JINGKHEIÑ 9 - KA BAIBL

Kaba rakhe ïa Ka Niam Ka Jinglait

¹ Bad U Trai u la kren ha u Moses ha ka ri khlaw Sinai, ha ka snem ka ba-ar ynda ki la ïamih noh na ka ri Ijipt, ha u bnai banyngkong, U da ong,

² “To ai ba ki khun Israel kin ïarakhe ïa Ka Niam Ka Jinglait ruh ha ka aïom ba la buh.

³ Ha ka bakhatsaw sngi, ha une u bnai, ha kaba la janmiet, phin ïarakhe ïa ka ha ka aïom jong ka: katba kum ki rukom jong ka baroh, bad katba kum ki niam ki rukom jong ka baroh, kumta keiñ phin ïarakhe ïa ka.”

⁴ Te u Moses u la kren ha ki khun Israel, ba kin ïarakhe ïa kata Ka Niam Ka Jinglait.

⁵ Bad ki la ïarakhe ïa kata Ka Niam Ka Jinglait ha ka bakhatsaw sngi, ha u bnai banyngkong, ha kaba la janmiet, ha ka ri khlaw Sinai: baroh kat kumba la hukum U Trai ïa u Moses, kumta ki la leh ki khun Israel.

⁶ Te la don ki briew ïa kiba la pynsang da ka metïap u briew, ba kumta kim lah ban ïarakhe ïa Ka Niam Ka Jinglait ha kata ka sngi: te ki la ïawan ha khmat u Moses, bad ha khmat u Aaron, ha kata ka sngi:

⁷ Kita ki briew te, ki la ong ha u, “Ïa ngi, la pynsang da ka metïap u briew: balei ba pynpep ïa ngi, ban ai ka jingainguh ha U Trai ha ka por kaba biang hapdeng ki khun Israel?”

⁸ Bad u Moses u la ong ha ki, “To da ïeng hangne; te ngan sngap ïa U Trai un hukum kumno shaphang jong phi.”

⁹ Te U Trai u la kren ha u Moses, U da ong,

¹⁰ “To kren ha ki khun Israel, da kaba ong, ‘Lada don mano mano ruh na phi, lane na ki khun ki ksiew jong phi, ba la pynsang ïa ki da ka metïap, lane ba la leit jingleit sha jngai, pynban, un rakhe ïa Ka Niam Ka Jinglait ha U Trai:

¹¹ Ha ka bakhatsaw sngi, ha u bnai u ba-ar, ha kaba la janmiet kin ïarakhe ïa ka, lem bad u kpu bakhlem thiat, bad ki jhur kthang kin ïabam ïa ka:

¹² Kin ym pynsah noh khyndiat ruh em na u haduh mynstep, kin ym pynkheiñ ruh ïa kawei na ki shyieng jong u: katba kum kita ki rukom baroh jong Ka Niam Ka Jinglait, kumta kin ïarakhe ïa ka.

¹³ Hynrei, uta u briew uba long bakhuid, bad u bym shym la leit jingleit, pynban, uba pep noh ïa ka ban rakhe ïa Ka Niam Ka Jinglait, ïa kata ka mynsiem keiñ yn ot noh napdeng ki briew jong u: namar ba um shym la wallam ïa ka jingainguh ka jong U Trai ha kata ka aïom ba la buh, uta u briew un kit ïa la ka pop.

¹⁴ Lada u nongwei u wan shong basa hapdeng jong phi, bad ba u mon ban rakhe ïa Ka Niam Ka Jinglait ha U Trai: katba kum kata ka rukom Ka Niam Ka Jinglait, bad katba shong kata ka rukom jong ka, kumta un leh: ha u nongwei, bad ha uta ïa uba la kha ha ka ri, phin ïoh tang kawei ka rukom keiñ.’ ”

U lyoh halor Ka Tabernakl

¹⁵ Te ha kata ka sngi ba la pynïeng ïa Ka Tabernakl, uta u lyoh u la tap noh ïa Ka Tabernakl, ïa kata ka ïing ka jong ka jingphla keiñ: te mynmiet, u la long halor kata Ka Tabernakl, syriem kum ka ding, haduh mynstep.

¹⁶ Kumta ka la ju long ha la ka sngi: uta u lyoh u ju tap noh ïa ka, mynsngi, bad kata ka jing-i kum ka ding, mynmiet.

¹⁷ Bad haba la kyntiew sha jrong ïa uta u lyoh nalor Ka Tabernakl, te hadien kata, ki khun Israel ki la leit mih noh: bad ha kata ka jaka ha kaba u la shong uta u lyoh, hangta ki khun Israel ki la shong dara.

¹⁸ Da ka hukum U Trai, ki khun Israel ki la ju leit mih noh, bad da ka hukum U Trai ruh, ki la ju ïashong dara: katba u la shong uta u lyoh halor Ka Tabernakl, katta ki la ju shong ha ki ïing dara jong ki.

¹⁹ Bad haba uta u lyoh u la sah slem bun sngi halor Ka Tabernakl, te ki khun Israel ki la ju sumar ïa ka jingsumar ka jong U Trai, bad kim ju leit mih noh.

²⁰ Bad ka la long kumta haba uta u lyoh u la shong tang khyndiat sngi halor Ka Tabernakl; da ka hukum U Trai, ki la ju shong sah ha ki ïing dara jong ki, bad da ka hukum U Trai, ki la ju leit mih noh.

²¹ Bad ka la long kumta haba uta u lyoh u la shong naduh janmiet haduh mynstep; bad haba la kyntiew noh ïa u lyoh mynstep, te ki ruh ki la leit mih noh; lada la kyntiew ïa u lyoh mynsngi lane mynmiet, ki ruh ki la ju mih noh.

²² Lane la uta u lyoh u la sah noh ar sngi, lane shi bnai, lane shi snem halor Ka Tabernakl, katba u shong sah halor jong ka, ki khun Israel ki la ju shong sah ha ki ïing dara jong ki, kim ju leit mih noh ruh: hynrei, haba u la kyntiew, ki la ju leit mih noh.

²³ Da ka hukum U Trai, ki la ju shong dara, da ka hukum U Trai ruh, ki la ju leit mih noh: kumta keiñ, ki la sumar ïa ka jingsumar ka jong U Trai, katba kum kata ka hukum U Trai da ka kti u Moses.