JINGKHEIÑ 4 - KA BAIBL

Ka kam ki lyngdoh

¹ Bad U Trai u la kren ha u Moses, bad ha u Aaron, U da ong,

² “To shim ïa ka jingkheiñ ki khun shynrang u Kohath napdeng ki khun shynrang u Lebi, ha la ka ïing ka ïing, katba kum ki ïing ki kpa jong ki,

³ naduh uba laiphew snem ka rta bad tam haduh uba sanphew snem, baroh kat kiba leit bsut ha ka kynhun lyngdoh, ban trei ïa ka kam ha Ka Tabernakl ka jingïaseng.

⁴ Kane kan long ka kam kita ki khun shynrang u Kohath ha Ka Tabernakl ka jingïaseng, shaphang kiei kiei ki bakyntang tam:

⁵ te haba uta u paidlang un sa ïaid noh, u Aaron un wan, lem bad ki khun shynrang jong u, bad kin ïalaw noh ïa ka jingkah bapynïakhlad, bad kin ïatap noh da ka, ïa ka synduk ka jingphla:

⁶ bad halor kata ruh, kin buh ïa ka jingtap da ki snieh takash, te halor kata pat, kin siang da ki jaiñ bthuh baroh phar, bad kin ïa-pynphrung ïa ki dieng jingbah jong ka.

⁷ Bad halor ka miej ba buh ïa ki 'pu pyni, kin ïasiang da ki jaiñ bthuh, bad halor kata, kin ïabuh ïa ki pliang, bad ïa ki siang, bad ïa ki khuri, bad ïa ki jingtap ruh de, ïa ka ban tap: bad uta u kpu, un long halor jong ka ha la ka sngi:

⁸ kin ïasiang ruh halor jong ki, da ka jaiñ basaw hain hain, bad halor kata de, kin ïatap da ka jingtap da ki snieh takash, bad kin ïa-pynphrung ïa ki dieng jingbah jong ka.

⁹ Bad haba ki la shim ïa ka jaiñ bthuh, kin ïatap ïa ka halor ka jingbat sharak jong ka jingshai, bad ki sharak jong ka, bad ki nap jong ka, bad ki pliang buh nap jong ka, bad ki khulpi jong ka baroh, da kiba ki ju shakri ïa ka:

¹⁰ bad kin ïabuh ïa ka, bad ïa kiei kiei ki jingbuh jong ka baroh, hapoh ka jingtap da ki snieh takash, bad kin ïabuh ïa kata, halor u dieng jingbah.

¹¹ Bad halor ka duwan ksiar, kin ïasiang da ka jaiñ bthuh, kin ïatap ruh ïa ka da ka jingtap na ki snieh takash, bad kin ïa-pynphrung ïa ki dieng jingbah jong ka:

¹² kin ïashim ruh ïa ki atiar baroh ki jong kata ka kam, da kiba ki ïatrei jingtrei ha ka jaka kyntang, bad kin ïasop ïa ki hapoh ka jaiñ bthuh, bad kin ïatap ruh ïa ki da ka jingtap na ki snieh takash, bad kin ïabuh ïa ki de, halor ka jingbah.

¹³ Bad kin khat noh de, ïa ka dpei na ka duwan, bad kin ïasiang halor jong ka da ka jaiñ basaw bthuh:

¹⁴ kin ïabuh ruh halor jong ka, ïa ki pliang jong ka baroh, da kiba ki ïatrei ïa ka kam jong ka, kata, ïa ki khiew rah ding, bad ïa ki bnoh doh, bad ïa ki siang rah dpei, bad ïa ki pliang, baroh keiñ ki pliang kiba dei ïa ka duwan; bad kin ïasiang halor jong ka da ka jingtap na ki snieh takash, bad kin pynphrung ruh ïa ki dieng jingbah jong ka.

¹⁵ Te ynda u Aaron, bad ki khun shynrang jong u, ki la lah tap noh ïa ka jaka kyntang, bad ïa kiei kiei ki jingbuh baroh ki jong kata ka jaka kyntang, haba u paidlang un sa ïaid noh; ynda kumta, kin wan ki khun shynrang u Kohath ban ïabah ïa ki: hynrei, kin ym ktah ïa kaei kaei ka bakyntang, ïoh kin ïap noh. Kine kiei kiei, ki long ki jingkit ki khun shynrang u Kohath, ha kata Ka Tabernakl ka jingïaseng.”

