JEREMAÏAH 43 - KA BAIBL

Ka jingkynriah shnong sha Ijipt

¹ Te haba u Jeremaïah u la pynkut ïa ka ban kren ïa ki ktien baroh ki jong U Trai U Blei jong ki ha ki paidbah baroh da kiba U Trai U Blei jong ki u la lah phah ïa u ha ki, kine ki ktien baroh keiñ,

² ynda kumta, u Asariah u khun u Hoshaïah, bad u Johanan u khun u Kariah, bad baroh ki briew basarong ki la kren, ki ïa-ong ha u Jeremaïah, “Me kren lamler: U Trai U Blei jong ngi um shym la phah ïa me ban ong, ‘Phin ym leit sha Ijipt ban shong hangta:’

³ hynrei, u Baruk u khun u Neraïah u buh ïa me pyrshah ïa ngi, ïa ka ban ai ïa ngi ha ka kti jong ki Khaldi, ba ki lah ban pynïap ïa ngi, bad ban leit ring mraw noh ïa ngi sha Babilon.”

⁴ Kumta, u Johanan u khun u Kariah, bad baroh ki kaptan ki paidïapom, bad baroh u paidbah, kim shym la kohnguh ïa ka ktien U Trai, ban shong ha ka ri Judah.

⁵ Hynrei, u Johanan u khun u Kariah, bad baroh ki kaptan ki paidïapom, ki la ïalam ïa ki basah baroh jong ka Judah, kiba la wan phai na ki jaid bynriew baroh sha kiba la lah beh noh ïa ki ban shong ha ka ri Judah;

⁶ ïa ki rangbah, bad ïa ki kynthei, bad ïa ki khynnah, bad ïa ki khun kynthei u syiem, bad u briew baroh ba u Nebusaradan u kaptan ka karod u la lah iehnoh bad u Gedalaïah u khun u Ahikam, u khun u Shaphan, bad u Jeremaïah u nongïathuhlypa, bad u Baruk u khun u Neraïah;

⁷ te ki la wan poi sha ka ri Ijipt; namar kim shym la kohnguh ïa ka ktien U Trai: te ki la wan sha Tahpanhes keiñ.

⁸ Ynda kumta, la wan ka ktien U Trai ha u Jeremaïah ha Tahpanhes, ka da ong,

⁹ “To shim ki maw bakhraw ha ka kti jong me, bad to bsuh ïa ki hapoh ka sorki ha ka kynroh maw-it, kaba long ha ka khyrdop ka ïing u Pharaoh ha Tahpanhes, ha khmat ki rangbah Judah;

¹⁰ bad to ong ha ki, ‘Kumne u ong U Trai ki paid, U Blei ki Israel: “Ha khmih, ngan phah shim ïa u Nebukhadressar u syiem ka Babilon, u shakri jong nga, bad ngan buh ïa ka khet jong u halor kine ki maw ba nga la bsuh: bad un pynïar ïa la ka ïingjaiñ syiem halor jong ki.

¹¹ Te un wan, bad un shoh ïa ka ri Ijipt; ïa kita kiba dei ban ïap yn ai ha ka jingïap, bad ïa kita kiba dei ban ring mraw yn ring mraw, bad ïa kita kiba dei ban ïap da ka waitlam yn ai ha ka waitlam.

¹² Bad ngan pynmeh ïa ka ding ha ki ïing jong ki blei Ijipt; bad un thang ïa ki, bad un ring mraw noh ïa ki: bad un kup ïa lade da ka ri Ijipt, kumba u nongap jingri u kup ïa la ka jaiñkup; bad un leit noh nangta da kaba suk.

¹³ Un pyntwa ruh ïa ki païa jong ka Beth-shemesh, kaba don ha ka ri Ijipt; bad ïa ki ïing jong ki blei ka Ijipt un thang da ka ding.” ’ ”