Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JEREMAÏAH 48 - KA BAIBL


Ka jingïathuhlypa shaphang ki Moab

1 Shaphang ki Moab: Kumne u ong Trai ki paid, U Blei ki Israel: “Kordit ïa u Nebo! namar ba la pynjot ïa u; ïa ka Kiriathaim la pynlehrain, bad la jop noh ïa ka: ïa ka Misgab la pynlehrain bad la pynkyllon.

2 Ka jingïaroh ïa ka Moab kam don shuh; ha Heshbon ki la ïasylla sniew pyrshah ïa ka, ‘To ale, ïa ngin ïa-ot noh ïa ka na ka ban long ka jaid bynriew.’ Ïa pha ruh, ko ka Madmen, yn pynsngap noh jar; ka waitlam kan beh ïa pha.

3 “Ka jingsawa ka jingpyrta na Horonaim, ‘ka jinglute bad ka jingpynjot bakhraw!’

4 Ïa ka Moab la pynjot; ki khun rit jong ka ki la pynïohsngew ïa ka jingpyrta.

5 Namar na ka thiep Luhith da kaba ïam lynter kin ïakiew; namar ha kaba hiar sha Horonaim ki la ïohsngew ïa ka jingjynjar ka jingpyrta jong ka jingjot.

6 To phet ïap noh! to pynim ïa la ka jingim! bad to long kum u dieng Retem ha ri khlaw.

7 Naba, namar ba me la shaniah ha ki kam jong me bad ha ki jingkynshew jong me, ïa me ruh yn jop noh: te u Khemosh un leit sha ka jinglongmraw, ki lyngdoh jong u bad ki rangbah jong u ruh lang.

8 Bad u nonglute un wan sha ka shnong baroh, bad yn ym don ka shnong ka ban lait; ka them ruh kan jot noh, bad ïa ka madan ruh yn sa pynjot noh; kumba U Trai u la kren.

9 “To ai ki thapniang ïa ka Moab, ba kan ïoh her bad ba kan leit noh: bad ki shnong jong ka kin long ka jingkynjah, bymdon bashong briew ha ki.

10 “Long ba la tim ïa uta uba leh bymsuidñiew ïa ka kam jong U Trai, bad long ba la tim ïa uta uba pynkynran noh ïa ka waitlam jong u na ka snam.

11 “U Moab u la long ha kaba suk naduh ba u dang samla, bad u la neh slem halor ka ryngkhai jong u, bad ym shym la phylliew na u khiew sha u khiew, lymne um shym leit sha ka jinglongmraw: namar kata ka jingmad jong u ka ïaisah ha u, bad ka jingiw jong u kam shym kylla.

12 “Namar kata, ha khmih, ki sngi kin wan,” ong U Trai, “ba ngan phah ha u ïa kita ki ban theh, bad kin theh noh ïa u; bad kin pynsuda ïa ki khiew jong u, bad kin pynpait lwet ïa ki bitor jong ki.

13 Bad u Moab un lehrain ïa u Khemosh, kumba ka ïing Israel ka la lehrain ïa ka Bethel ka jingshaniah jong ki.”

14 Kumno phi ong, “Ngi long kiba khlaiñ, bad kiba shlur ban ïaleh thma?

15 Ïa ka Moab la pynjot, bad ki la ïaleit sha ki shnong jong ka, bad ki samla ba la kynsai jong u ki la ïaleit hiar sha ka jingpynïap,” ong U Syiem, uba ka kyrteng jong u long “U Trai ki paid.”

16 “Ka jingjynjar u Moab ka la jan wan, bad ka jingshitom jong u ka pynkloi stet.

17 Phi baroh kiba don baroh sawdong ïa u, to ïam ïa u, bad phi baroh kiba tip ïa ka kyrteng jong u; to ong, ‘Kumno la pynkheiñ noh ïa u diengduh ba-eh, ïa u diengduh ba-itynnad!’

18 “Ko pha ka khun kynthei kaba shong ha Dibon, to hiar noh ha ka burom jong pha, bad to shong ha ka jingsliang; namar u nonglute ïa ka Moab u la wan ban ïaleh ïa pha, u la pynjot ïa ki kut baskhem jong pha.

19 Ko uba shong ha Aroer, to ïeng harud lynti, bad to khmih: to kylli ïa uta uba phet noh, bad ïa kata kaba phet ïap noh; to ong, ‘La leh aïu sha?’

20 Ïa ka Moab la pynlehrain; namar la pynkyllon ïa ka: to lynñiar bad to pyrta; to ïathuh ïa ka ha Arnon, ba la pynjot ïa ka Moab.

21 “Bad ka jingshitom ka la wan halor ka ri madan; halor ka Holon, bad halor ka Jahsah, bad halor ka Mephaath;

22 bad halor ka Dibon, bad halor u Nebo, bad halor ka Beth-diblathaim;

23 bad halor ka Kiriathaim, bad halor ka Bethgamul, bad halor ka Bethmeon;

24 bad halor ka Kerioth, bad halor ka Bosrah, bad halor ki shnong jong ka ri Moab baroh, kiba sha jngai lane hajan.

25 Ïa ka reng jong u Moab la ot noh, bad ïa ka ksang'ti jong u la kdiah noh,” ong U Trai.

26 “To phin pyndih buaid ïa u; namar u la pynkhraw ïa lade pyrshah ïa U Trai: bad u Moab un ksaid ha la ka prie, bad un long ruh ka jingrkhiebeiñ.

