JEREMAÏAH 52 - KA BAIBL

Ka jingsynshar u Sedekaïah

¹ U Sedekaïah u la long arphew wei snem ka rta haba u la sdang ban synshar; bad u la synshar khatwei snem ha Jerusalem: te ka kyrteng ka kmie jong u ka la long “ka Hamutal” ka khun u Jeremaïah na Libnah.

² Te u la leh ïa kata ka basniew ha khmat U Trai, kat kum ïa baroh ba u la leh u Jehoïakim.

³ Naba da ka jingbitar U Trai, kata ka la wan jia ha Jerusalem bad ha Judah, tad ynda u la shop noh shabar ïa ki na khmat jong u: Bad u Sedekaïah u la ïaleh pyrshah ïa u syiem ka Babilon.

Kaba jop ïa ka Jerusalem

⁴ Te ha ka bakhyndai snem ka jingsynshar jong u, ha u bnai bashiphew, ha ka bashiphew sngi jong u bnai, u Nebukhadressar u syiem ka Babilon u la wan, ma u bad u paidïapom jong u baroh, ban ïaleh ïa ka Jerusalem, bad u la shong dara ban ïaleh ïa ka; bad ki la tei ki kut ban ïaleh ïa ka baroh sawdong.

⁵ Kumta, la ker kut ïa ka shnong haduh ka bakhatwei ka snem jong u syiem Sedekaïah.

⁶ Ha u bnai u basaw, ha ka bakhyndai sngi jong u bnai, ka 'nemsniew ka la jur ha ka shnong, haduh bymdon kpu shuh ïa ki briew jong ka ri.

⁷ Ha kata, la pynlong ka jingpynpra ha ka shnong, te ki nongïapom baroh ki la phet ïap, bad ki la leit mih noh na shnong mynmiet na ka lynti ka khyrdop hapdeng ki ar kynroh, kaba hajan ka kper u syiem; (te ki Khaldi ki la don pyrshah ïa ka shnong baroh sawdong:) bad ki la leit na ka lynti ka Arabah.

⁸ Hynrei, u paidïapom ki Khaldi ki la beh nadien u syiem, bad ki la lap ïa u Sedekaïah ha ki madan Jerikho; te ïa u paidïapom jong u baroh la pynsakma noh na u.

⁹ Ynda kumta, ki la kem ïa u syiem, bad ki la lam artet ïa u ha u syiem ka Babilon sha Riblah ha ka ri Hamath; u ruh u la ai ka jingbishar halor jong u.

¹⁰ Te u syiem ka Babilon, u la pynïap ïa ki khun shynrang u Sedekaïah ha pyrshah ki khmat jong u: u la pynïap ruh ïa ki rangbah Judah baroh ha Riblah.

¹¹ Bad u la khlaw noh ïa ki khmat u Sedekaïah; bad u syiem ka Babilon, u la khum ïa u da ki kynjri, bad u la leit lam ïa u sha Babilon, bad u la set phatok ïa u haduh ka sngi ka jingïap jong u.

Ka jingpynjot ïa ka Jerusalem

¹² Te ha u bnai u basan, ha ka bashiphew sngi jong u bnai, kaba la long khatkhyndai snem jong u syiem Nebukhadressar u syiem ka Babilon, u la wan u Nebusaradan u kaptan ka karod, uba ïeng ha khmat u syiem ka Babilon, sha Jerusalem:

¹³ bad u la thang ïa ka ïing U Trai, bad ïa ka ïing u syiem; bad ïa ki ïing ka Jerusalem baroh, ïa ka ïing bakhraw baroh keiñ, u la thang da ka ding.

¹⁴ Bad u paidïapom baroh jong ki Khaldi, uba la don bad uta u kaptan ka karod, u la pynpra noh ïa ki kynroh baroh ki jong ka Jerusalem baroh sawdong.

¹⁵ Hadien kata, u Nebusaradan u kaptan jong ka karod u la ring mraw noh ïa kiba na kiba kham poh jong u paidbah, bad ïa kiba dang sah jong u paidbah ïa kiba la pynsah ha ka shnong, bad ïa kita kiba la kynriah noh, kiba la kynriah sha u syiem ka Babilon, bad ïa kiba dang sah jong u paidbah.

¹⁶ Hynrei, u Nebusaradan u kaptan jong ka karod u la pynsah katto katne kiba kham duk jong ka ri ban long ki nongtrei dieng Waiñ bad ki nongrep.

¹⁷ Bad ïa kita ki rishot rnong kiba la don ha ka ïing U Trai, bad ïa ki jingpynshong, bad ïa ka duriaw rnong kiba la don ha ka ïing U Trai, ki Khaldi ki la pynkheiñ lyngkhot lyngkhot bad ki la leit lam noh ïa ka rnong jong ki baroh sha Babilon.

