JEREMAÏAH 42 - KA BAIBL

Ka khubor u Jeremaïah ïa u Johanan

¹ Te baroh ki kaptan ki paidïapom bad u Johanan u khun u Kariah, bad u Jesaniah u khun u Hoshaïah, bad u paidbah baroh ki la wan hajan, naduh u barit tam haduh u bakhraw tam,

² bad ki la ong ha u Jeremaïah u nongïathuhlypa, “To shah, ngi kyrpad ïa me, ban pdiang sngewbha ha khmat jong me ïa ka jingkyrpad jong ngi, bad to duwai na ka bynta jong ngi ha U Trai U Blei jong me, na ka bynta ine i bynta baroh ba sah keiñ; namar ngi sah sa tang khyndiat na ki babun, kumba ki khmat jong me ki ïohi ïa ngi:

³ ba U Trai U Blei jong me un pyni ha ngi ïa ka lynti ha kaba ngi dei ban ïaid, bad kaei kata kaba ngi dei ban leh.”

⁴ Ynda kumta, u Jeremaïah u nongïathuhlypa u la ong ha ki, “Nga la shahshkor ïa phi; ha khmih, ngan duwai ha U Trai U Blei jong phi katba kum ki ktien jong phi: te ïa kaei kaei ba U Trai un phai ktien ïa phi ngan pynpaw ïa ka ha phi, ngan ym buhrieh ei ei na phi.”

⁵ Te ki la ong ha u Jeremaïah, “To U Trai un long u sakhi bashisha bad baïaineh hapdeng jong ngi, lada ngim leh katba kum ka ktien baroh da kaba U Trai U Blei jong me un phah ïa me sha ngi.

⁶ La ka bha, la ka sniew ruh, ngin kohnguh ïa ka ktien U Trai U Blei jong ngi, sha uba ngi phah ïa me; ba kan long bha bad ngi, haba ngi kohnguh ïa ka ktien U Trai U Blei jong ngi.”

⁷ Te hadien shiphew sngi, ka ktien U Trai ka la wan ha u Jeremaïah.

⁸ Ynda kumta, u la khot ïa u Johanan u khun u Kariah, bad ki kaptan ki paidïapom baroh kiba la don bad u, bad u paidbah baroh naduh u barit tam haduh u bakhraw tam,

⁹ bad u la ong ha ki, “Kumne u ong U Trai, U Blei ki Israel, sha uba phi la phah ïa nga ban buh ïa ka jingkyrpad jong phi ha khmat jong u:

¹⁰ ‘Lada phin dang shong ha kane ka ri, te ngan tei ïa phi, bad ngan ym pynkyllon ïa phi, bad ngan thung ïa phi, te yn ym rat noh: namar nga kylla-ka-bamut na ka jingsniew kaba nga la leh ha phi.

¹¹ Wat tieng ïa u syiem ka Babilon, ïa uba phi sheptieng; wat tieng ïa u,’ ong U Trai: ‘namar nga long bad phi ban pynim ïa phi, bad ban pyllait ïa phi na ka kti jong u.

¹² Bad ngan ai jingisynei ïa phi, khnang ba un leh isynei ha phi, bad un pynphai noh ïa phi sha ka ri jong phi hi.’

¹³ Hynrei, lada phi ong, ‘Ngin ym shong ha kane ka ri;’ kumta ba phin ym kohnguh ïa ka ktien U Trai U Blei jong phi;

¹⁴ da kaba ong, ‘Em; hynrei, ngin leit sha ri Ijipt, ha kaba ngin ym ïohi ïa ka thma, lymne ïohsngew ïa ka jingsawa ka turoi, lymne thngan kpu; hangta te ngin shong:’ ”

¹⁵ mynta, namar kata to sngew, ko phi i bynta ba sah na Judah, ïa ka ktien U Trai: “kumne u ong U Trai ki paid, U Blei ki Israel, ‘Lada phi thew beit ïa la ki khmat ban rung sha Ijipt, bad ban leit shong shata;

¹⁶ ynda kumta te, kata ka waitlam, ïa kaba phi tieng, kan lap ïa phi hangta ha ri Ijipt, bad ka 'nemsniew, ïa kaba phi khaw-eit, kan bud eh nadien jong phi hangta ha Ijipt; bad hangta phin ïap.

¹⁷ Kumta kan long bad ki briew baroh kiba thew ïa la ki khmat ban leit sha Ijipt ban shong hangta; kin ïap da ka waitlam, da ka 'nemsniew, bad da ka jingïapkhlam: bad ym don uwei na ki u ban sah lane lait na kata ka jingsniew kaba ngan pynwan halor jong ki.’ ”

¹⁸ Namar kumne u ong U Trai ki paid, U Blei ki Israel: “Kumba la theh noh ïa ka jingbitar jong nga bad ïa ka jingkhih bitar jong nga ha kiba shong ha Jerusalem, kumta yn theh ïa ka jingkhih bitar jong nga halor jong phi, haba phi la rung sha Ijipt: te phin long ka jingijli, bad ka jinglyngngoh, bad ka jingtim, bad ka jingkrenbeiñ; bad phin ym ïohi shuh ïa kane ka jaka.”

¹⁹ U Trai u la kren shaphang jong phi, ko phi i bynta ba sah na Judah, “Wat leit phi sha Ijipt:” to tip da shisha ba nga la maham ïa phi ha kane ka sngi.

²⁰ Namar phi la leh shukor ïa la ki mynsiem hi; namar phi la phah ïa nga ha U Trai U Blei jong phi, phi da ong, “To duwai na ka bynta jong ngi ha U Trai U Blei jong ngi; bad ïa baroh katba U Trai U Blei jong ngi un ong, kumta to pynpaw ha ngi, bad ngin leh ïa kata:”

²¹ bad nga la pynpaw ïa ka ha phi, ha kane ka sngi; hynrei, phim shym la kohnguh ïa ka ktien U Trai U Blei jong phi ha kaei kaei ruh kaba u la phah ïa nga sha phi shaphang jong ka.

²² Namar kata, mynta to tip da shisha, ba phin ïap da ka waitlam, da ka 'nemsniew, bad da ka jingïapkhlam, ha ka jaka ba phi kwah ban leit ban shong hangta.