JEREMAÏAH 51 - KA BAIBL

Ka jingbishar U Blei ïa ka Babilon

¹ Kumne u ong U Trai: “Ha khmih, ngan pynmih ïa ka lyer bapynjot pyrshah ïa ka Babilon, bad pyrshah ïa kita kiba shong ha Lebkamai.

² Bad ngan phah ïa ki nongwei sha Babilon, ki ban peh ïa ka; bad kin pynsuda ïa ka ri jong ka: naba ha ka sngi ka jingjynjar kin long pyrshah ïa ka baroh sawdong.

³ Wat ai ïa u nongsiat khnam ban wiat ïa la ka ryntieh, bad wat ai ba un pynkyntiew ïa lade ha la ka sopti nar: bad wat riej ïa ki samla jong ka; to pynduh noh khoit ïa u paidïapom jong ka baroh.

⁴ Te kin kyllon ïap ha ka ri ki Khaldi, bad yn dung peib'la ïa ki ha ki lynti shnong jong ka.

⁵ Naba lymne ïa u Israel, lymne ïa u Judah, ym shym la iehnoh da U Blei jong u, da U Trai ki paid; la ka ri jong ki ka shlei da ka pop pyrshah ïa uta U Bakhuid jong u Israel.

⁶ “To phet noh napdeng ka Babilon, bad man u briew to un pynim ïa la ka jingim; wat ai ba yn ot noh ïa phi ha ka jingbymhok jong ka: naba ka dei ka por ka jingpynhiar kput U Trai; un siew ha ka, ïa ka kput.

⁷ Ka Babilon ka la long ka khuri ksiar ha ka kti U Trai, kaba la pynbuaid ïa ka khyndew baroh: ki jaid bynriew ki la dih na ka Waiñ jong ka; namar kata, ki jaid bynriew ki lamwir.

⁸ Ka Babilon ka la kyllon kyndit bad la pynjot ïa ka: to lynñiar namar jong ka; shim ka dawai balm ïa ka jingpang jong ka, ban khmih la kan koit ne em.

⁹ ‘Ngi la kwah ban pynkoit ïa ka Babilon, hynrei, kam shym koit: to iehnoh noh ïa ka, bad to ngin ïaleit uwei uwei baroh sha la ka ri hi: namar ka jingshitom jong ka, ka kot haduh bneng, bad la pynkyntiew ïa ka haduh ka suiñ.’

¹⁰ ‘U Trai u la pynmih noh ïa ka hok jong ngi: ale, to ngin ïa-pynbna ha Seïon ïa ka kam U Trai U Blei jong ngi.’

¹¹ “ ‘To pynnep ïa ki khnam; bat skhem ïa ki stieh:’ “U Trai u la pynkhih ïa ka mynsiem jong ki syiem ki Mid; namar ka jingthmu jong u ka long ban ïaleh ïa ka Babilon, ban pynjot ïa ka: namar ka long ka jingpynhiar kput jong U Trai, ka jingpynhiar kput ka templ jong u keiñ.

¹² “ ‘To pynïeng ïa ka lama pyrshah ïa ki kynroh ka Babilon, pynkhlaiñ ïa ka jingap, buh ïa ki nongap, to khreh ïa ki ban ker kdong: naba U Trai u la thmu, u la leh ruh ïa kaba u la kren shaphang kiba shong ha Babilon.’

¹³ Ko pha kaba shong halor bun ki um, kaba kyrhai ki jingkynshew, ka bakut jong pha ka la wan, ka jingthew ka jingkhwan jong pha keiñ.

¹⁴ U Trai ki paid u la smai da lade, u da ong, ‘Da shisha, ngan pyndap ïa pha da ki briew, kum da u 'ñiangdkoh; bad kin pynmih ka jingkynha pyrshah ïa pha.’ ”

¹⁵ U la pynlong ïa ka khyndew da la ka bor, u la pynskhem ïa ka pyrthei da la ka jingstad, bad da la ka jingshemphang u la pynïar ïa ka bneng:

¹⁶ haba u pynmih ïa la ka ktien, don kaba win ki um ha ki bneng, bad u pynkyntiew ïa ki jynhaw na ki bakut ka khyndew; u pynlong ki leilieh ïa u slap, bad u pynmih noh ïa ki lyer na ki jaka kynshew jong u.

