JEREMAÏAH 6 - KA BAIBL

Ka jingjot ka Jerusalem bad ka Judah

¹ To phet ïap ban lait im, phi ki khun Benjamin, napdeng ka Jerusalem, bad to put ka turoi ha Tekoa, bad sieh ka lama ha Beth-hakherem: naba ka basniew ka mihpaw na shatei, bad ka jingpynjot ka bakhraw.

² Ïa kaba bhabriew bad kaba subani, ka khun ka Seïon keiñ, ngan pynduh noh.

³ Ki nongaplangbrot lem bad ki kynhun jong ki kin wan sha ka; kin sieh ïa la ki ïing dara pyrshah ïa ka baroh sawdong; kin ïabam uwei uwei baroh ha la ka jaka.

⁴ “To khreh ka thma pyrshah ïa ka; to ïeng joit, bad ïa ngin ïaleit kiew ha ka por pdeng sngi. Kordit ïa ngi! Naba ka sngi ka la noh, naba ki syrngiew ka por janmiet ki la nang jrong.

⁵ To ïeng joit, bad ïa ngin leit ïakiew mynmiet, bad ngin ïa-pynjot ïa ki ïingbah jong ka.”

⁶ Naba kumne u la ong U Trai ki paid, “To khet ki dieng, bad shna kynton pyrshah ïa ka Jerusalem: kane ka long kata ka shnong ïa ka ban wan-i; ka long ka jingbanbeiñ suda hapdeng jong ka.

⁷ Kumba ka pukri ka pynmih noh ïa la ki um, kumta ka pynmih noh ïa la ka jingbymman: kaba leh jubor bad ka jinglute la bna ha ka; ha khmat jong nga borabor ka ju don ka jingpang bad ki jingmong.

⁸ To long kaba la hikai, A Jerusalem, ïoh ba ka mynsiem jong nga kan long nongwei na pha; ïoh ngan pynlong ïa pha ka ri khlaw, ka ri bymshong briew.”

⁹ Kumne u ong U Trai ki paid, “Kin kheit lut ïa kaba sah na ki Israel kum ïa u dieng Waiñ: to suh pat ïa la ka kti kum u nongkhar soh Waiñ sha ki shang.”

¹⁰ Hano ngan kren bad ngan phla, ba kin dup sngew? Ha khmih, ka shkor jong ki ka long khlem otsher, bad kim lah ban sngap: ha khmih, ka ktien U Trai ka la long ha ki ka jingbeiñ; kim don ka jingsngewbha ha ka.

¹¹ Namar kata, nga dap da ka jingbitar shla jong U Trai; nga la ngiah ban kun ha lade. “Ngan theh ïa ka halor ki khynnah ha ki lynti shnong, bad halor ka jingïaseng lang ki samla; naba wat ïa u tnga lem bad ka tnga yn shim noh, ïa uba la ïaw ka rta lem bad uba la dap ki sngi.

¹² Bad ïa ki ïing jong ki yn aiti ha kiwei, ïa ki lyngkha jong ki bad ïa ki tnga jong ki lang: naba ngan kner ïa la ka kti halor kiba shong ha kata ka ri,” ong U Trai.

¹³ “Naba naduh u barit tam na ki wat haduh u bakhraw tam na ki uwei uwei baroh u la aiti ïa lade ha ka jingkwah lalot; bad naduh u prophet wat haduh u lyngdoh uwei uwei baroh u leh shukor.

¹⁴ Ki la pynkhiah thala ruh ïa ka jingmong u paidbah jong nga, ki ïa-ong, ‘Ka jingsuk, ka jingsuk’; haba ym don ka jingsuk.

¹⁵ Ki la lehrain ne em ynda ki la lah leh ïa ka jingijli? Em, kim shym la lehrain satia, lymne kim lah ruh ban saw kyr-ang: namar kata, kin kyllon hapdeng kita kiba kyllon: ha kata ka por ba ngan wan-i ïa ki yn pynkyllon ïa ki,” ong U Trai.

¹⁶ Kumne u ong U Trai, “To ïeng phi ha ki lynti bad to khmih, bad kylli shaphang ki lynti ïaid ki barim, ha kaba don kata ka lynti babha, bad to ïaid ha ka, bad phin shem kaba jahthait ïa ki mynsiem jong phi: hynrei, ki la ong, ‘Ngin ym ïaid ha ka.’

¹⁷ Te nga la thung ki nongap halor jong phi, nga da ong, ‘To sngap ïa ka jingsawa ka turoi;’ hynrei, ki la ong, ‘Ngin ym sngap.’

¹⁸ Namar kata, to sngew phi ki jaid bynriew, bad to tip, A u paidlang, kaei kaba don hapdeng jong ki.

¹⁹ To sngew, A ka khyndew: ha khmih, ngan wallam ka basniew halor une u paidbah, u soh ki jingmut jong ki keiñ, namar kim shym la shahshkor ïa ki ktien jong nga; te shaphang ka hukum jong nga, ki la kyntait ïa ka.

²⁰ Ïa ka ban lei ka wan poi ha nga ka jingiwbih na Sheba, bad u pai bathiang na ka ri ba jngai? Ki jingainguh thang jong phi kim long kiba pdiang hun, lymne ki jingkñia jong phi kiba pynsngewbha ïa nga.

²¹ Namar kata, kumne u ong U Trai, ‘Ha khmih, ngan buh ki jingjynthut ha khmat une u paidbah: bad ki kpa lem bad ki khun kin ïajynthut ha ki; u paramarjan bad u lok jong u kin ïajot.’ ”

²² Kumne u ong U Trai, “Ha khmih, u paidbah u wan na ka ri kaba shatei; bad yn pynkhih ïa ka jaid bynriew kaba khraw na ki phang ki bakut eh ka khyndew.

²³ Ki bat ryntieh bad sum; ki long kiba runar, bad ki bym isynei; ka ktien jong ki ka kyrhuh kum ka duriaw, bad ki shong halor ki kulai; uwei uwei baroh ba la buh ryntih, kum u briew uba hiar thma, ban ïaleh ïa pha, A ka khun ka Seïon.”

²⁴ Ngi la ïohsngew ïa ka nam jong ka; ki kti jong ngi ki la lwait: ka jingpisa ka la kem ïa ngi, bad ka jingshitom kum ka kynthei ha kaba suhkhun.

²⁵ Wat leit mih sha ka lyngkha, lymne wat ïaid kai na ka lynti; naba hangta don ka waitlam u nongshun, bad ka jingma baroh sawdong.

²⁶ “A ka khun u paidbah jong nga, to panpoh ïa lade da ka jaiñ byrni, bad sum ïa lade da ka dpei: pynlong ïa lade ka jingïambriew, kumba na ka bynta u khun marwei, ka jinglynñiar ka bakthang eh; namar u nonglute un lap kyndit ïa ngi.

²⁷ “Nga la pynlong ïa me ka kut, ka kut baskhem hapdeng u paidbah jong nga; ba men dup tip bad tynjuh ïa ka lynti jong ki.

²⁸ Ki long baroh ki nongïaleh kiba pynshitom, kiba da ïaid kylleng da kaba kren siar; ki long ka rnong bad u nar; ki baroh ki leh bymman.

²⁹ Ka kynsok ka pyrsad tyngeh; ïa ka sisa la bam duh da ka ding: kaba lehnohei ba ki nang ïaipynkhuid; naba ïa ki bymman ym shym la rat noh.

³⁰ ‘Ka rupa kyntait’ ki briew kin khot ïa ki, naba U Trai u la kyntait ïa ki.”