JINGKHEIÑ 1 - KA BAIBL

Kaba kheiñ ïa ki paidbah Israel baroh ha ka ri khlaw Sinai

¹ Te U Trai u la kren ha u Moses ha ka ri khlaw Sinai, ha Ka Tabernakl jong ka jingïaseng, ha ka sngi ka banyngkong jong u bnai u ba-ar, ha ka snem ka ba-ar hadien ba ki la ïamih noh na ka ri Ijipt, u da ong,

² “To phin shim ka jingkheiñ ïa u paidlang ki khun Israel baroh, katba kum ki kur jong ki, na ka ïing ki kpa jong ki, lem bad ka jingkheiñ ki kyrteng, u shynrang baroh uwei pa uwei;

³ naduh kiba arphew snem ka rta bad tam, baroh kat kiba lah ïaleit mih ban ïaleh thma ha Israel, ma me bad u Aaron phin ïakheiñ ïa ki katba kum ki paidïapom jong ki.

⁴ Lem bad phi ruh, un long uwei u briew na kawei pa kawei ka jaid; uwei uwei baroh un long u rangbah na ka ïing ki kpa jong u.

⁵ Kine te ki long ki kyrteng kita ki rangbah, ki ban ïeng lem bad phi: na ka jaid Reuben — u Elisur u khun u Shedeur.

⁶ Na ka jaid Simeon — u Shelumiel u khun u Surishaddai.

⁷ Na ka jaid Judah — u Nahshon u khun u Amminadab.

⁸ Na ka jaid Issakhar — u Nethaniil u khun u Suar.

⁹ Na ka jaid Sabulon — u Eliab u khun u Helon.

¹⁰ Na ki khun u Joseph; na ka jaid Ephraim — u Elishama u khun u Ammihud; na ka jaid Manasseh — u Gamaliel u khun u Pedahsur.

¹¹ Na ka jaid Benjamin — u Abidan u khun u Gideoni.

¹² Na ka jaid Dan — u Ahieser u khun u Ammishaddai.

¹³ Na ka jaid Asher — u Pagiel u khun u Okran.

¹⁴ Na ka jaid Gad — u Eliasaph u khun u Deuel.

¹⁵ Na ka jaid Naphtali — u Ahira u khun u Enan.”

¹⁶ Kine ki long kita kiba la ju donnam keiñ na uta u paidlang, ki rangbah jong ki jaid ki kpa jong ki, ki rangbah ki hajar ha Israel.

¹⁷ Te u Moses bad u Aaron ki la shim ïa kine ki rangbah ïa kiba la ïathuh ïa ki kyrteng jong ki:

¹⁸ ki la ïalum lang ruh ïa uta u paidlang baroh ha ka sngi banyngkong u bnai u ba-ar, ki la ïa-pynpaw ruh ïa ki jinghiar pateng jong ki katba kum ki kur jong ki, na ka ïing ki kpa jong ki, katba kum ka jingkheiñ ïa ki kyrteng jong ki, naduh arphew snem ka rta bad tam, uwei pa uwei.

¹⁹ Kumba u la hukum U Trai ha u Moses, kumta u la kheiñ ïa ki ha ka ri khlaw Sinai.

²⁰ Bad ki khun u Reuben, uba la kha nyngkong jong u Israel, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ki kyrteng jong ki, uwei pa uwei u shynrang baroh naduh arphew snem ka rta bad tam, baroh kat kiba lah ïaleit mih ban ïaleh thma;

²¹ kita ïa kiba la kheiñ na ki, na ka jaid Reuben, ki la long sawphew hynriew hajar sanspah.

²² Na ki khun u Simeon, ki jingkha pateng jong ki, katba kum ki kur jong ki, na ka ïing ki kpa jong ki, kita ïa kiba la kheiñ kat ka jingkheiñ ki kyrteng jong ki, uwei pa uwei u shynrang baroh naduh arphew snem ka rta bad tam, baroh kat kiba lah ïaleit mih ban ïaleh thma;

²³ ka jingkheiñ jong kita kiba na ka jaid Simeon, ka la long sanphew khyndai hajar laispah.

²⁴ Na ki khun u Gad, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

²⁵ ka jingkheiñ ïa kita kiba na ka jaid Gad, ka la long sawphew san hajar hynriewspah sanphew.

²⁶ Na ki khun u Judah, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

²⁷ ka jingkheiñ ïa kita kiba na ka jaid Judah, ka la long hynñiewphew saw hajar hynriewspah.

