JEREMAÏAH 7 - KA BAIBL

Pynbha ïa ki lynti jong phi bad ïa ki jingleh jong phi

¹ Ka ktien kaba la wan ha u Jeremaïah na U Trai, ka da ong,

² “To ïeng ha ka khyrdop ka ïing U Trai, bad to pynbna hangta ïa kane ka ktien, bad to ong, ‘To sngew ïa ka ktien U Trai, phi ki Judah baroh, kiba wan rung na kine ki khyrdop ban leit mane ïa U Trai.

³ Kumne u ong U Trai ki paid, U Blei ki Israel, Pynbha ïa ki lynti jong phi bad ïa ki jingleh jong phi, te ngan pynsah ïa phi ha kane ka jaka.

⁴ Wat shaniah ha ki ktien shukor, da kaba ong, “Ka templ U Trai, ka templ U Trai, ka templ U Trai, ki long kine.” ’ ”

⁵ “ ‘Naba lada phin pynbha shisha ïa ki lynti jong phi bad ïa ki jingleh jong phi; lada phi leh hok shisha hapdeng u briew bad u paramarjan jong u;

⁶ lada phim banbeiñ ïa u nongwei, ïa u khunswet, bad ïa ka riewkynthei, bad phim pynmih ïa ka snam balui lui ha kane ka jaka, lymne leit bud ïa kiwei pat ki blei ïa ka ban sniew ïa lade:

⁷ kumta te ngan pynsah ïa phi ha kane ka jaka, ha ka ri kaba nga la ai ha ki kpa jong phi, naduh mynbarim haduh ha la ka rta keiñ.

⁸ “ ‘Ha khmih, phi shaniah ha ki ktien shukor, ki bym lah ban pynmyntoi keiñ.

⁹ Phin tuh, pynïap briew, bad klim, bad phin smai lamler, bad phin thang ka jingiwbih ïa u Baal, bad leit bud ïa kiwei pat ki blei kiba phim shym tip,

¹⁰ bad phin wan ïeng ha khmat jong nga ha kane ka ïing, ïa kaba la khot da ka kyrteng jong nga, bad phin ong, “La aiti noh ïa ngi:” khnang ba phin ïoh leh ïa kine ki jingijli?

¹¹ Hato kane ka ïing, ïa kaba la khot da ka kyrteng jong nga, ka la kylla long ka krem nongtuh ha ki khmat jong phi? Ha khmih, ma nga, ma nga hi keiñ, nga la ïohi ïa kane,’ ” ong U Trai.

¹² “Hynrei, to khie leit mynta sha ka jaka jong nga kaba la long ha Sheiloh, ha kaba nga la pynshong ïa la ka kyrteng ha ka banyngkong, bad to khmih aïu nga la leh ïa ka namar ka jingsniew ki briew jong nga ki Israel.

¹³ Mynta te, namar ba phi la leh ïa kine ki jingleh baroh,” ong U Trai, “bad ba nga la kren ha phi, nga da khie dang step bad nga kren, hynrei, phim shym la sngap; bad nga la khot ïa phi, hynrei, phim shym la phai ktien:

¹⁴ namar kata, kumba nga la leh ïa ka Sheiloh, kumta ngan leh ïa kane ka ïing ïa kaba la khot da ka kyrteng jong nga, ha kaba phi shaniah, bad ïa kane ka jaka kaba nga la ai ha phi bad ha ki kpa jong phi.

¹⁵ Bad ngan kyntait noh ïa phi na khmat jong nga, kumba nga la kyntait noh ïa ki para jong phi baroh, u symbai u Ephraim baroh keiñ.”

Ka jingbitar shla U Blei pyrshah ïa ka jingmane bleithaw

¹⁶ “Namar kata, me to wat duwai na ka bynta une u paidbah, lymne wat pynjam ka jingpyrta lane ka jingduwai na ka bynta jong ki, lymne wat pynlong ka jingïasaid ha nga: naba ngan ym sngap ïa me.

¹⁷ Mem ïohi aïu ba ki leh ha ki shnong Judah bad ha ki lynti shnong ka Jerusalem?

¹⁸ Ki khynnah ki ïalum prew, bad ki kpa ki sliew ding, bad ki kynthei ki ïatylliat 'pu im ban shet kpu ïa ka syiem bneng, bad ban theh ka jingainguh dih ïa kiwei pat ki blei, khnang ba kin pankwah ïa nga ban bitar.

