JINGKHEIÑ 2 - KA BAIBL

Ki nongïalam bad ki jaid Israel ha la ki ïingjaiñ jong ki

¹ Te U Trai u la kren ha u Moses bad ha u Aaron, u da ong,

² “Ki khun Israel kin ïashong dara uwei uwei baroh hajan la ka jong ka lama, hapoh ki dak ki ïing ki kpa jong ki: baroh sawdong ha pyrshah Ka Tabernakl ka jingïaseng kin ïashong na jngai.

³ Te shaphang mihngi na kaba mih ka sngi, kin ïashong dara kita kiba dei ïa ka lama ka jong u paidbah u Judah, katba long ki paidïapom jong ki: bad u rangbah ki khun u Judah, un long u Nahshon u khun u Amminadab.

⁴ Bad u paidïapom jong u ruh, bad kita ïa kiba la kheiñ na ki, ki la long hynñiewphew saw hajar hynriewspah.

⁵ Bad kita ki ban ïashong kham hajan jong u, kin long ka jaid Issakhar: te u rangbah ki khun u Issakhar, un long u Nethaniil u khun u Suar:

⁶ te u paidïapom jong u ruh, bad kita ïa kiba la kheiñ na ki, ki la long sanphew saw hajar sawspah:

⁷ hadien kata te, ka jaid u Sabulon: bad u Eliab u khun u Helon, un long u rangbah ki khun u Sabulon,

⁸ te u paidïapom jong u, bad kita ïa kiba la kheiñ na ki, ki la long sanphew hynñiew hajar sawspah.

⁹ Baroh kat kiba la kheiñ lang na u paidbah u Judah, ha ki paidïapom jong ki baroh, ki la long shispah phraphew hynriew hajar bad sawspah. Kine, kin ïamih noh nyngkong keiñ.

¹⁰ “Shaphang shathie, kan long ka lama ka jong u paidbah u Reuben, katba kum ki paidïapom jong ki: bad u rangbah ki khun u Reuben, un long u Elisur u khun u Shedeur.”

¹¹ Te u paidïapom jong u ruh, bad kita ïa kiba la kheiñ na ki, ki la long sawphew hynriew hajar sanspah.

¹² “Bad kita ki ban ïashong kham hajan jong u, kin long ka jaid Simeon; bad u rangbah ki khun u Simeon, un long u Shelumiel u khun u Surishaddai:”

¹³ bad u paidïapom jong u, bad kita ïa kiba la kheiñ na ki, ki la long sanphew khyndai hajar laispah.

¹⁴ “Hadien kata te, ka jaid Gad: bad u rangbah ki khun u Gad, un long u Eliasaph u khun u Reuel.”

¹⁵ Te u paidïapom jong u, bad kita ïa kiba la kheiñ na ki, ki la long sawphew san hajar hynriewspah sanphew.

¹⁶ “Baroh te, kat kiba la kheiñ lang na u paidbah u Reuben, ha ki paidïapom jong ki baroh, ki la long shispah sanphew wei hajar bad sanspah sanphew. Kine te, kin sa mih noh ki ba-ar ha ka jingïaid.

¹⁷ “Hadien kata te, Ka Tabernakl ka jingïaseng kan sa mih noh, lem bad u paidbah jong ki Lebi hapdeng kita ki paidbah, kat kumba ki la ïashong dara, kumta keiñ kin ïamih noh, uwei uwei baroh ha la ka jong ka jaka, bad hapoh la ki jong ki lama de.

¹⁸ “Shaphang sepngi, kan long ka lama u paidbah u Ephraim, katba kum ki paidïapom jong ki: bad u rangbah ki khun u Ephraim, un long u Elishama u khun u Ammihud.”

¹⁹ Te u paidïapom jong u, bad kita ïa kiba la kheiñ na ki, ki la long sawphew hajar sanspah.

²⁰ “Hajan jong u de, kan long ka jaid Manasseh: bad u rangbah ki khun u Manasseh, un long u Gamaliel u khun u Pedahsur.”

²¹ Te u paidïapom jong u, bad kita ïa kiba la kheiñ na ki, ki la long laiphew ar hajar arspah.

²² “Hadien kata te, ka jaid Benjamin: bad u rangbah ki khun u Benjamin, un long u Abidan u khun u Gideoni.”

²³ Te u paidïapom jong u, bad kita ïa kiba la kheiñ na ki, ki la long laiphew san hajar sawspah.

²⁴ “Baroh te, kat kiba la kheiñ lang na uta u paidbah u Ephraim, ha ki paidbah jong ki baroh, ki la long shispah phra hajar bad shispah. Kine ruh, kin long ki balai ha ka ban mih noh.

²⁵ “Shaphang shatei de, kan long ka lama u paidbah u Dan, katba kum ki paidïapom jong ki; bad u rangbah ki khun u Dan, un long u Ahieser u khun u Ammishaddai.”

²⁶ Te u paidïapom jong u, bad kita ïa kiba la kheiñ na ki, ki la long hynriewphew ar hajar hynñiewspah.

²⁷ “Bad kita ki ban ïashong dara kham hajan jong u, kin long ka jaid Asher: bad u rangbah ki khun u Asher, un long u Pagiel u khun u Okran.”

²⁸ Te u paidïapom jong u, bad kita ïa kiba la kheiñ na ki, ki la long sawphew wei hajar sanspah.

²⁹ “Hadien kata te, ka jaid Naphtali: bad u rangbah ki khun u Naphtali, un long u Ahira u khun u Enan.”

³⁰ Te u paidïapom jong u, bad kita ïa kiba la kheiñ na ki, ki la long sanphew lai hajar sawspah.

³¹ Baroh te, kat kiba la kheiñ lang na uta u paidbah u Dan, ki la long shispah sanphew hynñiew hajar bad hynriewspah. Kine te, kin ïamih noh khatduh eh, lem bad la ki lama.

³² Kine, ki long kiba la kheiñ lang na ki khun Israel, katba kum ki ïing ki kpa jong ki: baroh, kat kiba la kheiñ lang ha ki paidlang jong ki, ha ki paidïapom jong ki, baroh keiñ, ki la long hynriewspah lai hajar bad sanspah sanphew.

³³ Hynrei ïa ki Lebi, ym shym la kheiñ hapdeng ki khun Israel; kumba u la hukum U Trai ïa u Moses.

³⁴ Bad ki khun Israel ki la leh baroh kat kiba u la hukum U Trai ïa u Moses, kumta, ki la ïashong dara hapoh ki lama jong ki, bad kumta ruh, ki la ïamih noh, uwei pa uwei katba kum ki kur jong u, katba kum ki ïing ki kpa jong ki.