JEREMAÏAH 49 - KA BAIBL

Ka jingïathuhlypa shaphang ki Ammon

¹ Shaphang ki khun u Ammon. Kumne u ong U Trai: “U Israel um don khun shynrang? um don u nongïoh pateng? balei te ba u Milkom u ïoh ïa ka Gad, bad ba ki briew jong u ki shong ha ki shnong jong ka?

² Namar kata, ha khmih, ki sngi kin wan,” ong U Trai, “ba ngan pynsngew ïa ka jingmaham ka thma pyrshah ïa ka Rabbah ki khun u Ammon; te yn pynkylla ka lymbher bakynjah ïa ka, bad ïa ki khun kynthei jong ka yn thang da ka ding: ynda kumta, u Israel un ïoh ïa kita kiba la ïoh ïa u,” ong U Trai.

³ “To lynñiar, ko Heshbon, naba ïa ka Ai la lute; to ïam, phi ki khun kynthei ka Rabbah, to panpoh ïa lade da ka jaiñ byrni: to ïam sngewsih, bad to phet shane shatai hapdeng ki jingker; naba u Milkom un leit shong mraw, ki lyngdoh jong u bad ki rangbah jong u lang.

⁴ Balei pha sngewsarong ha ki them, ka them kaba tuid jong pha, ko pha ka khun kaba phai dien? kaba la shaniah ha la ki jingkynshew, da kaba ong, ‘Uei u ban wan ha nga?’

⁵ Ha khmih, ngan pynwan ïa ka jingsheptieng halor jong pha,” ong U Trai, U Trai ki paid, “na kita baroh kiba baroh sawdong ïa pha; bad yn beh noh soit ïa phi uwei uwei baroh, bad yn ym don shuh u ban lum ïa uta uba sakma.

⁶ “Hynrei hadien kata, ngan pynphai pat ïa ka jinglongmraw ki khun u Ammon,” ong U Trai.

Ka jingïathuhlypa shaphang ka Edom

⁷ Shaphang u Edom. Kumne u ong U Trai ki paid: “Ka jingstad kam don shuh ha Teman? ka jingpyrkhat ka la duh noh na ki basian? ka jingstad jong ki ka la dam noh?

⁸ To phet ïap phi, to phai dien, shong jylliew, ko phi kiba shong ha Dedan; naba ngan pynwan ïa ka jingjynjar u Iso halor jong u, ha ka sngi kaba ngan wan-i ïa u.

⁹ Lada ki nongkheit soh Waiñ ki la wan ha me, hato kim shym la pynsah khyndiat ki soh khyrdong? lada ki nongtuh mynmiet, hato kim la pynjot haduh ba ki la hun?

¹⁰ Hynrei, nga la pynlyngkhuit ïa u Iso, nga la pynpaw ïa ki jaka rieh jong u, bad un ym lah shuh ban buhrieh ïa lade: ïa u symbai jong u la lute, bad ki para jong u, bad ki paramarjan jong u, bad um don shuh.

¹¹ To iehnoh ïa la ki khun kiba khlem kpa, ngan sumar im ïa ki; bad ki riewkynthei jong me to kin shaniah ha nga.”

¹² Naba kumne u ong U Trai: “Ha khmih, kita ki bymdei ïa ki ban dih na ka khuri, kin dih shisha; te ma me men lait phar khlem da shitom? men ym lait khlem jingshitom, hynrei, men dih shisha.

¹³ Naba nga la smai da lade,” ong U Trai, “ba ka Bosrah kan sa long ka jinglyngngoh, ka jingrkhiebeiñ, ka khlaw, bad ka jingtim; bad baroh ki shnong jong ka kin long khlaw ha la ka rta.”

¹⁴ Nga la ïohsngew ka jingbna na U Trai, bad ïa u nonglam-ktien la phah hapdeng ki jaid bynriew, u da ong, “To ïalum lang, bad to wan ïaleh ïa ka, bad to ïeng sha ka thma.

¹⁵ Naba ha khmih, nga la pynlong ka barit ïa pha hapdeng ki jaid bynriew, bad ïa kaba la ibeiñ hapdeng ki briew.

¹⁶ Te shaphang ka jingitieng jong pha, ka jingsarong ka dohnud jong pha ka la shukor ïa pha, ko pha kaba shong ha ki jingpdang u mawsiang, kaba bat ïa ka jingjrong u lum: la pha thaw hajrong ïa la ka skum kum ka pukni, ngan pynhiar ïa pha nangta,” ong U Trai.

¹⁷ “Bad u Edom un sa long ka jinglyngngoh: uwei uwei baroh uba ïaid hajan jong u un sngewlyngngoh, bad un kynshi ha kita baroh ki jingshitom jong u.

¹⁸ Kumba ha ka jingpynkyllon ka Sodom bad ka Gomorra bad ki shnong kiba marjan jong ki,” ong U Trai, “ym don u ban shong hangta, lymne ym don u khun u briew u ban shong ha ka.

¹⁹ Ha khmih, un wan kiew kum u sing na ka jingsarong ka Jordan ban ïaleh ïa ka jaka shong ka bakhlaiñ: hynrei, ngan pynphet kyndit ïa u na ka; bad jar uba la jied, ïa uta ngan thung halor jong ka: naba uei uba kum nga? bad uei u ban buh por ïa nga? bad uei uta u nongaplangbrot u ban ïeng ha khmat jong nga?

