JEREMAÏAH 44 - KA BAIBL

U Jeremaïah u ïathuhlypa ïa ki Jiw ha Ijipt

¹ Ka ktien kaba la wan ha u Jeremaïah shaphang kita ki Jiw baroh kiba shong ha ka ri Ijipt, kiba la shong ha Migdol, bad ha Tahpanhes, bad ha Noph, bad ha ka ri Pathros de, ka da ong,

² “Kumne u ong U Trai ki paid, U Blei ki Israel: ‘Phi la ïohi ïa ki jingsniew baroh kiba nga la wallam halor ka Jerusalem, bad halor ki shnong Judah baroh; bad ha khmih, ha kane ka sngi ki long ka jaka kynjah, bad ym don briew ba shong ha ki;

³ na ka bynta ka jingleh bymman jong ki kaba ki la leh ban kynshuiñ ïa nga ban bitar, ha kaba ki la leit ban thang jingiwbih, bad ban shakri ïa kiwei pat ki blei, ïa kiba kim ithuh, lymne ma ki hi, lymne ma phi, lymne ki kpa jong phi ruh.

⁴ La kumta ruh, nga la phah ha phi ïa ki shakri jong nga baroh, ki nongïathuhlypa keiñ, nga da khie la dang step bad nga phah ïa ki, nga da ong, “A, wat leh ïa kane ka kam kaba ijli ba nga isih.”

⁵ Hynrei, kim shym la sngap, lymne pynshah la ki shkor ban kylla noh na ka jingleh bymman jong ki, ban ym thang jingiwbih ha kiwei pat ki blei.

⁶ Namar kata, ïa ka jingkhih bitar jong nga bad ïa ka jingbitar jong nga la theh noh, bad la pynmeh ha ki shnong ka Judah bad ha ki lynti shnong ka Jerusalem; bad ki la jot bad ki la kynjah, kumba ka long ha kane ka sngi keiñ.’ ”

⁷ Namar kata, mynta, kumne u ong U Trai, U Blei ki paid, U Blei ki Israel: “Namar balei phi leh ïa kane ka jingsniew bakhraw pyrshah ïa la ki mynsiem hi, kat ban ot noh keiñ na phi, napdeng jong ka Judah, ïa u shynrang bad ïa ka kynthei, ïa i khunlung bad iba dang buiñ, ban ym pynsah shuh ïano ïano ruh na phi;

⁸ ha kaba phi pankwah ïa nga ban bitar da ki jingleh ki kti jong phi, phi da ïathang jingiwbih ha kiwei pat ki blei ha ka ri Ijipt, sha kaba phi la leit shong; ba yn ot noh ïa phi, bad ba phin long ka jingtim bad ka jingbeiñ hapdeng ki jaid bynriew baroh jong ka khyndew?

⁹ Phi la klet noh mo ïa ka jingleh bymman ki kpa jong phi, bad ïa ka jingleh bymman ki syiem ka Judah, bad ïa ka jingleh bymman ki tnga jong ki, bad ïa ka jingleh bymman jong phi hi, bad ïa ka jingleh bymman ki tnga jong phi ruh, kaba ki la leh ha ka ri Judah, bad ha ki lynti bah ka Jerusalem?

¹⁰ Ym shym la pynrit ïa ki haduh kane ka sngi, lymne kim shym la sheptieng, lymne ïaid ha ka aiñ jong nga, lymne ha ki hukum jong nga, kiba nga la buh ha khmat jong phi bad ha khmat ki kpa jong phi.”

¹¹ Namar kata, kumne u ong U Trai ki paid, U Blei ki Israel: “Ha khmih, ngan buh ïa la ka khmat pyrshah ïa phi keiñ ban pynsniew, ïa ka ban ot noh keiñ ïa ka Judah baroh kawei.

¹² Bad ngan shim ïa kiba sah na Judah, kiba la thew la ki khmat ban leit sha ka ri Ijipt ban shong hangta, bad yn pynduh ïa ki baroh; ha ka ri Ijipt kin ïakyllon; yn pynjot ïa ki da ka waitlam bad da ka 'nemsniew; kin ïap, naduh u barit tam haduh u bakhraw tam, da ka waitlam bad da ka 'nemsniew: bad kin long ka jingijli, bad ka jinglyngngoh, bad ka jingtim, bad ka jingibeiñ.

¹³ Namar ngan pynshitom ïa kita kiba shong ha ri Ijipt, kumba nga la pynshitom ïa ka Jerusalem, da ka waitlam, da ka 'nemsniew, bad da ka khlam:

¹⁴ ba yn ym don na kita kiba sah na Judah, kiba la leit sha ri Ijipt ban shong hangta, ki ban lait im lane ki ban sah, ba kin wan phai pat sha ri Judah, sha kaba ki kwah ban wan phai pat ïa ka ban shong hangta: namar ym don ki ban wan phai pat, hynrei, tang kita ki ban lait im.”

¹⁵ Ynda kumta, ki briew baroh kiba la tip ba ki tnga jong ki, ki la thang jingiwbih ha kiwei pat ki blei, bad baroh ki kynthei kiba la ïeng hajan, u paidbah byllien, kita ki briew baroh kiba la shong ha ka ri Ijipt, ha Pathros keiñ, ki la ïathuh ha u Jeremaïah, ki ïa-ong,

¹⁶ “Shaphang kata ka ktien kaba me la kren ha ngi ha ka kyrteng U Trai, ngin ym sngap ïa me.

