JEREMAÏAH 40 - KA BAIBL

U Jeremaïah lem bad ki Jiw kiba la sakma ki ïaleit sha u Gedalaïah

¹ Ka ktien kaba la wan ha u Jeremaïah na U Trai, hadien ba u Nebusaradan u kaptan jong ka karod u la pyllait ïa u na Ramah, ynda u la lah leit lam ïa u ba la khum da ki kynjri, hapdeng ki mraw Jerusalem bad Judah baroh, ïa kiba la ring mraw sha Babilon.

² Bad u kaptan jong ka karod u la shim ïa u Jeremaïah, bad u la ong ha u, “U Trai U Blei jong me u la pynbna ïa kane ka jingsniew halor kane ka jaka:

³ bad U Trai u la pynwan ïa ka, bad u la leh kumba u la kren; naba phi la leh pop ïa U Trai, bad phim shym la kohnguh ïa ka ktien jong u, namar kata, kane ka la ngat halor jong phi.

⁴ Te mynta, ha khmih, nga pyllait ïa me ha kane ka sngi na ki kynjri kiba don ha ka kti jong me. Lada ka ibit ïa me ban wan bad nga sha Babilon, to ale, bad ngan sumar bha ïa me: hynrei, lada kam ibit ïa me ban wan bad nga sha Babilon, to ieh: ha khmih, ka ri baroh ka don ha khmat jong me; kat shaba ibit bad idei ïa me ban leit, to leit shata.”

⁵ Mynta katba um pat shym phai dien, u la ong, “Khie phai pat te, sha u Gedalaïah u khun u Ahikam, u khun u Shaphan, ïa uba u syiem ka Babilon u la thung nongsynshar halor ki nongbah Judah, bad to shong bad u hapdeng ki paidbah: lane khie leit shano shano katba idei ïa me ban leit.” Kumta, u kaptan ka karod u la ai jingbam bad ka buskit ïa u, bad u la pyllait ïa u.

⁶ Ynda kumta, u Jeremaïah u la leit sha u Gedalaïah u khun u Ahikam sha Mispah, bad u la shong bad u hapdeng ki paidbah ïa kiba la pynsah ha ka ri.

⁷ Te haba ki kaptan ki paidïapom baroh kiba la don ha ki madan, ma ki hi keiñ bad ki briew jong ki, ki la ïohsngew ba u syiem ka Babilon u la thung ïa u Gedalaïah u khun u Ahikam ban long nongsynshar ha ka ri, bad ba u la ai ha u ïa ki rangbah, bad ki kynthei, bad ki khynnah, bad ïa kiba kham duk ruh jong ka ri, na kita ki bym shym la ring mraw sha Babilon;

⁸ ynda kumta, ki la ïawan sha u Gedalaïah sha Mispah, u Ishmael u khun u Nethaniah, bad u Johanan bad u Jonathan ki khun u Kariah, bad u Seriah u khun u Tanhumeth, bad ki khun u Ephai u nong Netophath, bad u Jesaniah u khun nong Maakath keiñ, ma ki bad ki briew jong ki.

⁹ Bad u Gedalaïah u khun u Ahikam u khun u Shaphan u la smai ha ki bad ha ki briew jong ki, u da ong, “Wat sheptieng ban shakri ïa ki Khaldi: to shong ha ka ri, bad to shakri ïa u syiem ka Babilon, te kan long bha bad phi.

¹⁰ Te shaphang jong nga, ha khmih, nga shong ha Mispah, ban ïeng ha khmat ki Khaldi, ki ban wan ha ngi: hynrei, ma phi, to ïalum Waiñ bad soh lyiur bad umphniang, bad buh ïa ki ha ki khiew jong phi, bad to ïashong ha ki nongbah jong phi kiba phi la shim.”

¹¹ Kumjuh haba ki Jiw baroh kiba la don ha Moab, bad hapdeng ki khun u Ammon, bad ha Edom, bad kiba la don ha ki ri baroh, ki la ïohsngew ba u syiem ka Babilon u la iehnoh ïa kiba sah na Judah, bad ba u la buh halor jong ki ïa u Gedalaïah u khun u Ahikam, u khun u Shaphan;

¹² ynda kumta, ki Jiw baroh ki la ïawan phai na ki jaka baroh sha kiba la beh noh ïa ki, bad ki la ïawan sha ka ri Judah, sha u Gedalaïah, ha Mispah, bad ki la ïalum Waiñ bad ki soh lyiur shibun eh.

Ka jingïasylla u Ishmael pyrshah ïa u Gedalaïah

¹³ Nalor kane, u Johanan u khun u Kariah, bad ki kaptan ki paidïapom baroh kiba la don ha ki madan, ki la wan sha u Gedalaïah ha Mispah,

¹⁴ bad ki la ong ha u, “Me tip ne em ba u Baalis u syiem ki khun u Ammon u la phah ïa u Ishmael u khun u Nethaniah ban shim noh ïa ka jingim jong me?” Hynrei, u Gedalaïah u khun u Ahikam um shym la ngeit ïa ki.

¹⁵ Te u Johanan u khun u Kariah u la kren jar jar ha u Gedalaïah ha Mispah, u da ong, “Shah ba ngan leit, nga kyrpad ïa me, bad ngan pynïap ïa u Ishmael u khun u Nethaniah, bad yn ym don ba tip ïa kata: balei un shim ïa ka jingim jong me, khnang ba ki Jiw baroh kiba la ïalang ha me kin saphred, bad kiba sah na Judah kin ïap?”

¹⁶ Hynrei, u Gedalaïah u khun u Ahikam u la ong ha u Johanan u khun u Kariah, “Men ym leh ïa kane ka kam: namar me shu kren lamler shaphang u Ishmael.”