JEREMAÏAH 50 - KA BAIBL

Ka jingïathuhlypa shaphang ka Babilon

¹ Ka ktien kaba U Trai u la kren shaphang ka Babilon, shaphang ka ri ki Khaldi, da u Jeremaïah u nongïathuhlypa.

² “To ïathuh phi hapdeng ki jaid bynriew bad to pynbna, bad to pynïeng ïa ka lama; to pynbna, bad wat buhrieh: to ong, ‘Ïa ka Babilon la jop, ïa u Bel la pynlehrain, u Merodak u la khaw-eit; ïa ki dur jong ka la pynlehrain, ki durblei jong ka ki la khaw-eit.’

³ “Naba na shatei ka wan kiew ka jaid bynriew ban ïaleh ïa ka, ka ban pynkynjah ïa ka ri jong ka, bad ym don u ban shong ha ka: ki la phet noh, ki la leit noh bad briew bad mrad.

⁴ “Ha kita ki sngi, bad ha kata ka por,” ong U Trai, “ki khun Israel kin wan, ma ki bad ki khun Judah lang; kin ïaleit la ka lynti ïaïam artad, bad kin wad ïa U Trai U Blei jong ki.

⁵ Kin ïakylli shaphang ka Seïon bad la ki khmat shaphang shata, kin ong, ‘Ale phi, bad to pynïasoh ïa lade ha U Trai ha ka jutang kaba junom ïa ka ban ym klet shuh.’

⁶ “Ki briew jong nga ki la long ki langbrot ba la jah noh: ki nongaplangbrot jong ki, ki la pynsakma ïa ki, ki la pyllait lyngkar ïa ki ha ki lum: ki la leit na u lum bah sha u lum rit, ki la klet ïa la ka jaka dem.

⁷ Baroh kat kiba shem ïa ki, ki la bam duh ïa ki: bad ki nongïaleh pyrshah jong ki, ki la ong, ‘Ngim shym leh palat, namar ki la leh pop ïa U Trai, ka jaka shong ka hok, U Trai hi keiñ, uba ka jingkyrmen ki kpa jong ki.’

⁸ “To phet noh napdeng ka Babilon bad to leit mih noh na ka ri ki Khaldi, bad to long kum ki 'lang sohmoh ha shuwa ki kynhun.

⁹ Naba ha khmih, ngan pynkhie bad ngan ïalam artet ban ïaleh ïa ka Babilon ïa ka jingïalang ki jaid bynriew kiba khraw na ka ri shatei: bad kin buh riang ïa lade ban ïaleh ïa ka; nangta yn sa jop ïa ka: ki khnam jong ki kin long kum ki jong u riewkhlaiñ uba nang; ym don u ban wan phai lehnohei.

¹⁰ Bad ka Khaldea kan long ka jinglute: baroh kiba lute ïa ka kin sngewhun,” ong U Trai.

¹¹ “Namar ba phi kmen, namar ba phi shadkmen, ko phi kiba lute ïa ka jingïoh kynti jong nga, namar ba phi leh lyngkar kum ka masi lud kaba ïuh Kew, bad phi pah kum ki kulai bakhlaiñ;

¹² ka kmie jong phi kan lehrain sat; kata kaba la kha ïa phi kan lyngngoh: ha khmih, kan long ka bakhatduh eh na ki jaid bynriew, ka khlaw, ka ri ryngkhiang, bad ka ri shyiap.

¹³ Namar ka jingbitar U Trai yn ym shong briew ha ka, hynrei, kan long kaba kynjah phar: uwei uwei baroh uba ïaid hajan ka Babilon un sngewlyngngoh, bad un kynshi ha ki jingshitom jong ka baroh.

¹⁴ To buh riang ïa lade baroh sawdong ïa ka Babilon, phi baroh kiba wiat ïa ka ryntieh; to siat sha ka, wat bynnud ïa ki khnam: namar ka la leh pop ïa U Trai.

¹⁵ To kynha pyrshah ïa ka baroh sawdong; ka la pynkohnguh ïa lade; ki kynroh ïada jong ka ki la hap, ïa ki kynroh jong ka la pynkyllon: namar ka long ka jingpynhiar kput U Trai; to pynhiar kput halor jong ka; kumba ka, ka la leh, to leh ïa ka.

