JEREMAÏAH 45 - KA BAIBL

Ka ktien u Jeremaïah ïa u Baruk

¹ Ka ktien kaba u Jeremaïah u nongïathuhlypa u la kren ha u Baruk u khun u Neraïah, haba u la thoh ïa kine ki ktien ha ka kitab na ka shyntur u Jeremaïah, ha ka basaw ka snem u Jehoïakim u khun u Josaïah, u syiem ka Judah, ka da ong,

² “Kumne u ong U Trai, U Blei ki Israel, ha me, ko Baruk:

³ ‘Me la ong, “Kordit ïa nga mynta! namar U Trai u la pynlang ïa ka jingjynjar ha ka jingpang jong nga; nga la thait ïan da ka jingud jong nga, bad ngam shem jingsuk shuh.” ’ ”

⁴ Kumne men ong ha u, “Kumne u ong U Trai: ‘Ha khmih, ïa kata kaba nga la tei ngan pyntwa noh khoit, bad ïa kata kaba nga la thung ngan rat noh; bad ïa kane ha ka ri baroh kawei keiñ.

⁵ Te me wad ïa kiei kiei ki bakhraw na ka bynta ïa lade? wat wad ïa ki: namar ha khmih, ngan wallam ïa ka jingsniew halor ka doh baroh,’ ” ong U Trai: “hynrei, ïa ka jingim jong me ngan ai ha me kum ka jinglute ha ki jaka baroh kat sha kiba me leit.”