¹⁷ Hynrei, shisha ngin pyndep ïa ka ktien baroh kaba la mih na ka shyntur jong ngi, ïa ka ban thang jingiwbih ha ka syiem bneng, bad ban theh noh ki jingainguh dih ha ka, kumba ngi la leh, ma ngi bad ki kpa jong ngi, ki syiem jong ngi bad ki rangbah jong ngi de, ha ki shnong Judah, bad ha ki lynti shnong ka Jerusalem: naba hangta ngi la don ka jingbam kyrhai, bad ngi la man bha, bad ngim shym ïohi ei ei ka jingsniew.

¹⁸ Hynrei, naduh ba ngi la wai noh ban thang jingiwbih ha ka syiem bneng, bad ban theh ki jingainguh dih ha ka, ngi la kyrduh pynban ïa kiei kiei baroh, bad la pynduh ïa ngi da ka waitlam bad da ka 'nemsniew.

¹⁹ Bad haba ngi la thang ki jingiwbih ha ka syiem bneng, bad haba ngi la theh ki jingainguh dih ha ka, hato ngi la thaw ki kpu ban mane ïa ka, bad ngi la theh ki jingainguh dih ha ka, khlem da don ki tnga jong ngi de?”

²⁰ Ynda kumta, u Jeremaïah u la ong ha kita ki briew baroh, ha ki shynrang, bad ha ki kynthei, ha kita ki briew baroh keiñ kiba la ai ha u ïa kata ka jubab, u da ong,

²¹ “Kata ka jingiwbih kaba phi la thang, ma phi bad ki kpa jong phi, ki syiem jong phi bad ki rangbah jong phi, bad ki briew jong ka ri de, ha ki shnong ka Judah, bad ha ki lynti shnong ka Jerusalem, hato U Trai um shym la kynmaw ïa ki, bad ka la wan ne em ha ka jingmut jong u?

²² haduh ba U Trai um lah shah shuh, namar ka jingbymman ki jingleh jong phi, bad namar ki jingijli kiba phi la leh; namar kata, ka ri jong phi ka la long jaka kynjah, bad ka jinglyngngoh, bad ka jingtim, ka bymshong briew, kumba ka long ha kane ka sngi.

²³ Namar phi la thang ka jingiwbih, bad namar phi la leh pop ïa U Trai, bad phim shym la kohnguh ïa ka ktien U Trai, lymne ïaid ha ka hukum jong u, lymne ha ki aiñ jong u, lymne ha ki jingphla jong u; namar kata, kane ka jingsniew ka la jia ha phi, kumba ka long ha kane ka sngi.”

²⁴ Nalor kata, u Jeremaïah u la ong ha kita ki briew baroh, bad ha kita ki kynthei baroh ruh, “To sngew ïa ka ktien U Trai, phi ki Judah baroh kiba don ha ka ri Ijipt:

²⁵ kumne u ong U Trai ki paid, U Blei ki Israel, u da ong: ‘Ma phi bad ki tnga jong phi ruh phi la kren da la ki shyntur, bad phi la pyndep ïa kata da la ki kti, phi da ong, “Da shisha, ngin pyndep ïa la ki jingsmai kiba ngi la smai, ïa ka ban thang jingiwbih ha ka syiem bneng, bad ban theh ki jingainguh ha ka:” to pynskhem, namar kata, ïa la ki jingsmai, bad to pyndep ïa la ki jingsmai.’

²⁶ Namar kata, to sngew phi ïa ka ktien U Trai, phi ki Judah baroh kiba shong ha ka ri Ijipt: ‘Ha khmih, nga la smai ha ka kyrteng bakhraw jong nga,’ ” ong U Trai, “ba ïa ka kyrteng jong nga yn ym ïalap shuh na ka shyntur uno uno u briew uba na Judah ha ka ri Ijipt baroh, da kaba ong, ‘Katba U Trai U Blei u im.’

²⁷ Ha khmih, nga ap khmih ïa ki, ïa ka ban sniew, te ym ïa ka ban bha: bad ïa ki briew jong ka Judah baroh kiba don ha ka ri Ijipt yn pynduh noh da ka waitlam bad da ka 'nemsniew, haduh ba kin da duh khoit.

²⁸ Bad kita kiba lait im na ka waitlam kin wan phai noh na ka ri Ijipt sha ka ri Judah, tang khyndiat keiñ ha ka jingkheiñ; bad kita kiba dang sah baroh na ka Judah, kiba la leit sha ri Ijipt ban shong hangta, kin sa tip ka ktien jongno kan neh, ka jong nga, ne ka jong ki.

²⁹ Bad kane kan long ka dak ha phi,” ong U Trai, “ba ngan pynshitom ïa phi ha kane ka jaka, ba phin ïoh tip ba ki ktien jong nga kin ïeng pyrshah ïa phi, da shisha, ban pynsniew:”

³⁰ kumne u ong U Trai: “Ha khmih, ngan ai noh ïa u Pharaoh-Hophra u syiem ka Ijipt ha ka kti ki nongshun jong u, bad ha ka kti kiba wad ïa ka jingim jong u; kumba nga la ai noh ïa u Sedekaïah u syiem ka Judah ha ka kti u Nebukhadressar u syiem ka Babilon, u nongshun jong u, bad uba wad ïa ka mynsiem jong u ruh de.”