¹⁶ Te ha ka kam u Eleasar u khun u Aaron lyngdoh, ka dei ka umphniang ka jong ka jingshai, bad ka jingainguh thang baiwbih, bad ka jingainguh bam ba ha la ka sngi, bad ïa ka umphniang ban pynsleh, bad ban sumar keiñ ïa Ka Tabernakl baroh, bad ïa kiei kiei baroh kat kiba don hapoh jong ka, ha kata ka jaka kyntang, bad ha ki jingbuh jong ka.

¹⁷ U Trai u la kren ruh ha u Moses, bad ha u Aaron, u da ong,

¹⁸ “To phi wat ot noh ïa ka jaid ki kur u Kohath napdeng ki Lebi:

¹⁹ hynrei, to leh kumne ïa ki, ba kin ïoh im, bad ba kin ym ïap noh, haba ki wan hajan ïa kita kiei kiei ki bakhuid tam: u Aaron, bad ki khun shynrang jong u, kin ïaleit hapoh, bad kin ïabuh ïa ki uwei pa uwei ha la ka jong ka jong ka kam, bad ha la ka jong ka jong ka jingkit:

²⁰ hynrei, wat shah ïa ki, ban bsut shapoh ban khmih haba dang ïatap noh ïa kita kiei kiei ki bakhuid, ïoh kin ïap noh.”

²¹ Bad U Trai u la kren ha u Moses, u da ong,

²² “To shim ruh ïa ka jingkheiñ, ïa ki khun shynrang u Gershon, ha la ki ïing ki ïing ki kpa jong ki, katba kum ki kur jong ki:

²³ naduh kiba laiphew snem ka rta bad tam haduh kiba sanphew snem ka rta, men kheiñ ïa ki baroh kat kiba wan ïa ka ban kam jingkam, ban trei ïa ka kam ha Ka Tabernakl ka jingïaseng.

²⁴ Te kane kan long ka kam jong ki kur u Gershon, ha kaba trei, bad ha kaba kit:

²⁵ kin ïabah ïa ki jingkah jong Ka Tabernakl, bad ïa Ka Tabernakl ka jingïaseng, ïa ka jingsop jong ka, bad ïa kata ka jingsop na ki snieh takash kaba halor jong ka, bad ïa ka jingkah ïa ka jingkhang jong Ka Tabernakl ka jingïaseng;

²⁶ bad ïa ki jingkah ka phyllaw ruh, bad ïa ki jingkah ka jingkhang ka khyrdop jong ka phyllaw, kaba baroh sawdong ïa Ka Tabernakl bad ïa ka duwan, ïa ki tyllai jong ki ruh, bad ïa ki atiar baroh ka kam jong ki, bad ïa kiei kiei baroh ba la thaw na ka bynta jong ki, kumta kin ïakam.

²⁷ Katba kum ka hukum u Aaron bad ki khun shynrang jong u, kumta kan long ka kam baroh ka jong kita ki khun shynrang u Gershon, ha ki jingkit jong ki baroh, bad ha ka jingtrei jong ki baroh: phin aiti ruh ha ki, ïa ki jingkit jong ki baroh ban sumar.

²⁸ Kane te ka long ka kam jong ki khun shynrang u Gershon ha Ka Tabernakl ka jingïaseng: bad ka jingsumar jong ki, kan long ha ka kti u Ithamar u khun u Aaron lyngdoh.

²⁹ “Ïa ki khun shynrang u Merari ruh, ha la ki kur ki kur, men kheiñ ïa ki, katba kum ka ïing ki kpa jong ki;

³⁰ naduh kiba laiphew snem ka rta bad tam, haduh kiba sanphew snem ka rta, men kheiñ ïa ki, baroh kat kiba wan ha kata ka kam, ïa ka ban trei ïa ka kam Ka Tabernakl ka jingïaseng.

³¹ Kane ka long ka jingkit jong ki, ïa ka ban sumar ha ka kam jong ki baroh ha kata Ka Tabernakl ka jingïaseng; ïa ki lyntang jong Ka Tabernakl, bad ïa ki dieng pynthap jong ki, bad ïa ki rijied jong ki, bad ïa ki thliew tnaw jong ki de;

³² ïa kita ki rijied jong ka phyllaw ruh baroh sawdong, bad ïa ki thliew tnaw jong ki, bad ki prek jong ki, bad ki tyllai jong ki, lem bad ki atiar jong ki baroh, lem bad kiei kiei baroh kiba donkam jong ki: te da kaba buh ïa la ki kyrteng, phin kheiñ ïa ki atiar ba kin ïasumar, bad ba kin ïabah ma ki.