¹⁷ U briew baroh u la kylla bieit bad u long khlem ka jingtip; ïa u bania baroh la pynlehrain da ka durblei ba la mut jong u: naba ka durblei ba la saiñ jong u ka long lamler, bad ym don mynsiem ha ki.

¹⁸ Ki long ka jingthala, ka jingtrei ka jingshukor: ha ka por ka jingwan-i jong ki kin duh noh.

¹⁹ Ka bynta u Jakob kam long kum kine; naba u long u nongthaw ïa kiei kiei baroh; bad u Israel u long ka jaid ka jingïoh kynti jong u: “U Trai ki paid” long ka kyrteng jong u.

²⁰ “Pha long u sdie ïapom bad ki atiar ïaleh thma jong nga: bad da pha ngan pynlwet ïa ki jaid bynriew; bad da pha ngan pynjot ïa ki hima;

²¹ bad da pha ngan pynlwet ïa u kulai bad ïa u nongshong jong u; bad da pha ngan pynlwet ïa ka kali ïapom bad ïa uta uba shong ha ka;

²² bad da pha ngan pynlwet ïa u rangbah bad ïa ka kynthei; bad da pha ngan pynlwet ïa u tymmen bad ïa u samla; bad da pha ngan pynlwet ïa u samla bad ïa ka samla;

²³ bad da pha ngan pynlwet ïa u nongaplangbrot bad ïa ka kynhun jong u; bad da pha ngan pynlwet ïa u nongrep bad ïa ki masi jong u shi lyngkor; bad da pha ngan pynlwet ïa ki nongsynshar bad ïa ki deputi.

²⁴ “Bad ngan pynhap halor ka Babilon bad halor baroh kiba shong ha ka ri Khaldi ïa ka jingsniew baroh kaba ki la leh ha ka Seïon ha khmat jong phi,” ong U Trai.

²⁵ “Ha khmih, nga long pyrshah ïa me, ko lum bapynjot, uba pynjot ïa ka khyndew baroh,” ong U Trai: “bad ngan kner ïa la ka kti halor jong me, bad ngan pyntyllun arsut ïa me na ki mawsiang, bad ngan pynlong ïa me u lum ba la thang noh.

²⁶ Bad kin ym shim maw na me ïa ka dong, lymne maw ïa ki nongrim; hynrei, men long ka jingkynjah junom,” ong U Trai.

²⁷ “To pynïeng ïa ka lama ha ka ri, put ïa ka turoi hapdeng ki jaid bynriew, to khreh ïa ki jaid bynriew ban ïaleh ïa ka, khot lang ban ïaleh ïa ka, ïa ki hima Ararat, Minni, bad Ashkenas: to thung u nongïalam ban ïaleh ïa ka: pynmih artet ïa ki kulai kum u 'ñiangdkoh ba don treng.

²⁸ To khreh ïa ki jaid bynriew ban ïaleh ïa ka, ïa ki syiem jong ki Mid, ïa ki nongsynshar jong ki, bad ïa baroh ki deputi jong ki, bad ïa ka ri ka jingsynshar jong u baroh.

²⁹ Te ka ri ka khynñiuh bad ka pang suh: naba ki jingthmu U Trai pyrshah ïa ka Babilon ki ïeng, ïa ka ban pynlong ka jingkynjah ïa ka ri Babilon, ka bymshong briew keiñ.

³⁰ Ki riewkhlaiñ ka Babilon ki la wai noh ban ïaleh, ki shu sah ha la ki kut; ka bor jong ki ka la duh; ki la kylla kum ki kynthei: ïa ki jaka shong jong ka la wiang ding; ïa ki dieng jingkhang jong ka la kdiah noh.

³¹ Uwei u nongphet-dak un mareh ban ïashem ïa uwei pat, bad uwei u nonglam-ktien ban ïashem ïa uwei pat, ban ïathuh ïa u syiem ka Babilon ba la jop ïa ka shnong jong u baroh sawdong:

³² ïa ki jaka ryngkang la jop klep, bad ïa ki khah, ki la thang da ka ding, bad ïa ki nongïapom la pynsheptieng noh her.

