JINGKHEIÑ 3 - KA BAIBL

Kaba kheiñ ïa ki Lebi bad ka kamram jong ki

¹ Bad kine de ki long ki jingkha pateng u Aaron bad u Moses ha kata ka sngi ba U la kren U Trai ha u Moses ha u lum Sinai.

² Kine ruh ki kyrteng ki khun shynrang u Aaron: u Nadab ïa uba la kha nyngkong, bad u Abihu, u Eleasar, bad u Ithamar.

³ Kine ki long ki kyrteng ki khun shynrang u Aaron, ki lyngdoh ba la pynsleh, ïa kiba u la pynkyntang ma u ïa ka ban kam ïa ka kam lyngdoh.

⁴ Hynrei, u Nadab bad u Abihu, ki la ïap noh ha khmat U Trai, haba ki la nguh da ka ding ka basang ha khmat U Trai, ha ka ri khlaw Sinai, bad kim shym la don khun: bad u Eleasar bad u Ithamar ki la shakri ha ka kam lyngdoh ha khmat u Aaron uba u kpa jong ki.

⁵ Te U Trai u la kren ha u Moses, U da ong,

⁶ “To wallam hajan ïa ka jaid Lebi, to pynïeng ruh ïa ki ha khmat u Aaron lyngdoh, ba kin ïashakri ïa u.

⁷ Kin ïasumar ruh ïa ka kam jong u, bad ïa ka kam u paidlang baroh de ha khmat Ka Tabernakl ka jingïaseng, ba kin kam ïa ka kam jong Ka Tabernakl.

⁸ Kin ïasumar ruh ïa ki jingbuh baroh ki jong Ka Tabernakl ka jingïaseng, bad ïa ka kam jong ki khun Israel, ba kin kam ïa ka kam jong Ka Tabernakl.

⁹ Men aiti ruh ïa ki Lebi ha u Aaron, bad ha ki khun shynrang jong u: ïa kine, la aiti baroh phar keiñ ha u na ki khun Israel.

¹⁰ Men thung ruh ïa u Aaron, bad ïa ki khun shynrang jong u, ba kin ïasumar ïa ka kam lyngdoh jong ki: te u nongwei u ban nud wan hajan, yn pynïap noh ïa u.”

¹¹ Bad U Trai u la kren ruh ha u Moses, U da ong,

¹² “Ha khmih ruh, ma nga, nga la shimti ïa ki Lebi napdeng ki khun Israel, ha ka jaka kita baroh, ïa kiba la kha nyngkong ka kpoh na ki khun Israel; namar kata, ki Lebi kin long ki jong nga:

¹³ namar kita ïa kiba la kha nyngkong baroh, ki long ki jong nga; naba ha kata ka sngi ba nga la shoh ïa u khun nyngkong baroh ha ka ri Ijipt, nga la pynkyntang ha lade hi ïa uba la kha nyngkong baroh ha Israel, bad briew bad mrad: kin long ki jong nga keiñ; ma nga, nga long U Trai.”

¹⁴ U Trai u la kren ruh ha u Moses ha ka ri khlaw Sinai, u da ong,

¹⁵ “To kheiñ ïa ki khun u Lebi, katba kum ki ïing ki kpa jong ki, ha la ki kur: men kheiñ na ki, ïa u shynrang baroh uba shi bnai ka rta bad tam.”

¹⁶ Bad u Moses u la kheiñ katba kum kata ka ktien U Trai, kumba la hukum ïa u.

¹⁷ Kine te, ki long ki khun shynrang u Lebi katba long ki kyrteng jong ki: u Gershon, bad u Kohath, bad u Merari.

¹⁸ Kine de ki kyrteng ki khun shynrang u Gershon katba kum ki kur jong ki: u Libni, bad u Shimei.

¹⁹ Bad ki khun shynrang u Kohath katba kum ki kur jong ki: u Amram, bad u Ishar, u Hebron, bad u Ussiel.

²⁰ Bad ki khun shynrang u Merari katba kum ki kur jong ki: u Mahli, bad u Mushi. Kine ki long ki kur ki Lebi, katba kum ka ïing ki kpa jong ki.

²¹ Na u Gershon, la mih ki kur ki Libni, bad ki kur ki Shimei: kine ki long ki kur ki Gershon.

²² Kita ïa kiba la kheiñ na ki, kat ka jingkheiñ ïa u shynrang baroh naduh kiba shi bnai ka rta bad tam, ïa kiba la kheiñ jong ki keiñ, ki la long hynñiew hajar sanspah.

²³ Ki kur jong ki Gershon kin ïashong dara shadien Ka Tabernakl shaphang sepngi.

²⁴ Bad u rangbah jong ka ïing u kpa ki Gershon, un long u Eliasaph u khun u Lael.

²⁵ Bad ka jingsumar ki khun shynrang u Gershon, ha Ka Tabernakl ka jingïaseng, kan long Ka Tabernakl hi, bad kata ka ïingjaiñ, ka jingsop jong ka ruh, bad ka jingkah ïa ka jingkhang Ka Tabernakl ka jingïaseng,

²⁶ bad ki jingkah ïa ka phyllaw, bad ka jaiñ kah ïa ka jingkhang jong kata ka phyllaw, kaba long baroh sawdong ïa Ka Tabernakl, bad baroh sawdong ka duwan de, bad ki tyllai jong ka ruh kiba dei ha ka kam jong ka baroh.

²⁷ Na u Kohath, la mih ki kur ki Amram, bad ki kur ki Ishar, bad ki kur ki Hebron, bad ki kur ki Ussiel de: kine ki long ki kur ki Kohath.