27 Hato u Israel um shym la long ka jingrkhiebeiñ ïa me? la shem ïa u hapdeng ki nongtuh? Namar katno katno sien ba me kren shaphang jong u, me la kyrngah ïa la ka khlieh.

28 “A phi kiba shong ha Moab, to iehnoh ïa ki shnong, bad to shong ha u mawsiang; bad to long kum ka lyngdkhur kaba thaw ïa la ka skum ha ki rud ka shyntur jong ka krem.

29 Ngi la ïohsngew shaphang ka jingsarong u Moab, ba u long uba sarong eh; ka jingleh heh jong u, bad ka jingsarong jong u, bad ka jingleh meng jong u, bad ka jingsngewkhraw ka dohnud jong u.

30 Nga tip ïa ka jingbitar jong u, ba kam long ei ei,” ong U Trai; “ki jingkob-sob jong u kim shym la pynlong ei ei.

31 Namar kata, ngan lynñiar namar ki Moab, shisha, ngan pyrta noh namar ki Moab baroh: namar ki rangbah ka Kir-heres kin ïaïam.

32 Kham tam ban ïa ka jingïam ka Jaser ngan ïam ïa me, ko u dieng Waiñ jong ka Sibmah: ki tnat jong me ki la ïaid sha shiliang ka duriaw, ki la poi haduh ka duriaw Jaser: u nonglute u la kynrup ha ki soh lyiur jong me bad ha ki soh Waiñ jong me.

33 Bad ïa ka jingsngewbha bad ïa ka jingkmen la shim noh, na ki lyngkha basei soh bad na ka ri Moab; bad nga la pynduh noh ïa ka Waiñ na ka kor tylliat soh: ym don shuh u ban ïuh da ka jingrisa; ka jingrisa kan ym long shuh ka jingrisa.

34 “Na ka jingpyrta ka Heshbon haduh ka Elealeh, jin haduh Jahas ki la pynjam ïa ka ktien jong ki, naduh Soar haduh Horonaim, haduh Eglath-shelishiyah: namar ki um jong ka Nimrim ruh kin kynjah.

35 Nalor kata, ngan pynduh noh na Moab ïa uta uba ainguh ha ka jaka bajrong, bad ïa uta uba thang jingiwbih ha ki blei jong u,” ong U Trai.

36 “Namar kata, ka dohnud jong nga ka sawa namar ka Moab kum ki jingput, bad ka dohnud jong nga ka sawa kum ki jingput namar ki rangbah Kir-heres: namar kata, ka jingkyrhai ba u la ïoh ka la duh noh.

37 “Namar ka khlieh baroh ka la dkhaw, bad ïa ki 'ñiuh tmoh baroh la khap noh: ha ki kti baroh don ki jingmong, bad ha ka syngkai ka jaiñ byrni.

38 Halor ki ïing ki Moab baroh bad ha ki lynti shnong jong ka, ka jingïam ka don kylleng la kylleng: namar nga la pynpait ïa ka Moab kum ïa u khiew ha u bymdon jingsngewbha,” ong U Trai.

39 Kumno ba la pynpait noh ïa ka! kumno ki ïalynñiar! kumno ba ka Moab ka la phai dien da ka jinglehrain! kumta ka Moab kan long ka jingrkhiebeiñ bad ka jingkhaw-eit ïa kita baroh kiba don baroh sawdong ïa ka.

40 Namar kumne u ong U Trai: “Ha khmih, un her noh kum ka pukni, bad un pynpyiar ïa la ki thapniang pyrshah ïa ka Moab.

41 Ïa ka Kerioth la jop noh, bad ïa ki kut baskhem la kynrup klep, bad ka dohnud ki riewkhlaiñ jong ka Moab ha kata ka sngi kan long kum ka dohnud ka kynthei ha ka jingsuh khun jong ka.

42 Bad ïa u Moab yn pynduh noh na ka ban long u paidlang, namar u la pynkhraw ïa lade pyrshah ïa U Trai.

43 Ka jingpynsheptieng, bad ka 'liewlep, bad ka jingriam, ki long halor jong me, ko uba shong ha Moab,” ong U Trai.

44 “Uta uba phet noh na ka jingpynsheptieng un hap ha ka 'liewlep; bad uta uba kiew na ka 'liewlep un ngat ha ka jingriam: namar ngan wallam halor jong ka, halor ka Moab keiñ, ïa ka snem ka jingwan-i jong ki,” ong U Trai.

45 “Kita kiba la phet ïap noh ki ïeng khlem bor hapoh ka syrngiew jong ka Heshbon: namar ka ding ka la mih noh na Heshbon, bad ka thylliej ding napdeng ka Sihon, bad ka la bam duh ïa ka dong jong ka Moab, bad ïa ka lyngkyrwiang khlieh jong kiba khynwin.

46 Kordit ïa pha, ko Moab! ki briew jong u Khemosh ki la ïap noh: namar ïa ki khun shynrang jong pha la ring mraw, bad ïa ki khun kynthei jong pha ruh la ring mraw noh.

47 Hynrei, ngan pynphai pat ïa ka jinglongmraw ka Moab ha ki sngi bakhatduh,” ong U Trai. Haduh katta long ka jingpynshitom ka Moab.

The Bible Society of India

Bible Society of India
ကြှနျုပျတို့နောကျလိုကျပါ:



ကြော်ငြာတွေ