³³ Naba kumne u ong U Trai ki paid, U Blei ki Israel: ‘Ka khun ka Babilon ka long kum ka kyntem ha ka por haba ïuh ïa ka; sa tang khyndiat pat te ka aïom ot jong ka kan wan ïa ka.’ ”

³⁴ “U Nebukhadressar u syiem ka Babilon u la bam duh ïa nga, u la tylliat ïa nga, u la pynlong u khiew suda ïa nga, u la nguid ïa nga kum u ïakjakor, u la pyndap ïa la ka kpoh da ki jingbam babang jong nga; u la shop noh shabar ïa nga.

³⁵ Kata ka jingleh-jubor ïa kaba la leh ïa nga bad ïa ka doh jong nga to kan long halor ka Babilon,” un ong uta uba shong ha Seïon; bad, “Ka snam jong nga to kan long halor kiba shong ha ka ri Khaldi,” kan ong ka Jerusalem.

³⁶ Namar kata, kumne u ong U Trai: “Ha khmih, ngan ïasaid ïa ka kam jong me, ngan pynhiar kput na ka bynta jong me; bad ngan pynrngad ïa ka duriaw jong ka, bad ngan pynrngad ïa ka pukri jong ka.

³⁷ Bad ka Babilon kan long ki lymbher, ka jaka shong ki myrsiang, ka jinglyngngoh, ka jingkynshi, ka bymshong briew.

³⁸ “Kin ïakyrhuh lang kum ki sing samla: kin ïabyrngem kum ki khun sing.

³⁹ Haba ki la shit, ngan khreh ka jingkhawai ïa ki, bad ngan pynbuaid ïa ki, ba kin ïashadkmen, bad ba kin thiah noh junom, bad ba kin ym peit shuh,” ong U Trai.

⁴⁰ “Ngan ïalam arsut ïa ki kum ki khun blang sha ka jingpynïap, kum ki 'lang shynrang bad ki 'lang sohmoh.

⁴¹ “Kumno ba la jop ïa ka Sheshak! bad kumno ba la pynlyngngoh ïa ka jingïaroh ka khyndew baroh! kumno ba ka Babilon ka la kylla ka jingkynjah hapdeng ki jaid bynriew!

⁴² Ka duriaw ka la wan kiew halor ka Babilon: la tap lup ïa ka da ki jingbun ki jingat phyllung jong ka.

⁴³ Ki shnong jong ka ki la kylla ka jingkynjah, ka 'dewryngkhiang, bad ka ri shyiap, ka ri ha ka bymshong briew, lymne ym don u khun u briew uba ïaid hajan jong ka.

⁴⁴ Bad ngan leh ïa ka jingbishar halor u Bel ha Babilon, bad ngan ai noh na ka shyntur jong u ïa kata kaba u la nguid; bad ki jaid bynriew kin ym tuid lang shuh ha u: shisha, ka kynroh ka Babilon kan kyllon noh.

⁴⁵ “Khie leit mih noh napdeng jong ka, ko phi ki briew jong nga, bad uwei uwei baroh to pynim ïa lade na ka jingbitar lep ka jong U Trai.

⁴⁶ Bad wat ai kan sngewlwait ka dohnud jong phi, lymne wat sheptieng phi ïa ka jingbna kaba phin ïohsngew ha ka ri; naba ka jingbna kan wan ha kawei ka snem, bad hadien kata ruh, ka jingbna ha kawei pat ka snem, bad ka jingleh-jubor ha ka ri, u nongsynshar u ïaleh ïa u nongsynshar.

⁴⁷ “Namar kata, ha khmih, ki sngi kin wan, ba ngan leh ïa ka jingbishar halor ki durblei ba la mut jong ka Babilon, bad ka ri jong ka baroh kan lehrain; bad baroh ïa kiba la pynïap jong ka kin kyllon hapdeng jong ka.

⁴⁸ Ynda kumta, ka bneng bad ka khyndew, bad baroh kat kiba don ha ki, kin rwai namar bakmen halor ka Babilon; naba ki nonglute kin wan sha ka na shatei,” ong U Trai.