²⁸ Na ki khun u Issakhar, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

²⁹ ka jingkheiñ ïa kita kiba na ka jaid Issakhar, ka la long sanphew saw hajar sawspah.

³⁰ Na ki khun u Sabulon, na ka jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

³¹ ka jingkheiñ ïa kita kiba na ka jaid Sabulon, ka la long sanphew hynñiew hajar sawspah.

³² Na ki khun u Joseph, na ki khun u Ephraim, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

³³ ka jingkheiñ ïa kita kiba na ka jaid Ephraim, ka la long sawphew hajar sanspah.

³⁴ Na ki khun u Manasseh, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

³⁵ ka jingkheiñ ïa kita kiba na ka jaid Manasseh, ka la long laiphew ar hajar arspah.

³⁶ Na ki khun u Benjamin, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

³⁷ ka jingkheiñ ïa kita kiba na ka jaid Benjamin, ka la long laiphew san hajar sawspah.

³⁸ Na ki khun u Dan, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

³⁹ ka jingkheiñ ïa kita kiba na ka jaid Dan, ka la long hynriewphew ar hajar hynñiewspah.

⁴⁰ Na ki khun u Asher, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki, naduh arphew snem ka rta bad tam, baroh kat kiba lah ïaleit mih ban ïaleh thma;

⁴¹ ka jingkheiñ ïa kita kiba na ka jaid Asher, ka la long sawphew wei hajar sanspah.

⁴² Na ki khun u Naphtali, ki jingkha pateng jong ki, katba kum ki kur jong ki, na ka ïing ki kpa jong ki, kat ka jingkheiñ ïa ki kyrteng jong ki naduh arphew snem ka rta bad tam, baroh kat kiba lah ïaleit mih ban ïaleh thma;

⁴³ ka jingkheiñ ïa kita kiba na ka jaid Naphtali, ka la long sanphew lai hajar sawspah.

⁴⁴ Kine ki long kita ïa kiba la kheiñ, ïa kiba la kheiñ u Moses bad u Aaron bad ki rangbah ki Israel, kita ki khat-ar ngut keiñ: uwei uwei u la long na ka bynta ka ïing ki kpa jong u.

⁴⁵ Kumta, kita baroh kat kiba la kheiñ na ki khun Israel, katba kum ki ïing ki kpa jong ki, naduh arphew snem ka rta bad tam, baroh ha Israel kat kiba lah ïaleit mih ban ïaleh thma;

⁴⁶ kita keiñ ïa kiba la kheiñ baroh ki la long hynriewspah lai hajar bad sanspah sanphew.

Kaba thung ïa ki Lebi ïa ka ban shakri ïa U Trai

⁴⁷ Hynrei, ïa ki Lebi na ka jaid ki kpa jong ki ym shym la kheiñ hapdeng jong ki.

⁴⁸ Namar ba U la lah kren U Trai ha u Moses, U da ong,

⁴⁹ “Hynrei, wat kheiñ ïa ka jaid Lebi, wat shim ruh ïa ka jingkheiñ ïa ki hapdeng ki khun Israel:

⁵⁰ hynrei, men thung ïa ki Lebi halor Ka Tabernakl ka jingphla, bad halor kiei kiei baroh ki jingbuh jong ka, bad halor kiei kiei baroh kat kiba dei ïa ka: ki keiñ kin ïabah ïa kata Ka Tabernakl, bad ïa kita baroh ki jingbuh jong ka; kin shakri ruh ïa ka, bad kin ïashong baroh sawdong ïa kata Ka Tabernakl.

⁵¹ Te haba kan sa mih Ka Tabernakl, kita ki Lebi kin ïalied noh ïa ka: haba kan sah noh ruh Ka Tabernakl, ki Lebi kin pynïeng ïa ka: te ïa u nongwei uba nud ban wan hajan yn pynïap ïa u.

⁵² Bad ki khun Israel kin ïashong dara, uwei uwei baroh ha la ka jong ka jaka shong dara, bad uwei uwei baroh hapoh la ka jong ka lama, ha ki paidbah jong ki.

⁵³ Hynrei, ki Lebi kin ïashong dara baroh sawdong Ka Tabernakl ka jingphla, ba ka jingbitar kan ym long halor u paidbah ki khun Israel: ki Lebi ruh kin ïa-ap ïa Ka Tabernakl ka jingphla.”

⁵⁴ Bad ki khun Israel ki la leh baroh kat kumba la hukum U Trai ïa u Moses, kumta ki la leh.