²⁸ Ka jingkheiñ ïa ki shynrang baroh, naduh kiba shi bnai ka rta bad tam, ka la long phra hajar hynriewspah, kiba sumar ïa ka kam jong kata ka ïing kyntang.

²⁹ Ki kur jong kita ki khun shynrang u Kohath, kin ïashong dara ha ka phang ka bashathie jong Ka Tabernakl.

³⁰ Bad u rangbah ka ïing jong u kpa ki kur ki Kohath, un long u Elisaphan u khun u Ussiel.

³¹ Ka jingsumar jong ki te kan long ïa kata ka synduk, bad ka miej, bad ka dieng pynïeng sharak, bad kita ki duwan, bad ki pliang jong kata ka ïing kyntang da kiba ki ju treikam, bad kata ka jingkah ruh de, bad kiei kiei baroh kiba dei ha ka.

³² Bad uba ha khlieh halor ki rangbah ki Lebi, un long u Eleasar u khun u Aaron lyngdoh, bad un ïoh synshar halor kita kiba sumar ïa ka ïing kyntang.

³³ Na u Merari, la mih ki kur ki Mahli, bad ki kur ki Mushi: kine keiñ ki long ki kur u Merari.

³⁴ Te kita ïa kiba la kheiñ na ki, kat kum ka jingkheiñ ïa ki shynrang baroh, naduh kiba shi bnai ka rta bad tam, ki la long hynriew hajar bad arspah.

³⁵ Bad u rangbah ka ïing u kpa kita ki kur u Merari, un long u Suriel u khun u Abihail: kine kin ïashong dara ha ka phang kaba shatei jong Ka Tabernakl.

³⁶ Bad hapoh ka jingsumar jong kita ki khun shynrang u Merari, kin long ki lyntang jong Ka Tabernakl, bad ki dieng pynthap jong ka, bad ki rijied jong ka, bad ki thliew tnaw jong ka, bad ki pliang jong ka baroh, bad kiei kiei baroh kat kiba dei ha ka;

³⁷ ki rijied jong ka phyllaw ruh baroh sawdong, bad ki thliew tnaw, bad ki prek jong ki, bad ki tyllai jong ki de.

³⁸ Hynrei, kita ki ban ïashong dara ha shuwa Ka Tabernakl shaphang mihngi, kata, ha shuwa Ka Tabernakl ka jingïaseng shaphang mihngi, kin long u Moses, bad u Aaron, bad ki khun shynrang jong u de, ki da ïa-ap sumar ïa ka kam jong ka ïing kyntang, bad ïa ka kam jong ki khun Israel; hynrei, ïa u nongwei u ban nud wan hajan, yn pynïap noh.

³⁹ Baroh te kat kiba la kheiñ na ki Lebi, ïa kiba la kheiñ u Moses bad u Aaron da ka hukum U Trai, ha la ki kur jong ki baroh, ki shynrang baroh keiñ, naduh kiba shi bnai ka rta bad tam, ki la long arphew ar hajar.

Ki Lebi bad ka jingsiewspah ïa kiba la kha nyngkong

⁴⁰ U Trai ruh u la ong ha u Moses, “To kheiñ ïa ki shynrang baroh, ïa kiba la kha nyngkong ki jong ki khun Israel, naduh kiba shi bnai ka rta bad tam, to shim ruh ïa ka jingkheiñ ki kyrteng jong ki.

⁴¹ Men shim ruh ïa ki Lebi ha nga (Nga long ma nga U Trai) ha ka jaka kiba la kha nyngkong baroh hapdeng ki khun Israel; bad ïa ki jingri jong ki Lebi ha ka jaka kiba la kha nyngkong baroh na ki jingri jong ki khun Israel.”

⁴² Te u Moses u la kheiñ, kumba la hukum U Trai ïa u, ïa baroh kat ïa kiba la kha nyngkong hapdeng ki khun Israel.

⁴³ Te ki shynrang baroh ba la kha nyngkong, katba shong ka jingkheiñ ïa ki kyrteng jong ki, naduh uba shi bnai ka rta bad tam, kita ïa kiba la kheiñ na ki, ki la long arphew ar hajar bad arspah hynñiewphew lai.

⁴⁴ Bad U Trai u la kren ha u Moses, u da ong,

⁴⁵ “To shim ïa kita ki Lebi ha ka jaka ïa kiba la kha nyngkong baroh hapdeng ki khun Israel, bad ïa ki jingri jong ki Lebi ha ka jaka ki jingri jong ki: te kita ki Lebi, kin long ki jong nga: Nga long ma nga U Trai.

⁴⁶ Te na ka bynta kita ïa ki ban siewspah na kita ki arspah hynñiewphew lai ïa kiba la kha nyngkong jong ki khun Israel, kiba tam ïa ki Lebi,

⁴⁷ men sa shim san shekel namar uwei pa uwei; katba shong ka shekel ka jaka kyntang, men shim ïa ki (shi shekel ka long arphew gerah):

⁴⁸ bad men ai ïa kita ki sbai, da kiba la siewspah ïa kita kiba tam, ha u Aaron bad ha ki khun shynrang jong u.”

⁴⁹ Bad u Moses u la shim ïa ki sbai ka jingsiewspah jong kiba tam, nalor kita ïa kiba la siewspah da ki Lebi:

⁵⁰ na kita ïa kiba la kha nyngkong jong ki khun Israel, u la shim ïa ki sbai; shi hajar bad laispah hynriewphew san shekel, katba shong ka shekel ka jaka kyntang:

⁵¹ u Moses u la ai ruh ïa ki sbai jong kita ïa kiba la siewspah ha u Aaron, bad ha ki khun shynrang jong u, katba kum kata ka ktien U Trai, kumba u la hukum U Trai keiñ ïa u Moses.