JINGPYNPAW 15 - KA BAIBL

Ki angel bad ki jingïapthem ki bakhatduh

¹ Bad nga la ïohi ïa kawei pat ka dak khyllah ha bneng, kaba khraw bad ba-iphylla, hynñiew angel kiba don hynñiew ki jingïapthem, kiba long ki bakhatduh; naba ha ki la pyndep noh ïa kata ka jingbitar U Blei.

² Bad nga la ïohi kum ïa ka duriaw ïit ïa kaba la khleh da ka ding; bad ïa kita kiba la ïoh ïa ka jingjopthiaw halor uta u mrad khlaw, bad halor kata ka dur jong u, bad halor kata ka dak jong u, bad halor kata ka jingkheiñ ka kyrteng jong u, ba ki da ïeng keiñ halor kata ka duriaw ïit, ki da don ruh ki duitara jong U Blei.

³ Bad ki ïarwai ïa ka jingrwai u Moses u shakri jong U Blei, bad ïa ka jingrwai jong uta U Khun langbrot, ki da ong, “Kiba khraw bad ba-iphylla long kita ki jingleh jong me, A U Trai uba U Blei Badonbor Baroh! ki bahok bad bashisha kita ki lynti jong me, U Syiem jong kita ki rta!

⁴ Uei u ban ym tieng burom ïa me, A Trai, bad pyndonburom ïa ka kyrteng jong me? naba tang ma me hi u bakhuid. Naba ki kynja bynriew baroh kin ïawan bad kin ïamane dem ha khmat jong me, naba la pynpaw shynna ïa ki jingleh bahok jong me.”

⁵ Bad hadien kine kiei kiei ruh, nga la ïohi, bad ha khmih, la plie wang ïa ka templ jong Ka Tabernakl jong ka jingphla ha bneng;

⁶ bad kita ki hynñiew angel kiba don kita ki hynñiew ki jingïapthem, ki la ïawan mih noh na kata ka templ, kiba la kup ïa ka jaiñ linen ka bakhuid bad ka batyngshaiñ, bad kiba la panpoh ha la ki shadem da ki jingpanpoh ksiar.

⁷ Bad uwei na kita ki jingthaw ba-im u la ai ha kita ki hynñiew angel, hynñiew ki pliang ksiar ba-dap da ka jingbitar U Blei u ba-im sha ki bymjukut ki bymjukut.

⁸ Te la pyndap ïa kata ka templ da ka tdem na ka burom U Blei, bad na ka borbah jong u; te uno uno ruh um lah ban leit bsut sha kata ka templ, tad ynda la pyndep ïa kita ki hynñiew ki jingïapthem jong kita ki hynñiew angel.