JEREMAÏAH 5 - KA BAIBL

Ka jingleh bymman ka Jerusalem bad ka Judah

¹ To phet kylleng ïa ki lynti shnong ka Jerusalem, bad to khmih mynta, bad to tip, to wad ruh ha ki jaka bakylluid jong ka, lada phi lah ban shem ïa u briew, lada don uno uno uba leh hok, uba wad ïa ka jingshisha; te ngan map ïa ka.

² Bad la ki ong, “Katba im U Trai;” shisha keiñ ki smai lamler.

³ A Trai, ki khmat jong me kim khmih ha ka jingshisha? Me la shoh ïa ki, hynrei, kim shym la sngewsih; me la bam duh ïa ki, hynrei, kim treh ban pdiang ïa ka jingsneng: ki la pynlong ïa ki khmat jong ki kham eh ban ïa u mawsiang; kim treh ban wan phai pat.

⁴ Ynda kumta, nga la ong, “Shisha kine ki la long ki baduk: ki long ki babieit; naba kim tip ïa ka lynti U Trai, lymne ïa ka jingbishar U Blei jong ki;

⁵ ngan leit sha ki bakhraw batri, bad ngan kren ha ki; naba ki tip ïa ka lynti U Trai, bad ïa ka jingbishar U Blei jong ki.” Hynrei kine, da kawei ka jingmut ki la pynkheiñ ïa ka lyngkor, bad ki la bthat ïa ki jingkhum.

⁶ Namar kata, u sing na khlaw un pynïap ïa ki, u suri ki por miet un lute ïa ki, u 'labasa un ap ïa ki shnong jong ki, ïa uwei uwei baroh uba leit mih noh nangta yn patar lyngkhot lyngkhai; namar ki ryngkang jong ki, ki la bun, bad ki jingphaidien jong ki, ki la nang roi.

⁷ “Kumno ngan map ïa pha? Ki khun jong pha ki la lyndet ïa nga, bad ki la smai da kita ki bymlong ki blei: mynba nga la lah bsa kdang ïa ki, ki la klim, bad ki la ïalang kynhun ha ki ïing ki nuti.

⁸ Ki la long kum ki kulai ba la ai jingbam mynstep: uwei uwei u la pah khroh ïa ka tnga u paramarjan jong u.

⁹ Ngan ym wan jngoh na ka bynta kine kiei kiei?” ong U Trai: “ka mynsiem jong nga kan ym pynhiar kput ïa ka jaid bynriew kaba kum kane?

¹⁰ “To phin leit kiew halor ki kynroh jong ka, bad to pynjot; hynrei, wat pat pynkut lut: ngor noh ïa ki tnat jong ka: naba kim long ki jong U Trai.

¹¹ Naba ka ïing Israel bad ka ïing Judah ki la shetkylla eh ïa nga,” ong U Trai.

¹² “Ki la len ïa U Trai, bad ki la ong, ‘Kam dei ma u; lymne ka basniew kan ym ngat ha ngi; lymne ngin ym ïohi ïa ka waitlam lymne ïa ka 'nemsniew;

¹³ te ki nongïathuhlypa kin long lyer, bad kata ka ktien kam don ha ki: kumne yn sa leh ïa ki.’ ”

¹⁴ Namar kata, kumne u ong U Trai, U Blei ki paid, “Namar ba phi kren ïa kane ka ktien, ha khmih, ngan pynlong ïa ki ktien jong nga ka ding ha ka shyntur jong me, bad ki dieng ïa une u paidbah, bad kan bam duh ïa ki.

¹⁵ Ha khmih, ngan wallam halor jong phi ïa ka jaid bynriew na sha jngai, A ka ïing Israel,” ong U Trai: “ka long ka jaid bynriew bakhrawbor, ka jaid bynriew ba na mynbarim, ka jaid bynriew kaba mem tip ïa ka ktien jong ka, lymne mem sngewthuh ïa kaba ki ong.

¹⁶ Ka ryngkap jong ki ka long ka jingtep ba rynghang, ki baroh ki long ki briew ki bakhrawbor.

¹⁷ Te kin bam lut ïa ka jingot jong me, bad ïa u kpu jong me, kiba ki khun jong me shynrang bad kynthei ki dei ban bam: kin bam lut ïa ki blang bad ïa ki masi jong me: kin bam lut ïa ki dieng Waiñ jong me bad ïa ki dieng Dumbur: kin pyntwa ïa ki shnong ba la ker kut jong me, ha kiba me shaniah, da ka waitlam.”

¹⁸ “Hynrei wat ha kita ki sngi,” ong U Trai, “ngam pat pynkut lut bad phi.

¹⁹ Te kan long, haba phi ong, ‘Balei U Trai U Blei jong ngi u la leh ïa kine kiei kiei baroh ha ngi?’ Me te men ong ha ki, ‘Kat kumba phi la lyndet ïa nga, bad phi la leit shakri ïa ki blei nongwei ha ka ri jong phi, kumta phin shakri ïa ki nongwei ha ka ri ka bymdei ka jong phi.’ ”

²⁰ “To pyntip ïa kane ha ka ïing u Jakob, bad pynbna ïa ka ha Judah, da kaba ong,

²¹ ‘To sngap ïa kane mynta, A u paidlang u babieit, bad uba khlem jingshemphang; uba don ki khmat, te um ïohi; uba don ki shkor, te um ïohsngew:

²² Phim sheptieng du ïa nga?’ ” ong U Trai: “phin ym khih khynñiuh ha khmat jong nga, uba la buh ïa u shyiap ban long pud ïa ka duriaw da ka hukum baïaineh, ba kam lah ryngkang shuh ïa u? bad la ki jingat phyllung jong ka ki kynting ïa lade, pynban, kim lah jop; la ki kyrhuh, pynban, kim lah ban palat ïa u.

²³ Hynrei, une u paidbah u don ka dohnud bashetkylla bad kaba kiat; ki la ïaleh pyrshah bad ki la leit noh.

²⁴ Lymne kim ong ha la ka dohnud, ‘To ngin ïasheptieng ïa U Trai U Blei jong ngi, u ba ai ïa u slap ha la ka aïom, u 'lap nyngkong bad u 'lap khatduh; uba pynsumar ïa ngi ïa ki taïew ba la buh jong ka jingot.’

²⁵ Ki jingleh bymhok jong phi ki la pynphai noh ïa kine kiei kiei, bad ki pop jong phi ki la khang ïa ka babha na phi.

²⁶ Naba hapdeng ki briew jong nga la shem ïa ki briew ki basniew: ki ap kumba ap ki nongriam sim; ki shna jingriam, ki riam ïa ki briew.

²⁷ Kumba ka ruh ka dap da ki sim, kumta hi ki ïing jong ki, ki dap da ka jingshukor: namar kata, ki la man khraw, bad ki la man spah.

²⁸ Ki la man sngaid, ki phuh: ki palat eh ruh ha ki kam ka jingbymman: kim ïada ïa ka kam, ka kam ki khunswet keiñ, ba kin dup man bha; bad ïa ka hok jong ki baduk kim bishar.

²⁹ Ngan ym wan-i na ka bynta kine kiei kiei?” ong U Trai: “ka mynsiem jong nga kan ym pynhiar kput ïa ka jaid bynriew kaba kum kane?”

³⁰ Kaba phylla bad kaba shyrkhei ka la jia ha ka ri;

³¹ ki nongïathuhlypa ki ïathuhlypa lamler, bad ki lyngdoh ki synshar da la ka buit; bad u paidbah jong nga u sngewbha ba ka long kumta: te phin leh kumno ha ka jingkut jong ka?