¹⁶ To ot noh ïa u nongbet na Babilon, bad ïa uta uba bat ïa ka rashi ha ka aïom ot: namar ba sheptieng ïa ka waitlam babanbor kin phai uwei uwei baroh sha la ki briew, bad kin phet ïap noh uwei uwei baroh sha la ka jong ka ri.

¹⁷ “U Israel u long ka langbrot ba la sakma; ki sing ki la beh noh ïa u: nyngkong u syiem ka Assyria u la bam ïa u: bad ka bakhatduh une u Nebukhadressar u syiem ka Babilon u la pynkheiñ ïa ki shyieng jong u.

¹⁸ Namar kata, kumne u ong U Trai ki paid, U Blei ki Israel: ‘Ha khmih, ngan pynshitom ïa u syiem ka Babilon bad ïa ka ri jong u, kumba nga la pynshitom ïa u syiem ka Assyria.

¹⁹ Bad ngan wallam pat ïa u Israel sha ka jaka phlang jong u, bad un bam phlang halor u Karmel bad u Bashan, bad yn pynkdang ïa ka mynsiem jong u halor ki lum Ephraim bad ha ka Gilead.

²⁰ Ha kita ki sngi, bad ha kata ka por,’ ” ong U Trai, “yn wad noh ïa ka jingbymhok jong ki Israel, te kan ym don shuh; bad ïa ki pop ki Judah, te yn ym shem ïa ki: naba ngan map noh ïa kita kiba ngan iehnoh kum i bynta ba sah.

²¹ “Khie leit kiew ban ïaleh ïa ka ri Merathaim, ban ïaleh ïa ka keiñ, bad ban ïaleh ïa kiba shong ha Pekod: to pynïap bad to pynjot hadien jong ki,” ong U Trai, “bad to leh baroh kat kumba nga la hukum ïa me.

²² Ka jingsawa ka thma ka don ha ka ri, bad ka jong ka jingpynjot bakhraw.

²³ Kumno ba la pait ar liang bad ba la pynkheiñ ïa u 'nembah ka khyndew baroh! kumno ka Babilon ka la wan long ka jingkynjah hapdeng ki jaid bynriew!

²⁴ Nga la buh ka jingriam ïa pha, bad pha la ngat ruh, ko Babilon, te pham shym la tip: la shem ïa pha, bad pha la ngat ruh, namar ba pha la ïaleh pyrshah ïa U Trai.

²⁵ U Trai u la plie ïa la ka ïing buh atiar, bad u la sei noh ïa ki atiar ka jingbitar shla jong u: naba U Trai, U Trai ki paid, u don ka kam ban leh ha ka ri ki Khaldi.

²⁶ Ale ban ïaleh ïa ka na ki pud bakut eh, to plie ïa ki ïing jingkynshew jong ka: to kynton ïa ka kum ki lymbher, bad to pynjot noh khoit ïa ka: wat pynsah ei ei na ka.

²⁷ Pynïap ïa ki masi dab jong ka baroh; to kin hiar sha ka jingpynïap: kordit ïa ki! naba ka sngi jong ki ka la wan, ka por ka jingwan-i jong ki.”

²⁸ Ka jingsawa jong kita kiba phet noh bad ba phet ïap na ka ri Babilon, ïa ka ban pynbna ha Seïon ïa ka jingpynhiar kput jong U Trai U Blei jong ngi, ka jingpynhiar kput ka templ jong u.

²⁹ “To lum lang ïa ki nongsiat khnam ban ïaleh ïa ka Babilon, ïa kita baroh kiba wiat ïa ka ryntieh; to sher dara ban ïaleh ïa ka baroh sawdong; wat ai ban lait mano mano na ki: to siew kylliang ïa ka katba kum ka kam jong ka; katba kum kaba ka la leh baroh, to leh ïa ka: naba ka la long kaba sarong pyrshah ïa U Trai, pyrshah ïa uta U Bakhuid jong u Israel.

³⁰ Namar kata, ki samla jong ka kin kyllon ha ki lynti shnong jong ka, bad ïa ki nongïapom jong ka baroh yn pynjar jar ha kata ka sngi,” ong U Trai.

³¹ “Ha khmih, nga long pyrshah ïa pha, ko pha kaba sarong,” ong U Trai U Blei ki paid: “naba ka sngi jong pha ka la wan, ka por kaba ngan wan-i ïa pha.

