JEREMAÏAH 47 - KA BAIBL

Ka jingïathuhlypa shaphang ki Philistia

¹ Ka ktien U Trai kaba la wan ha u Jeremaïah u nongïathuhlypa shaphang ki Philistia, mynshuwa ba u Pharaoh u la jop ïa ka Gasa.

² “Kumne u ong U Trai: ‘Ha khmih, ki um ki mih noh na shatei, bad kin kylla long ka wah ba shlei, bad kin jyntia ïa ka ri bad ïa baroh kaba don ha ka, ïa ka shnong bad ïa kita kiba shong ha ka; bad ki briew kin ïapyrta, bad ki nongshong jong ka ri baroh kin lynñiar.

³ Ha ka jingwin ka jingkyrdem ki khnap jong ki bakhlaiñ jong u, ha ka jingtur ki kali jong u, ha ka jingriew ki shalyntem jong u, ki kpa kim phai ban khmih ha la ki khun namar ka jingtlot ki kti;

⁴ namar kata ka sngi ka ban sa wan ban lute ïa ki Philistia baroh, ban ot noh na Tyros bad Sidon ïa u nongïarap baroh uba dang sah: namar U Trai un lute ïa ki Philistia, ïa kiba sah na ka 'dewlynnong Kaphtor.

⁵ Ka jingdkhaw ka la wan halor ka Gasa; ïa ka Ashkelon la pynduh noh, bad ïa i bynta ba sah na ka them jong ki: slem katno phan ot ïa lade?

⁶ Ko pha ka waitlam U Trai, slem sa katno shuwa ba phan long jar jar? to buh noh ïa lade hapoh ka jingsop jong pha; to shongthait, bad to long jai jai.

⁷ Kumno pha lah ban long jar jar, haba U Trai u la ai ka hukum ïa pha? pyrshah ïa ka Ashkelon, bad pyrshah ïa ka rud duriaw, hangta u la buh ïa ka.’ ”