³³ Kane ka long ka kam jong kita ki kur ki khun shynrang u Merari, katba kum ka kam jong ki baroh, ha kata Ka Tabernakl ka jingïaseng, hapoh ka kti u Ithamar u khun u Aaron lyngdoh.”

³⁴ Te u Moses, bad u Aaron, bad ki rangbah uta u paidlang, ki la ïakheiñ ïa ki khun shynrang ki Kohath, ha la ki kur ki kur jong ki, bad katba kum ki ïing ki kpa jong ki,

³⁵ naduh kiba laiphew snem ka rta bad tam, haduh kiba sanphew snem ka rta, uwei uwei baroh uba wan shim ïa kane ka kam ban trei ha kata Ka Tabernakl ka jingïaseng:

³⁶ te kita ïa kiba la kheiñ na ki, ha la ki kur ki kur jong ki, ki la long ar hajar hynñiewspah sanphew.

³⁷ Kine ki long kita ïa kiba la kheiñ na kita ki kur ki Kohath, baroh kat kiba lah ban kam jingkam ha kata Ka Tabernakl ka jingïaseng, ïa kiba u Moses, bad u Aaron, ki la ïakheiñ katba kum ka hukum U Trai da ka kti u Moses.

³⁸ Te kita ïa kiba la kheiñ na ki khun shynrang u Gershon, ha la ki kur ki kur jong ki, bad katba kum ki ïing ki kpa jong ki,

³⁹ naduh kiba laiphew snem ka rta bad tam, haduh kiba sanphew snem ka rta, uwei uwei baroh uba wan shim ïa kane ka kam, ïa ka ban trei ha kata Ka Tabernakl ka jingïaseng,

⁴⁰ te kita ïa kiba la kheiñ na ki, ha la ki kur ki kur jong ki, katba kum ki ïing ki kpa jong ki, ki la long ar hajar hynriewspah laiphew.

⁴¹ Kine ki long kita ïa kiba la kheiñ na ki kur ki khun shynrang u Gershon, na kita baroh kat kiba lah ban kam jingkam ha kata Ka Tabernakl ka jingïaseng, ïa kiba u Moses bad u Aaron ki la ïakheiñ katba kum ka hukum U Trai.

⁴² Bad kita ïa kiba la kheiñ na ki kur ki khun shynrang u Merari, ha la ki kur ki kur jong ki, katba kum ki ïing ki kpa jong ki,

⁴³ naduh kiba laiphew snem ka rta bad tam, haduh kiba sanphew snem ka rta, uwei uwei baroh uba wan shim ïa kane ka kam, ïa ka ban trei ha kata Ka Tabernakl ka jingïaseng,

⁴⁴ kita ïa kiba la kheiñ na ki, ha la ki kur ki kur jong ki, ki la long lai hajar bad arspah.

⁴⁵ Kine ki long kita ïa kiba la kheiñ na ki kur ki khun shynrang u Merari, ïa kiba u Moses bad u Aaron ki la ïakheiñ katba kum ka hukum U Trai da ka kti u Moses.

⁴⁶ Kita baroh ïa kiba la kheiñ na ki Lebi, ïa kiba u Moses, bad u Aaron, bad ki rangbah ki Israel ki la ïakheiñ, ha la ki kur ki kur jong ki, bad katba kum ki ïing ki kpa jong ki,

⁴⁷ naduh kiba laiphew snem ka rta bad tam, haduh kiba sanphew snem ka rta, uwei uwei baroh uba wan shim ïa ka ban kam ïa ka jingkam shakri, bad ïa ka ban trei shaphang ki jingkit ha kata Ka Tabernakl ka jingïaseng,

⁴⁸ kita ïa kiba la kheiñ na ki, ki la long phra hajar sanspah phraphew.

⁴⁹ Katba kum ka hukum U Trai, da ka kti u Moses u la kheiñ ïa ki, uwei pa uwei baroh katba kum ka kam jong u, bad katba kum ka jingkit jong u: kumne la kheiñ ïa ki, kumba la hukum U Trai ïa u Moses.