pung ka ding bad u kyndok, ha kaba ki don ruh uta u mrad khlaw bad uta u nongïathuhlypa balamler; bad yn pynkordit ïa ki, mynsngi bad mynmiet, sha ki bymjukut ki bymjukut.

Ka jingbishar ka bakhatduh

¹¹ Bad nga la ïohi ïa ka khet balieh bakhraw, bad ïa uta uba shong halor jong ka, na khmat jong u, ba ka khyndew bad ka bneng ki la ïaphet noh; te ïa ka jaka ym shym la shem shuh ïa ki.

¹² Bad nga la ïohi ïa ki baïap, ki barit bad ki bakhraw, ba ki da ïeng ha khmat kata ka khet; bad la plied ïa ki kitab: bad la plied ïa kawei pat ka kitab, kaba long ka kitab ka jingim: te la bishar ïa kita ki baïap na kita kiei kiei ruh ïa kiba la thoh ha kita ki kitab, katba kum ki jingleh jong ki.

¹³ Te ka duriaw ka la aiti noh ïa ki baïap kiba la don ha ka; bad ka Jingïap bad ka Hades ki la aiti noh ïa kita ki baïap kiba la don ha ki; te la bishar ïa uwei pa uwei baroh katba kum ki jingleh jong ki.

¹⁴ Bad ïa ka Jingïap bad ka Hades la bred sha kata ka pung ka ding. Kane ka long kata ka jingïap ka ba-ar, kata ka pung ka ding keiñ.

¹⁵ Te jar ïa uba ym shym la shem ba la thoh ha kata ka kitab ka jingim, la bred ïa u sha kata ka pung ka ding.