²⁰ Namar kata, to sngew phi ïa ka jingpyrkhat U Trai, kaba u la pyrkhat pyrshah ïa u Edom; bad ïa ki jingthmu jong u, kiba u la thmu pyrshah ïa kiba shong ha Teman: Da shisha, kin rong noh ïa ki, ïa ki barit keiñ jong ka kynhun; da shisha, un pynlong kynjah lem bad ki, ïa ka jaka shong jong ki.

²¹ Ka khyndew ka khynñiuh ha ka jingsawa ka jingkyllon jong ki; ka don ka jingkyang, ïa ka jingsawa jong ka la ïohsngew ha ka Duriaw Basaw.

²² Ha khmih, un wan kiew bad un her kum ka pukni, bad un pynpyiar ïa la ki thapniang pyrshah ïa ka Bosrah: bad ka dohnud ki riewkhlaiñ ka Edom ha kata ka sngi, kan long kum ka dohnud ka kynthei ha ka jingsuh khun jong ka.”

Ka jingïathuhlypa shaphang ka Damaskos

²³ Shaphang ka Damaskos. “Ka Hamath ka la lehrain, bad ka Arpad; naba ki la ïohsngew ki jingbna basniew, ki la um noh: ka don ka jingsngewsih ha ka duriaw; kam lah ban shongthait.

²⁴ Ka Damaskos ka la tlot noh, ka phai dien ban sa phet noh, bad ka jingkhynñiuh ka la lap ha ka: ka jingpisa bad ki jingsngewsih ki la bat ïa ka, kum ka kynthei ha kaba suhkhun.

²⁵ Kumno ba ym shym la iehnoh noh ïa ka shnong ka jingïaroh, ka shnong ka jingkmen jong nga?

²⁶ Namar kata, ki samla jong ka kin kyllon ha ki lynti shnong jong ka, bad ïa ki nongïapom baroh yn pynjar jar ha kata ka sngi,” ong U Trai ki paid.

²⁷ “Bad ngan wiang ding ha ka kynroh ka Damaskos, bad kan bam duh ïa ki ïingsyiem u Benhadad.”

Ka jingïathuhlypa shaphang ka Kedar bad ki hima u Hasor

²⁸ Shaphang ka Kedar, bad shaphang ki hima Hasor, kiba u Nebukhadressar u syiem ka Babilon u la pom. Kumne u ong U Trai: “To ïeng, khie leit kiew sha Kedar, bad to lute ïa ki khun mihngi.

²⁹ Ïa ki ïingjaiñ jong ki bad ki kynhun jong ki kin knieh; kin rong noh ha lade ïa ki pyrda jong ki, bad ïa ki khiew ki pliang jong ki baroh, bad ïa ki ut jong ki: bad kin pyrta ha ki, ‘Ka jingsngewshyrkhei baroh sawdong.’

³⁰ To phet ïap phi, to ïaid sakma sha jngai, to shong ha bajylliew, ko phi kiba shong ha Hasor,” ong U Trai; “naba u Nebukhadressar u syiem ka Babilon u la ïasylla ïa phi, bad u la thmu jingthmu ban ïaleh ïa phi.

³¹ “To ïeng, khie leit kiew sha ka jaid bynriew kaba suk, kaba shong khlem sumar,” ong U Trai; “ka bym ju don ki khyrdop lymne dieng khang, kaba shong marwei.

³² Te ki ut jong ki kin long ka jingkurup, bad ka jingbun ki masi jong ki ka jinglute: bad ngan pynsakma sha ki lyer baroh ïa kita kiba khi ïa ki dong u shñiuh jong ki: bad ngan wallam ïa ka jingjynjar jong ki na baroh sawdong ïa ki,” ong U Trai.

³³ “Bad ka Hasor kan long ka jaka shong ki myrsiang, ka jingkynjah junom: ym don u ban shong sah hangta, lymne u khun u briew un ym shong ha ka.”

Ka jingïathuhlypa shaphang ka Elam

³⁴ Ka ktien U Trai kaba la wan ha u Jeremaïah, u nongïathuhlypa shaphang ka Elam ha kaba sdang ka jingsynshar u Sedekaïah u syiem ka Judah, ka da ong,

³⁵ “Kumne u ong U Trai ki paid: ‘Ha khmih, ngan pynkheiñ ïa ka ryntieh ka Elam, ka bor bakongsan jong ki.

³⁶ Bad halor ka Elam nga wallam ïa ki saw lyer na ki sawdong ka bneng, bad ngan pynsakma ïa ki sha kita ki lyer baroh; bad kan ym don ka jaid bynriew kaba kita ïa kiba la pynwir jong ka Elam kin ym wan sha ka.

³⁷ Bad ngan pynkhaw-eit ïa ka Elam ha khmat ki nongshun jong ki, bad ha khmat kita kiba wad ïa ka jingim jong ki: bad ngan pynwan ïa ka jingsniew halor jong ki, ïa ka jingbitar lep jong nga keiñ,’ ” ong U Trai; “bad ngan phah ïa ka waitlam hadien jong ki, tad ynda nga la bam duh ïa ki:

³⁸ bad ngan buh ïa la ka khet ha Elam, bad ngan pynduh nangta ïa u syiem bad ïa ki rangbah,” ong U Trai.

³⁹ “Hynrei, ha ki sngi ki bakhatduh, ngan pynphai pat ïa ka jinglongmraw jong ka Elam,” ong U Trai.