JEREMAÏAH 9 - KA BAIBL

¹ A ba ka khlieh jong nga kan da la long ki um, bad ki khmat jong nga ka pukri ki ummat, ba ngan da ïoh ïam synñia sngi na ka bynta kiba la shah pynïap jong ka khun ki briew jong nga!

² A ba ngan da la don ha ri khlaw ka jaka shong basa jong ki nongleit jingleit; ba ngan da ïoh iehnoh ïa ki briew jong nga, bad ban leit noh na ki! Naba ki baroh ki long kiba klim, ka jingïalang ki briew kiba shetkylla.

³ “Bad ki pynkdor ïa la u thylliej kumba u la long ka ryntieh jong ki ïa ka jinglamler; bad ki la man khlaiñ ha ka ri, hynrei, ym na ka bynta ka jingshisha: naba ki nang ïaid na ka basniew sha ka basniew, bad kim ithuh ïa nga,” ong U Trai.

⁴ “To uwei uwei baroh un sumar na la u paramarjan, bad to wat shaniah ha uno uno u para: namar man u para un ïashukor naduh haduh, bad man u paramarjan un ïaid kylleng da ki jingkren siar.

⁵ Bad kin ïashukor man u briew ïa la u paramarjan, bad kin ym kren ïa ka jingshisha: ki la hikai ïa la u thylliej ban kren lamler; ki pynthait ïa lade ban leh bymhok.

⁶ Ka jaka shong jong me ka long hapdeng ka jingshukor; namar ka jingshukor kim treh ban ithuh ïa nga,” ong U Trai.

⁷ Namar kata, kumne u ong U Trai ki paid, “Ha khmih, ngan saiñ ïa ki, bad phrang ïa ki; namar sa kumno pat ngan leh, na ka bynta ka khun ki briew jong nga?

⁸ U thylliej jong ki u long u khnam bapynïap; u kren ïa ka jingshukor: da la u thylliej uwei u kren suk ïa la u paramarjan, hynrei, ha la ka dohnud u ap thap ïa u.

⁹ Hato ngan ym wan-i ïa ki na ka bynta kine kiei kiei?” ong U Trai: “ka mynsiem jong nga kan ym pynhiar kput ïa ka jaid bynriew kum kane?”

¹⁰ “Na ka bynta ki lum bah ngan pynlong ka jingïam bad ka jinglynñiar, bad ïa ka jingsngewsih na ka bynta ki jaka bam phlang ka ri khlaw, naba la wiang duh ïa ki, katba ym don ba ïaid nangta shuh lymne ki briew kim lah ban ïohsngew shuh ïa ka jingpah ki jingri; u sim bneng bad u mrad ruh ki la ïaphet ïap, ki la leit noh.

¹¹ Bad ngan pynlong lymbher tait ïa ka Jerusalem, ka jaka shong ki myrsiang; bad ngan pynlong ka jingkynjah ïa ki shnong ka Judah, bymshong briew shuh.”

Ka jingjynjar bad ka jingpynjot ka ban sa lap

¹² Uei uta u briew u bastad, uba lah ban sngewthuh ïa kane? bad uei uta ha uba ka shyntur U Trai ka la kren, ba u lah ban pynpaw ïa ka? Balei ba ka ri ka la jot bad ba la thang duh kum ka ri khlaw, katba ym don ba ïaid nangta shuh?

¹³ Bad U Trai u ong, “Namar ba ki la lyndet ïa ka hukum jong nga, kaba nga la buh ha khmat jong ki, bad kim shym kohnguh ïa ka ktien jong nga, lymne ïaid ha ka;

¹⁴ hynrei, ki la ïaid katba kum ka jingmutlop ka dohnud jong ki hi, bad katba kum ki Baal, kiba ki kpa jong ki, ki la hikai ïa ki:”

¹⁵ namar kata, kumne u ong U Trai ki paid, U Blei ki Israel, “Ha khmih, ngan bsa ïa ki, ïa kine ki briew keiñ da u 'hur kthang, bad ngan ai ka umksang ïa ki ban dih.

¹⁶ Ngan pynsaphred ruh ïa ki hapdeng ki jaid bynriew, kiba kim shym la ithuh lymne ki kpa jong ki hi ruh: bad ngan phah ïa ka waitlam hadien jong ki, tad ynda nga la bam duh ïa ki.”

¹⁷ Kumne u ong U Trai ki paid, “To pyrkhat phi, bad to phah khot ïa ki kynthei ïambriew ba kin wan; bad phah khot ïa ki kynthei kiba nang, ba kin wan:

¹⁸ bad to kin pynkloi noh, bad pynmih noh ka jingïambriew ïa ngi, ba ki khmat jong ngi kin tuid da ki jingjaw ummat, bad ba kin pynmih um buk ki irmat jong ngi.

¹⁹ Namar la ïohsngew ka jingsawa ka jingïambriew na Seïon, ‘Katno ba la lute ïa ngi! la pynlyngngoh shibun ïa ngi, namar ba ngi la iehnoh noh ïa ka ri, namar ba ki la pynkyllon ïa ki ïingshong jong ngi.’ ”

²⁰ La kumta ruh to sngew ïa ka ktien U Trai, ko phi ki kynthei, bad to kin pdiang ki shkor jong phi ïa ka ktien ka shyntur jong u, bad to hikai ka jingïambriew ïa la ki khun kynthei, bad ka jingrwai sngewsynei kawei kawei ïa la ka paramarjan.

²¹ Naba ka jingïap ka la kiew sha ki jingkhang ïit jong ngi, bad ka la rung sha ki ïingbah jong ngi; ïa ka ban ot noh ïa ki khynnah na shabar, bad ïa ki samla shynrang na ki lynti shnong.

²² To kren, “Kumne u ong U Trai, ‘Ki metïap ki briew kin kyllon kum ka kynsha halor ka khmat ka khyndew, bad kum kata ka shi kham hadien u nongot Kew, te ym don ba khar ïa ki.’ ”

Ban ithuh ïa U Blei ka long kaba kor tam ïa u briew

²³ Kumne u ong U Trai, “Wat ai ba u riewstad un sarong ha la ka jingstad, lymne u bakhrawbor un ym sarong ha la ka bor, u riewspah to un ym sarong ha ki spah jong u:

²⁴ hynrei, uta uba sngewsarong to un sngewsarong ha kane, ba u shemphang, bad ba u ithuh ïa nga, ba nga long U Trai uba leh ïa ka jingleh ieit, ïa ka jingbishar, bad ïa ka hok, ha ka khyndew: naba ha kine kiei kiei nga sngewbha keiñ,” ong U Trai.

²⁵ “Ha khmih, ki sngi kin wan,” ong U Trai, “ha kiba ngan pynshitom ïa kita baroh ba la otsher ha la ka jingbym-otsher;

²⁶ ïa ka Ijipt, bad ïa ka Judah, bad ïa ka Edom, bad ïa ki khun u Ammon, bad ïa ka Moab, bad ïa baroh kat kiba khap ïa ki dong u shñiuh jong ki, kiba shong ha ri khlaw: naba ki jaid bynriew baroh ki long kiba khlem otsher, bad ka ïing Israel baroh ki long ki bym shym la otsher la ka dohnud.”