³² Bad uta uba sarong un jynthut bad un kyllon, bad ym don u ban pynïeng ïa u: bad ngan pynmeh ding ha ki shnong jong u, bad kan bam duh ïa baroh kiba baroh sawdong ïa u.”

³³ Kumne u ong U Trai ki paid: “Ïa ki khun Israel bad ki khun Judah la banbor lang: bad kita kiba la ring mraw ïa ki, ki bat khak ïa ki: kim treh ban pyllait ïa ki.

³⁴ U Nongpynim jong ki u long u bakhlaiñ; ‘U Trai ki paid’ long ka kyrteng jong u: un ïasaid lut ïa ka kam jong ki, ba un pynjahthait ïa ka khyndew, bad ba un pynkhih ïa kiba shong ha Babilon.

³⁵ “Ka waitlam ka don halor ki Khaldi,” ong U Trai, “bad halor kiba shong ha Babilon, bad halor ki rangbah jong ka, bad halor ki riewstad jong ka.

³⁶ Ka waitlam ka don halor ki nongkren phlan duman bad kin bieit noh: ka waitlam ka don halor ki riewkhlaiñ jong ka, te kin sa khaw-eit noh.

³⁷ Ka waitlam ka don halor ki kulai jong ki, bad halor ki kali ïapom jong ki, bad halor u paidbah bakhleh baroh kiba don hapdeng jong ka, te kin sa long kum ki kynthei: ka waitlam ka don halor ki jingkynshew jong ka, te yn sa lute ïa ki.

³⁸ Kaba rang ryngkhiang ka don halor ki um jong ka, te yn sa pynrngad ïa ki: naba ka long ka ri ki durblei ba la mut, bad ki long lamwir shaphang ki durblei.”

³⁹ “Namar kata, ki mrad khlaw ka ri shyiap lem bad ki suri kin shong hangta, bad ki ostrits kin shong ha ka; bad yn ym shong briew shuh ha ka ha la ka rta; lymne yn ym don ba shong shuh ha ka pateng la pateng bynriew.

⁴⁰ Kumba haba U Blei u la pynkyllon ïa ka Sodom bad Gomorra bad ki shnong ba-marjan jong ki,” ong U Trai; “kumta, yn ym don ba shong hangta, lymne u khun u briew un ym shong ha ka.

⁴¹ “Ha khmih, ka kynja bynriew ka wan na shatei: bad ïa ka jaid bynriew bakhraw, bad ïa shibun ki syiem yn pynkhih na ki bynta bakut jong ka khyndew.

⁴² Kin bat ïa ka ryntieh bad ïa u sum; ki long kiba runar, bad kim don jingsngewsynei; ka jingsawa jong ki ka kyrhuh kum ka duriaw, bad ki shong ha ki kulai; uwei uwei baroh ba la buh riang, kum u rangbah ïa ka thma, ban ïaleh ïa pha, ko ka khun ka Babilon.

⁴³ “U syiem ka Babilon u la ïohsngew ïa ka nam jong ki, te ki kti jong u ki la tlot noh: ka jingpisa ka la ngat ha u, ka jingsuh kum ka jong ka kynthei haba suhkhun.

⁴⁴ “Ha khmih, un sa kiew kum u sing na ka jingsarong ka Jordan ban ïaleh ïa kata ka jaka shong kaba skhem: hynrei, ngan pynphet krad ïa ki shisyndon na ka; bad jar uba la jied, ïa uta ngan thung halor jong ka: naba uei uba kat nga? bad uei u ban buh por ïa nga? bad uei uta u nongaplangbrot u ban ïeng ha khmat jong nga?”

⁴⁵ Namar kata, to sngew phi ïa ka jingpyrkhat U Trai, kaba u la pyrkhat pyrshah ïa ka Babilon; bad ïa ki jingthmu jong u, ba u la thmu pyrshah ïa ka ri ki Khaldi: “Da shisha, kin rong noh ïa ki, wat ïa ki barit jong ka kynhun; da shisha, un pynlong kaba kynjah lem bad ki, ïa ka jaka shong jong ki.

⁴⁶ Ha ka jingsawa ka jingjop ïa ka Babilon, ka khyndew ka khynñiuh, bad yn ïohsngew ïa ka jinglynñiar hapdeng ki jaid bynriew.”