¹⁹ Hato ki pankwah ïa nga ban bitar?” ong U Trai; “kim pankwah ïa lade, ïa ka ban pynlehrain ïa ki khmat jong ki hi?”

²⁰ Namar kata, kumne u ong U Trai U Blei: “Ha khmih, ïa ka jingbitar bad ïa ka jingbitar shla jong nga yn theh ïa ki halor kane ka jaka, halor u briew, bad halor u mrad, bad halor ki dieng ka lyngkha, bad halor u soh ka khyndew; te kan meh, bad yn ym pynlip ïa ka.”

Ka jingpynshitom ïa ka Judah namar ka jingïaleh pyrshah jong ka

²¹ Kumne u ong U Trai ki paid, U Blei ki Israel: “Pynlang ïa ki jingainguh thang jong phi ha ki jingkñia jong phi, bad to bam doh.

²² Namar ngam shym la kren ha ki kpa jong phi, lymne hukum ïa ki ha ka sngi ba nga la wallam noh ïa ki na ka ri Ijipt, shaphang ki jingainguh thang lane ki jingkñia:

²³ hynrei, ïa kane nga la hukum ïa ki, nga da ong, ‘To shahshkor ïa ka ktien jong nga, te ngan long U Blei jong phi, bad phin long u paidlang jong nga: bad to ïaid ha ka lynti baroh kaba nga hukum ïa phi, ba kan long bha bad phi.’

²⁴ Hynrei, kim shym la sngap, lymne pyndem ïa la ka shkor, hynrei, ki la ïaid ha la ki jong ki buit bad ha ka jingmutlop ka dohnud bymman jong ki, bad ki la ïaid da dien bad ym sha khmat.

²⁵ Naduh kata ka sngi ba ki kpa jong phi ki la mih noh na ri Ijipt haduh kane ka sngi, nga la phah ha phi ïa ki nongïathuhlypa, ki shakri jong nga baroh, nga da khie dang step ha la ka sngi bad nga phah ïa ki:

²⁶ pynban, kim shym la sngap ïa nga, lymne pyndem ïa la ka shkor, hynrei, ki la pyneh ïa la ka ryndang: ki la leh kham sniew ban ïa ki kpa jong ki.

²⁷ “To men kren ïa kine ki ktien baroh ha ki; hynrei, kin ym shahshkor ïa me: men khot ïa ki ruh; hynrei, kin ym phai ktien ïa me.

²⁸ Te men ong ha ki, ‘Kane ka long kata ka pateng bynriew ka bym shym shahshkor ïa ka ktien U Trai U Blei jong ki, lymne kim shym pdiang ka jinghikai: ka jingshisha ka la duh noh, bad la ot noh ïa ka na ka shyntur jong ki.

²⁹ “ ‘To khap noh ïa la u 'ñiuh khlieh, A Jerusalem, bad bred noh ïa u, bad to leit ïam shalor ki jaka bajrong balyngki; naba U Trai u la kyntait bad u la iehnoh sah ïa ka pateng bynriew ka jingbitar jong u.’

³⁰ “Naba ki khun Judah ki la leh ïa kata ka basniew ha khmat jong nga,” ong U Trai: “ki la buh ïa ki jingijli jong ki ha ka ïing ïa kaba la khot da ka kyrteng jong nga, ban pyntngit sang ïa ka.

³¹ Bad ki la tei ïa ki jaka bajrong jong ka Tophet, kaba don ha ka them u khun u Hinnom, ïa ka ban thang ïa la ki khun shynrang bad kynthei ha ka ding; ïa kaba ngam shym la hukum ma nga, lymne kam ju la jia ha ka dohnud jong nga.

³² Namar kata, ha khmih, ki sngi kin wan,” ong U Trai, “ban ym khot shuh ïa ka, ‘Ka Tophet’, lymne ‘Ka them u khun u Hinnom’, hynrei, ‘Ka them ka Jingpynïap’: naba kin ïatep ha Tophet, haduh bymdon jaka shuh.

³³ Bad ki metïap une u paidbah kin long ka jingbam ïa ki sim bneng, bad ïa ki mrad jong ka khyndew; bad yn ym don mano mano ban pynma ïa ki.

³⁴ Ynda kumta, ngan pynduh noh na ki shnong Judah, bad na ki lynti bah ka Jerusalem, ïa ka jingsawa ka jingrkhie bad ka jingsawa ka jingkmen, ka jingsawa u nongleit-kurim bad ka jingsawa ka nongleit-kurim: naba ka ri kan long khlaw.