JEREMAÏAH 41 - KA BAIBL

¹ Te ha u bnai u bahynñiew, u Ishmael u khun u Nethaniah, u khun u Elishama, uba na u symbai bakynja syiem, bad uwei na ki rangbah jong u syiem, bad shiphew ngut ki briew bad u, ki la wan sha u Gedalaïah u khun u Ahikam sha Mispah; bad hangta ki la ïabam ja lang ha Mispah.

² Ynda kumta, u la ïeng u Ishmael u khun u Nethaniah, bad kita ki shiphew ngut ki briew kiba la don lem bad u, bad ki la pom ïa u Gedalaïah u khun u Ahikam u khun u Shaphan, da ka waitlam, bad u la pynïap ïa u, ïa uba u syiem ka Babilon u la lah pynlong nongsynshar halor ka ri.

³ U Ishmael ruh u la pynïap ïa ki Jiw baroh kiba la don lem bad u, bad u Gedalaïah keiñ, ha Mispah, bad ïa ki Khaldi ïa kiba la shem hangta, ki nongïapom keiñ.

⁴ Te ha ka sngi ka ba-ar ynda u la lah pynïap ïa u Gedalaïah bad ba ym don ba la tip ïa kata,

⁵ don kiba la wan na Shekhem, na Sheiloh, bad na Samaria, phraphew ngut ki briew keiñ, kiba la khi ïa la ki 'ñiuh tmoh bad kiba la kad la ki jaiñ, bad kiba la tar ïa lade, bad ki jingainguh bam bad ka jingiwbih ha ki kti jong ki, ban wallam ïa ki sha ka ïing U Trai.

⁶ Te u Ishmael u khun u Nethaniah u la mih noh na Mispah ban tan ïa ki, u da ïam baroh shilynter katba u la leit: te haba u la ïashem bad ki, u la ong ha ki, “Ale sha u Gedalaïah u khun u Ahikam.”

⁷ Te haba ki la poi hapdeng ka shnong, u Ishmael u khun u Nethaniah u la pynïap ïa ki, bad u la bred ïa ki hapdeng kata ka 'liewlep, ma u bad ki briew kiba la don lem bad u.

⁸ Hynrei, shiphew ngut la shem hapdeng jong ki kiba la ong ha u Ishmael, “Wat pynïap ïa ngi: namar ngi don ki jingkynshew Kew, bad Barli bad umphniang, bad ngap, bad la buhrieh ha ka lyngkha.” Kumta, u la pep noh, bad um shym la pynïap ïa ki hapdeng ki para jong ki.

⁹ Te kata ka 'liewlep, ha kaba u Ishmael u la bred ïa ki metïap baroh jong kita ki briew ïa kiba u la lah pynïap, hajan u Gedalaïah, (ka la long kata kajuh hi ïa kaba u Asa u syiem u la lah thaw namar ka jingsheptieng ïa u Baasha u syiem ki Israel,) u Ishmael u khun u Nethaniah u la pyndap ïa ka da kita ïa kiba la pynïap.

¹⁰ Ynda kumta, u Ishmael u la ring mraw noh ïa kiba sah baroh na u paidbah kiba la don ha Mispah, wat ïa ki khun kynthei u syiem, bad baroh ki briew kiba la sah ha Mispah, ïa kiba u Nebusaradan u kaptan ka karod u la lah aiti ha u Gedalaïah u khun u Ahikam: u Ishmael u khun u Nethaniah u la ring mraw noh ïa ki, bad u la mih noh ban leit sha shiliang sha ki khun u Ammon.

¹¹ Hynrei, haba u Johanan u khun u Kariah, bad baroh ki kaptan ki nongïapom kiba la don lem bad u, ki la ïohsngew ïa ka jingsniew baroh ba u Ishmael u khun u Nethaniah u la lah leh,

¹² ynda kumta, ki la shim ïa ki rangbah baroh, bad ki la leit ban ïaleh bad u Ishmael u khun u Nethaniah, bad ki la shem ïa u hajan ki um bakhraw kiba ha Gibeon.

¹³ Te haba ki briew baroh kiba la don bad u Ishmael ki la ïohi ïa u Johanan u khun u Kariah, bad ïa ki kaptan baroh ki nongïapom kiba la don bad u, hangta ki la sngewbha.

¹⁴ Kumta, baroh kita ki briew ïa kiba u Ishmael u la ring mraw noh na Mispah ki la ïaphai sawdong, bad ki la wan phai pat, bad ki la leit ha u Johanan u khun u Kariah.

¹⁵ Hynrei, u Ishmael u khun u Nethaniah bad phra ngut ki briew ki la lait na u Johanan, bad ki la leit sha ki khun u Ammon.

¹⁶ Ynda kumta, u Johanan u khun u Kariah, bad ki kaptan baroh ki nongïapom kiba la don lem bad u, ki la shim ïa ki briew baroh kiba dang sah, ïa kiba u la lah ïoh pat na u Ishmael u khun u Nethaniah, na Mispah, hadien ba u la lah pynïap ïa u Gedalaïah u khun u Ahikam, ïa ki nongïapom keiñ, bad ïa ki kynthei, bad ïa ki khynnah bad ïa ki ïunok, ïa kiba u la wallam pat na Gibeon:

¹⁷ bad ki la leit noh, bad ki la shong ha Geruth Shimham, kaba long hajan Bethlehem, ban sa leit rung sha Ijipt,

¹⁸ namar ki Khaldi: naba ki la sheptieng ïa ki, namar u Ishmael u khun u Nethaniah u la lah pynïap ïa u Gedalaïah u khun u Ahikam, ïa uba u syiem ka Babilon u la pynlong nongsynshar halor ka ri.