JEREMAÏAH 46 - KA BAIBL

Ki jingïathuhlypa shaphang ka Ijipt

¹ Ka ktien U Trai kaba la wan ha u Jeremaïah u nongïathuhlypa shaphang ki jaid bynriew.

² Shaphang ka Ijipt: shaphang ki paidïapom u Pharaoh-neko u syiem ka Ijipt, kaba hajan ka wah Ïuphratis ha Karkhemish, ïa kaba u Nebukhadressar u syiem ka Babilon u la jop ha ka snem ka basaw u Jehoïakim u khun u Josaïah, u syiem ka Judah.

³ “To phin taïar ïa ka 'tiehbah bad ïa ka 'tiehrit, bad wan hajan ban ïaleh thma.

⁴ To teh jin ïa ki kulai ïapom, bad to ïeng, phi ki nongshong kulai, bad to mih lem bad ki jingïada khlieh jong phi; pynphyrnai ïa ki sum, phong ïa ki jingphong nar.

⁵ Balei nga la ïohi ïa ka? Ki la khaw-eit bad ki la kylla da dien; bad ïa ki riewradbah jong ki la shah jop, bad ki la phet noh stet, bad kim shym kyrtiang dien: ka jingshyrkhei baroh sawdong,” ong U Trai.

⁶ “Wat ai ba uba stet un phet ïap noh, lymne ba u bakhlaiñ un lait; shaphang shatei hajan ka wah Ïuphratis ki la jynthut bad ki la kyllon.

⁷ “Kaei kane kaba kiew kum ka Neil, kaba ki um jong ka ki kynting ïa lade kum ki wah bah?

⁸ Ka Ijipt ka kiew kum ka Neil, bad ki um jong ka ki kynting ïa lade kum ki wah bah: bad ka ong, ‘Ngan kiew, ngan tyllep ïa ka khyndew; ngan pynjot ïa ka shnong bad ïa kiba shong ha ka.’

⁹ To kynjih, phi ki kulai; bad to kyrhuh, phi ki kali ïapom; bad to ai ba ki riewradbah kin leit mih: ki Kush bad ki Put, kiba bat stieh; bad ki Lud, kiba bat bad wiat ryntieh.

¹⁰ Namar kata ka sngi ka long ka sngi U Trai, U Trai ki paid, ka sngi jingpynhiar kput, ba un ïoh ban pynhiar kput halor ki nongshun jong u: bad ka waitlam kan bam duh bad kan ngiah, bad kan dih na ka snam jong ki haduh ban da kdang: namar U Trai, U Trai ki paid, u don ka jingkñia ha ka ri shatei hajan ka wah Ïuphratis.

¹¹ Khie leit kiew sha Gilead, bad to shim ïa ka balm, ko ka khun sotti jong ka Ijipt: pha pyndonkam lehnohei ïa shibun ka dawai: ym don jingkoit ïa pha.

¹² Ki jaid bynriew ki la ïohsngew ïa ka jingrain jong pha, bad la pyndap ïa ka khyndew da ka jinglynñiar jong pha: namar u riewradbah u la ïakynduh bad u riewradbah, baroh ar ngut ki la ïakyllon lang.”

¹³ Ka ktien kaba U Trai u la kren ha u Jeremaïah u nongïathuhlypa, kumno ba u Nebukhadressar u syiem ka Babilon un wan bad un jop ïa ka ri Ijipt.

¹⁴ “To phin ïathuh shai ha Ijipt bad to pynbna ha Migdol, bad to pynbna ha Noph bad ha Tahpanhes: to ong phi, ‘To ïeng, bad to khreh; namar ka waitlam ka la bam duh baroh sawdong ïa pha.’

¹⁵ Balei ba la sar noh khoit ïa ki bakhlaiñ jong pha? Kim shym la ïeng, namar U Trai u la beh ïa ki.

¹⁶ U la pynjynthut ïa shibun, shisha, ki la ïakyllon uwei halor uwei pat: bad ki la ong, ‘Khie joit, bad ïa ngin ïaleit pat sha la ki jong ki briew, bad sha ka ri ba la kha ïa ngi, na ka waitlam babanbor.’

¹⁷ Ki la pyrta hangta, ‘u Pharaoh u syiem ka Ijipt u long tang ka jingsawa; u la shah ban dier noh ïa ka por ba la buh.’

¹⁸ “ ‘Katba nga im,’ ong U Syiem uba ka kyrteng jong u long ‘U Trai ki paid’, ‘kumba u Tabor hapdeng ki lum bah, bad kumba u Karmel harud ka duriaw, kumta shisha un wan.

¹⁹ Ko pha ka khun kynthei kaba shong ha Ijipt, to taïar ïa lade ban leit sha ka jinglongmraw: namar ka Noph kan long kaba kynjah, bad yn thang noh, khlem don uba shong shnong.

²⁰ “ ‘Ka Ijipt ka long ka masi lud ba-itynnad eh; hynrei, ka jingjot ka la wan na shatei, ka la wan keiñ.

²¹ Ki nongbylla jong ka ruh kiba hapdeng jong ka ki long kum ki khun masi kiba ha sem; namar ki ruh ki la ïakylla da dien, ki la phet lang noh baroh, kim shym la ïeng: namar ka sngi ka jingjynjar jong ki ka la lap ïa ki, ka por ka jingwan-i jong ki keiñ.

²² “ ‘Ka jingsawa jong ki ruh kan ïaid kum u bseiñ; namar kin ïaid bad ka kynhun paidïapom, bad kin wan ïaleh ïa ka bad ki sdie, kum ki nongkhet dieng.

²³ Kin khet noh ïa ka khlaw jong ka,’ ” ong U Trai, “la ym lah ban pei ïa ka ruh; namar ki kham bun ban ïa ki puit, bad ki bym lah ñiew shuh.

²⁴ Yn pynlehrain ïa ka khun kynthei ka Ijipt; yn ai noh ïa ka ha ka kti ki briew kiba na shatei.”

²⁵ U Trai ki paid, U Blei ki Israel, u ong: “Ha khmih, ngan pynshitom ïa u Amon jong ka No, bad ïa u Pharaoh, bad ïa ka Ijipt, lem bad ki blei jong ka, bad ki syiem jong ka; ïa u Pharaoh keiñ, bad ïa kita kiba shaniah ha u.

²⁶ Bad ngan ai noh ïa ki ha ka kti kita kiba wad ïa ka jingim jong ki, bad ha ka kti u Nebukhadressar u syiem ka Babilon, bad ha ka kti ki shakri jong u: bad hadien kata, yn pynshong briew ha ka, kumba ha ki sngi mynbarim,” ong U Trai.

²⁷ “Hynrei, me wat sheptieng ko Jakob u shakri jong nga, lymne wat khaw-eit, ko Israel: namar ha khmih, ngan pynim ïa me na sha jngai, bad ïa u symbai jong me na ka ri ka jinglongmraw jong ki; bad u Jakob un leit phai pat, bad un long jar jar bad ha kaba suk, bad ym don u ban pynsheptieng ïa u.

²⁸ Wat sheptieng me, ko Jakob u shakri jong nga,” ong U Trai; “namar ngan long lem bad me: namar ngan pynduh khoit ïa ki jaid bynriew baroh kat sha kiba nga la beh ïa me, hynrei, ïa me ngan ym pynduh khoit; hynrei, ngan pynbeit ïa me da ka jingbishar, bad da lei lei ngan ym pyllait ïa me khlem da pynshitom.”