¹⁸ Ïa ki khiew ruh, bad ki siang khat dpei, bad ki jinglur sharak, bad ki khuri, bad ki siang, bad ïa ki pliang rnong baroh da kiba ki la ju shakri, ki la shim noh.

¹⁹ Bad ïa ki bati, bad ki pliang dieng, bad ki khuri, bad ki khiew, bad ki dieng pynïeng sharak, bad ki siang, bad ïa ki khuri piala; kata kaba da ka ksiar, ha ka ksiar, bad kata kaba da ka rupa, ha ka rupa, uta u kaptan ka karod u la shim noh.

²⁰ Ïa kita ki rishot ar tylli, ïa kata ka duriaw kawei, bad ïa kita ki masi kyrtong rnong khat-ar tylli kiba la don hapoh kita ki jingpynshong, ïa kiba u syiem Solomon u la thaw ïa ka ïing U Trai: ka rnong jong kine ki pliang baroh ka la long khlem jingthew.

²¹ Te shaphang kita ki rishot, ka jingjrong jong uwei u rishot ka la long khatphra pruh; bad u ksai u bakhat-ar pruh u kot baroh sawdong ïa u; bad ka jingrben jong u ka la long saw kti: u la long thliew.

²² Bad ka khlieh kaba da ka rnong ka la long halor jong u; te ka jingjrong jong kawei ka khlieh ka la long san pruh lem bad ka jingthain jar bad ki soh Pong halor kata ka khlieh baroh sawdong, baroh da ka rnong: bad uta u rishot u ba-ar u la don kum kine bad ki soh Pong de.

²³ Te ki la don khyndaiphew hynriew ki soh Pong halor ka khmat; baroh ki soh Pong ki la long shispah tylli halor ka jingthain jar baroh sawdong.

²⁴ Bad uta u kaptan ka karod u la shim ïa u Seraïah u rangbah lyngdoh, bad u Sephanaïah u lyngdoh uba bud, bad ïa kita lai ngut ki nongsumar ka jingkhang:

²⁵ bad na ka shnong u la shim ïa u sordar ïa uba la buh halor ki nongïapom; bad hynñiew ki rangbah na kita kiba ju ïohi ïa ka khmat u syiem, ïa kiba la shem ha ka shnong; bad ïa u nongthoh jong u kaptan u paidïapom, uba ju lum lang ïa ki briew jong ka ri; bad hynriewphew ki rangbah na ki bri jong ka ri, ïa kiba la shem hapdeng ka shnong.

²⁶ Bad u Nebusaradan u kaptan ka karod u la shim ïa ki, bad u la wallam ïa ki sha u syiem ka Babilon ha Riblah.

²⁷ Te u syiem ka Babilon u la pom ïa ki bad u la pynïap ïa ki ha Riblah ha ka ri Hamath. Kumta, la ring mraw noh ïa u Judah na la ka ri.

²⁸ Kine ki long kita ki briew ïa kiba u Nebukhadressar u la ring mraw: ha ka bahynñiew snem, lai hajar bad arphew lai ngut ki Jiw:

²⁹ ha ka bakhatphra snem jong u Nebukhadressar u la ring mraw na Jerusalem, phraspah laiphew ar ngut ki briew:

³⁰ ha ka ba-arphew lai snem jong u Nebukhadressar, u Nebusaradan u kaptan ka karod u la ring mraw na ki Jiw, hynñiewspah sawphew san ngut ki briew: ki briew baroh ki la long saw hajar hynriewspah.

La kyntiew burom ïa u Jehoïakhin

³¹ Ka la jia ha ka balaiphew hynñiew snem na ka jinglongmraw u Jehoïakhin u syiem ka Judah, ha u bnai u bakhat-ar, ha ka ba-arphew san tarik jong u bnai, ba u Ebil-merodak u syiem ka Babilon, ha ka snem ka banyngkong ka jingsynshar jong u, u la pynïeng ïa ka khlieh jong u Jehoïakhin syiem ka Judah, bad u la pynmih noh ïa u na ka ïing byndi;

³² bad u la kren ieit ïa u, bad u la buh ïa ka khet jong u halor ki khet jong ki syiem kiba la don ryngkat bad u ha Babilon.

³³ Bad u la bujli ïa ki jaiñ byndi jong u, bad u la bam kpu ha khmat jong u ha la ka sngi baroh ki sngi ka rta jong u.

³⁴ Bad shaphang ka jingïoh jong u, la don ka jingïoh kaba borabor ba la ai ïa u na u syiem ka Babilon, ka bynta ha la ka sngi ka sngi haduh ka sngi ka jingïap jong u, baroh ki sngi ka rta jong u.