⁴⁹ Kumba ka Babilon ka la pynkyllon ïa kiba la shah pynïap jong ki Israel, kumta ha Babilon kin kyllon kita ïa kiba la pynïap jong ka ri baroh.

⁵⁰ Phi kiba la lait na ka waitlam, khie leit phi, wat sangeh; to kynmaw ïa U Trai na sha jngai, bad to kan wan ka Jerusalem ha ka jingkynmaw jong phi.

⁵¹ La pynlehrain ïa ngi, namar ngi la ïohsngew ïa ka jingkrenbeiñ; ka jinglehrain ka la tap ïa ki khmat jong ngi: naba ki nongwei ki la wan ha ki jaka kyntang ka ïing U Trai.

⁵² “Namar kata, ha khmih, ki sngi kin wan,” ong U Trai, “ba ngan leh ïa ka jingbishar halor ki durblei ba la mut jong ka; bad ha ka ri jong ka baroh kiba la mynsaw kin ud.

⁵³ La ka Babilon kan kiew sha bneng, bad la kan pynskhem ïa ka jingjrong ka bor jong ka, pynban, ki nonglute na nga kin poi sha ka,” ong U Trai.

⁵⁴ “Ka jingsawa ka jinglynñiar na Babilon, bad ka jong ka jingpynjot bakhraw na ka ri ki Khaldi!

⁵⁵ naba U Trai u lute ïa ka Babilon, bad u pynjot noh na ka ïa kata ka jingsawa kaba jam; bad ki jingat phyllung jong ki, ki kyrhuh kum shibun ki um, ïa ka jingriew ka jingsawa jong ki la pynmih:

⁵⁶ naba u nonglute u la wan lap ïa ka, ïa ka Babilon keiñ, bad ïa ki riewkhlaiñ jong ka la kem, ïa ki ryntieh jong ki la pynkheiñ lyngkhot lyngkhot: naba U Trai u long U Blei ki jingleh kylliang, da shisha un leh kylliang.

⁵⁷ Bad ngan pynbuaid ïa ki rangbah jong ka bad ïa ki riewstad jong ka, ïa ki nongsynshar jong ka bad ïa ki deputi jong ka, bad ïa ki riewkhlaiñ jong ka; bad kin thiah ïa ka jingïohthiah kaba ha la ka rta, bad kin ym peit shuh,” ong U Syiem uba ka kyrteng jong u long “U Trai ki paid.”

⁵⁸ Kumne u ong U Trai ki paid: “Ïa ki kynroh kiba rben ka Babilon yn pynkyllon noh khoit, bad ïa ki khyrdop bajrong jong ka yn thang da ka ding; bad ki kynja bynriew kin trei minot ïa ka jingthala, bad ki jaid bynriew ïa ka ding; te kin sngewthait noh.”

⁵⁹ Ka ktien kaba u Jeremaïah u nongïathuhlypa u la hukum ïa u Seraïah u khun u Neraïah, u khun u Maaseïah, haba u la leit bad u Sedekaïah u syiem ka Judah sha Babilon ha ka basaw snem ka jingsynshar jong u. Te u Seraïah u la long u ïunok rangbah.

⁶⁰ Bad u Jeremaïah u la thoh ha ka kitab, ïa ka jingsniew baroh ka ban wan halor ka Babilon, ïa kine ki ktien baroh keiñ kiba la thoh shaphang ka Babilon.

⁶¹ Bad u Jeremaïah u la ong ha u Seraïah, “Ynda me poi sha Babilon, kumta te to khmih ba men pule ïa kine ki ktien baroh,

⁶² bad to ong, ‘A Trai, me la kren shaphang kane ka jaka, ban ot noh ïa ka, ba yn ym don ba shong ha ka, lymne briew lymne mrad, hynrei, ba kan long ka jingkynjah ha la ka rta.’

⁶³ Te kan long, haba me la dep ban pule ïa kane ka kitab, ba men teh ïa u maw ha ka, bad men bred ïa ka hapdeng ka Ïuphratis:

⁶⁴ bad men ong, ‘Kumne ka Babilon kan ngam bad kan ym mih shuh namar kata ka jingsniew ïa kaba ngan wallam halor jong ka: te kin sngewthait noh.’ ” Haduh kane, ki long ki ktien u Jeremaïah.