JINGKHEIÑ 8 - KA BAIBL

U Aaron u thang ïa ki sharak

¹ Bad U Trai u la kren ha u Moses, U da ong,

² “To kren ha u Aaron, ong ruh ha u, ‘Haba me thang ïa ki sharak, to ai ba kita ki hynñiew tylli ki sharak kin ïa-pynshai marpyrshah ïa kata ka dieng pynïeng sharak.’ ”

³ Te kumta, u Aaron u la leh; u la thang ïa kita ki sharak jong ka marpyrshah ïa kata ka dieng pynïeng sharak, kumba u la hukum U Trai ïa u Moses.

⁴ Te kane ka jingthaw ïa kata ka dieng pynïeng sharak, ka la long ka ksiar keiñ ba la shoh tylli: naduh ka met jong ka haduh ki syntiew jong ka, ka la long ka ksiar ba la shoh tylli: katba kum kata ka dur ba la pyni U Trai ha u Moses, kumta u la thaw ïa kata ka dieng pynïeng sharak.

Kaba pynkyntang ïa ki Lebi

⁵ Bad U Trai u la kren ruh ha u Moses, u da ong,

⁶ “To shim ïa ki Lebi napdeng ki khun Israel, bad to pynkhuid ïa ki.

⁷ Te kumne keiñ men leh ha ki ïa ka ban pynkhuid ïa ki: To synreit ïa ka um ka jingpynkhuid halor jong ki, kin khi ruh ïa ka met jong ki baroh, kin sait ïa la ki jaiñ ruh, kumta te, kin ïapynkhuid kyntang ïa lade.

⁸ Ynda kumta, kin shim ïa u masi lyngraw, lem bad ka jingainguh bam jong u, kaba na u 'purew bani ba la khleh da ka umphniang, bad men shim ïa uwei pat u masi lyngraw ïa ka ban long ka jingkñia sait pop.

⁹ Men wallam ruh ïa ki Lebi ha khmat Ka Tabernakl ka jingïaseng: bad men lum lang ïa u paidlang baroh ki khun Israel:

¹⁰ men wallam ruh ïa ki Lebi ha khmat U Trai: bad ki khun Israel kin ïabuh ïa la ki kti ha kita ki Lebi.

¹¹ Bad u Aaron un aiti nguh ïa ki Lebi ha khmat U Trai, ban long ka jingainguh bakaweh ki khun Israel, khnang ba kin ïoh trei ïa ka kam U Trai.

¹² Bad ki Lebi, kin buh ïa ki kti jong ki ha ki khlieh kita ki masi lyngraw: me ruh men ainguh ïa uwei, ban long ka jingkñia sait pop, bad ïa uta uwei, ban long ka jingainguh thang ha U Trai, ïa ka ban pynlong ka kuna na ka bynta ki Lebi.

¹³ Te men buh ïa ki Lebi ha khmat u Aaron, bad ha khmat ki khun shynrang jong u, bad men aiti nguh ïa ki, ban long ka jingainguh bapynkaweh ha U Trai.

¹⁴ “Kumta men pynkyrpang ïa ki Lebi napdeng ki khun Israel, te ki Lebi, kin long ki jong nga.

¹⁵ Ynda kumta, ki Lebi kin ïaleit hapoh, ban trei ïa ka kam jong Ka Tabernakl ka jingïaseng: bad me men pynkhuid ïa ki, bad men aiti nguh ïa ki, ban long ka jingainguh bapynkaweh.

¹⁶ Namar ha nga la ai ïa ki baroh phar napdeng ki khun Israel; ha ka jaka jong uta ïa uba la kha nyngkong ka kpoh baroh, ïa uba la kha nyngkong keiñ na ki khun Israel baroh, nga la shim ïa ki ha lade.

¹⁷ Namar kita baroh ïa kiba la kha nyngkong hapdeng ki khun Israel, bad briew, bad mrad, ki dei ki jong nga; naduh kata ka sngi ba nga la shoh ïa kita baroh ba la kha nyngkong ha ka ri Ijipt, nga la pynkyntang ïa ki ha lade hi.

¹⁸ Bad nga la shim ïa ki Lebi na ka bynta kita ïa kiba la kha nyngkong baroh na ki khun Israel.

¹⁹ Te nga la aiti ïa ki Lebi kum ka jingai ha u Aaron, bad ha ki khun shynrang jong u, napdeng ki khun Israel, ban trei ïa ka kam ki khun Israel ha Ka Tabernakl ka jingïaseng, bad ban pynlong ka kuna na ka bynta ki khun Israel: ba kumta, kaba ïapkhlam kan ym long shuh hapdeng ki khun Israel, haba ki khun Israel kin wan hajan kata ka jaka kyntang.”

²⁰ Te u Moses, bad u Aaron, bad uta paidlang baroh ki khun Israel, ki la leh ha kita ki Lebi: kat kumba ïa baroh ba la hukum U Trai ha u Moses shaphang ki Lebi, kumta ki khun Israel ki la leh ha ki.

²¹ Bad ïa ki Lebi la pynkhuid, bad ki la sait ïa la ki jaiñ; bad u Aaron u la ainguh ïa ki, ban long ka jingainguh pynkaweh ha khmat U Trai: u Aaron ruh u la pynlong ka kuna na ka bynta jong ki, ïa ka ban pynkhuid ïa ki.

²² Ynda kumta, ki Lebi ki la ïaleit hapoh, ïa ka ban trei ïa ka kam jong ki ha Ka Tabernakl ka jingïaseng ha khmat u Aaron, bad ha khmat ki khun shynrang jong u: kumba u la hukum U Trai ïa u Moses shaphang ki Lebi, kumta ki la leh ha ki.

Ki snem ka jingshakri jong ki Lebi

²³ U Trai ruh u la kren ha u Moses, u da ong,

²⁴ “Kane ka long kata kaba dei ïa ki Lebi: naduh kiba arphew san snem ka rta bad tam, kin ïaleit hapoh, ïa ka ban shakri ha ka kam Ka Tabernakl ka jingïaseng:

²⁵ bad naduh kiba sanphew snem ka rta, kin wan phai noh na kaba shakri ïa kata ka kam, ba kin ym shakri shuh;

²⁶ hynrei, kin ïashakri lem bad ki para jong ki, hapoh Ka Tabernakl ka jingïaseng, ïa ka ban ap khmih, hynrei, kin ym ïakam jingkam shuh. Kumne men leh keiñ ïa ki Lebi shaphang ki jingïasumar jong ki.”