JEREMAÏAH 8 - KA BAIBL

¹ “Ha kata ka por,” ong U Trai, “kin pynmih noh na ki jingtep jong ki, ïa ki shyieng ki syiem ka Judah, bad ïa ki shyieng jong ki bakhraw batri jong u, bad ïa ki shyieng ki lyngdoh, bad ïa ki shyieng ki nongïathuhlypa, bad ïa ki shyieng ki nong Jerusalem, na ki jingtep jong ki:

² bad kin pynphriang ïa ki ha khmat ka sngi, bad u bnai, bad u paidbah bneng baroh, ïa kiba ki la ieit, bad ïa kiba ki la shakri, bad ïa kiba ki la bud nadien jong ki, bad ïa kiba ki la wad, bad ïa kiba ki la mane; yn ym ïalum ïa ki, lymne tep ïa ki; kin long ka kynsha ha khmat ka khyndew.

³ Yn kham jied ïa ka jingïap ban ïa ka jingim da kiba dang sah baroh kiba sah tam na kane ka jaid bymman, kiba dang sah ha ki jaka baroh sha kiba nga la beh ïa ki,” ong U Trai ki paid.

Ka jingbymman bad ka jingbishar

⁴ Nalor kata, men ong ïa ki, “Kumne u ong U Trai: Ki briew kin kyllon du, bad kin ym ïeng pat? Ju don uwei uba phai noh, bad u bym wan kylla pat?

⁵ Balei te ba une u paidbah Jerusalem u la phai dien da ka jingphaidien kaba junom? Ki bat skhem ïa ka jingshukor, kim treh ban wan kylla pat.

⁶ Nga la sngap bad nga la ïohsngew, hynrei, kim shym la kren kaba dei: ym don uba kylla na ka jingbymman jong u, da kaba ong, ‘Nga la leh aïu?’ Uwei uwei baroh u phai sha la ka lynti, kum u kulai uba tur ruma ha ka thma.

⁷ Shisha, ka thring ha bneng ka tip ïa la ka samoi ba la buh; bad ka lyngdkhur bad ka lyntait bad u sim puh dohkha ki sumar ïa ka por ka jingwan jong ki; hynrei, ki briew jong nga kim tip ïa ki aiñ jong U Trai.

⁸ “Kumno phi ong, ‘Ngi long ki bastad, bad ka hukum U Trai ka don bad ngi?’ Hynrei, ha khmih, u khulom shukor jong ki nongthoh u la trei shukor.

⁹ Ki briew ki bastad ki la lehrain, la pynkhaw-eit bad la kem ïa ki: ha khmih, ki la kyntait ïa ka ktien U Trai; te ka jingstad kaba kumno ka don ha ki?

¹⁰ Namar kata, ïa ki tnga jong ki ngan ai ha kiwei, bad ïa ki lyngkha jong ki ha kita ki ban ïoh ïa ki: naba uwei uwei baroh, naduh u barit tam haduh u bakhraw tam u la aiti ïa lade ha ka jingkwah lalot, naduh u prophet keiñ haduh u lyngdoh, uwei uwei baroh u leh shukor.

¹¹ Bad ki la shu pynkhiah malu mala ïa ka jingmong ka khun ki briew jong nga, ki ïa-ong, ‘Ka Jingsuk, ka jingsuk;’ haba ym don ka jingsuk.

¹² Ki la sngewlehrain ne em ynda ki la lah leh ïa ka jingijli? Em, kim shym la sngewlehrain satia, lymne kim lah ban saw kyr-ang: namar kata, kin kyllon hapdeng kita kiba kyllon: ha ka por ka jingwan-i ïa ki yn pynkyllon noh ïa ki,” ong U Trai.

¹³ “Ngan pynduh khoit ïa ki,” ong U Trai: “kan ym don soh Waiñ halor u dieng Waiñ, lymne soh Dumbur halor u dieng Dumbur, bad u sla un jlop; bad ïa kita kiba nga la ai ha ki kin phet noh na ki.”

¹⁴ Balei ba ngi shu ïashong? To ïalum ïa lade, bad ïa ngin leit rung sha ki shnong ba la ker kynroh, bad ngin ïashong jar hangta: namar U Trai U Blei jong ngi u la pynsngap jar ïa ngi, bad u la ai ha ngi ka umksang ban dih, namar ngi la leh pop ïa U Trai.

¹⁵ Ngi la khmih lynti ïa ka jingsuk, hynrei, ka jingbha ei ei kam shym la wan; bad ïa ka por ka jingkhiah, te ha khmih ka jingkhaw-eit!

¹⁶ “Ïa ka jingkynsnok ki kulai jong u la sngew naduh Dan: ha ka jingsawa ka jingpah kiba khlaiñ jong u ka ri baroh ka khih khynñiuh; naba ki la wan, bad ki la bam duh ïa ka ri bad ïa baroh kaba don ha ka; ïa ka shnong bad kita kiba shong ha ka.

¹⁷ Naba ha khmih, ngan phah ïa ki bseiñ, ki 'seiñpuh, hapdeng jong phi, ïa kiba yn ym pynbieit da ka jadu: bad kin puh ïa phi,” ong U Trai.

Ka jingïambriew na ka bynta ka Judah bad ka Jerusalem

¹⁸ A ba ngan da lah pyntngen ïa lade ïa ka jingsngewsih! Ka dohnud jong nga ka la lwait hapoh jong nga.

¹⁹ Ha khmih, ka jingsawa ka jingpyrta ka khun ki briew jong nga na ka ri kaba jngai eh: “Hato U Trai um don ha Seïon? U Syiem jong ka um don ha ka? Balei ba ki la pynbitar ïa nga da la ki durblei ba la mutdur, bad da ki jingthala ba khyllah?”

²⁰ “Ka aïom ot ka la dier, ka lyiur ka la wai, bad ïa ngi ym shym la pynim.”

²¹ Namar ka jingmong ka khun jong ki briew jong nga la pynmong ïa nga: nga la thangïong; ka jinglyngngoh ka la kem ïa nga.

²² Ym don dawai ha Gilead? Ym don nongpynkhiah hangta? Balei te bym shym la pynbha pat ïa ka jingkhiah jong ka khun ki briew jong nga?