JEREMAÏAH 4 - KA BAIBL

¹ “Lada men wan phai, A Israel,” ong U Trai, “sha nga keiñ men wan phai: bad lada men bred noh ïa ki jingijli jong me na khmat jong nga, te yn ym pynkynriah noh ïa me;

² bad men smai, ‘Katba im U Trai,’ ha ka jingshisha, ha ka jingbishar, bad ha ka hok; bad ki jaid bynriew kin kyrkhu ïa lade ha u, bad ha u kin sngewsarong.”

³ Naba kumne u ong U Trai ha ki briew ka Judah bad ha ka Jerusalem, “To puh ïa ka khyndew shrah jong phi, bad wat bet hapdeng ki shiah.

⁴ To otsher ïa lade ha U Trai, bad to shim noh ïa ka doh sher ka dohnud jong phi, phi ki briew ka Judah bad kiba shong ha Jerusalem: ba ïoh ka jingbitar shla jong nga kan mih noh kum ka ding, bad kan meh, ba ym don ba lah ban pynlip ïa ka, na ka bynta ka jingsniew ki jingleh jong phi.”

Ïa ka Judah la byrngem da ka jingwan hiar thma

⁵ To pyntip ha Judah, bad to pynbna ha Jerusalem; bad to ong, “Put ïa ka turoi ha ka ri: pyrta jam bad to ong, ‘To ïalang, bad ïa ngin ïaleit sha ki shnong ba la ker kynroh.’

⁶ To sieh ïa ka lama shaphang ka Seïon: phet ïap ban ïohlait, wat sangeh: naba ngan wallam ka jingsniew na shatei, bad ka jingpynjot ka bakhraw.

⁷ U sing u la wan kiew na la ka 'law bniap, bad u nongpynjot ïa ki jaid bynriew; u don ha lynti, u la leit mih noh na la ka jaka; ban pynlong kynjah ïa ka ri jong me, ba yn pynduh ïa ki shnong jong me khlem shong briew.

⁸ Namar kane, to panpoh ïa lade da ka jaiñ byrni, to lynñiar bad to kyang: Namar ka jingbitar ba-itieng U Trai kam pat shym phai noh na ngi.”

⁹ “Te kan long ha kata ka sngi,” ong U Trai, “ba ka dohnud u syiem kan jot, bad ka dohnud ki rangbah; bad ki lyngdoh kin sngewlyngngoh, bad ki nongïathuhlypa kin sngewphylla.”

¹⁰ Ynda kumta, nga la ong, “A Trai U Blei! Da shisha me la shukor shikatdei ïa une u paidlang bad ïa ka Jerusalem, da kaba ong, ‘Phin ïoh ka jingsuk;’ haba ka waitlam pynban ka pei haduh ka mynsiem.”

¹¹ Ha kata ka por, yn ong ha une u paidlang bad ha Jerusalem, “Ka lyer bashit na ki jaka jrong balyngki ha ka ri khlaw sha ka khun u paidlang jong nga, ym ban peh, lymne ban pynkhuid;

¹² ka lyer kaba pura na kine kan wan na ka bynta jong nga: mynta ruh ngan pynbna ïa ki jingbishar pyrshah ïa ki.”

¹³ Ha khmih, un wan kiew kum ki lyoh, bad ki kali jong u kum ki lyer langthari: ki kulai jong u ki long kham stet ban ïa ki pukni. Kordit ïa ngi! naba la lute ïa ngi.

¹⁴ A Jerusalem, to sait ïa la ka dohnud na ka jingbymman, ba yn pynim ïa pha. Slem katno ki jingmut basniew jong pha kin shong hapoh jong pha?

¹⁵ Naba ka ktien ka pyntip na Dan, bad ka pynbna ïa ka jingsniew na ki lum rit Ephraim:

¹⁶ to ïathuh ha ki jaid bynriew, “Ha khmih, to pynbna pyrshah ïa ka Jerusalem, ba ki nongap ki wan na ka ri kaba jngai, bad ki pynjam ïa la ka ktien pyrshah ïa ki shnong Judah.

¹⁷ Kum ki nongap ïa ka lyngkha ki ïaleh ïa ka baroh sawdong; namar ka la leh kiat pyrshah ïa nga,” ong U Trai.

¹⁸ “Ka lynti jong me bad ki jingleh jong me ki la pynïoh ïa kine kiei kiei ha me; kane ka long ka jingbymman jong me; namar ka long ka bakthang, naba ka poi haduh ka dohnud jong me.

¹⁹ “A ki snier jong nga, ki snier jong nga! nga sngewpang haduh ka dohnud hi; ïa ka dohnud jong nga la pynjynjar hapoh jong nga; ngam lah ban sngap jar; namar pha la ïohsngew, A mynsiem jong nga, ïa ka jingsawa ka turoi, ka jingmaham ka thma.

²⁰ Ïa ka jingjot halor ka jingjot la pyrta; naba ïa ka ri baroh la lute: shisyndon la lute ïa ki ïingjaiñ jong nga, bad ïa ki pyrda jong nga ha kaba shi khyllipmat.

²¹ Slem katno ngan ïohi ïa ka lama, bad ngan ïohsngew ïa ka jingsawa ka turoi?

²² “Naba ki briew jong nga ki la bieit, kim ithuh ïa nga; ki long ki khynnah ki babieit, kim don jingsngewthuh ei ei: ki long ki basian ïa ka ban leh sniew, hynrei, ïa ka ban leh bha kim tip ei ei.”

²³ Nga la ïohi ïa ka khyndew, te ha khmih, ka la kynjah bad ka la suda; bad ïa ki bneng, te kim shym don jingshai.

²⁴ Nga la ïohi ïa ki lum bah, te ha khmih, ki la khynñiuh, bad ki lum rit baroh ki la khih ñiur.

²⁵ Nga la ïohi, te ha khmih, ym shym don briew, bad ki sim bneng baroh ki la her ïap.

²⁶ Nga la khmih, te ha khmih, ka lyngkha basei soh ka la long khlaw, bad ïa ki shnong jong ka baroh la pynkyllon ha khmat U Trai, ha khmat ka jingbitar ba-itieng jong u keiñ.

²⁷ Naba kumne u ong U Trai, ka ri baroh kan long ka jingkynjah; hynrei, ngan ym pat pynkut lut.

²⁸ “Na ka bynta kane, ka khyndew kan ïam, bad ki bneng sha jrong kin ïong noh: namar nga la kren ïa kata, nga la thmu ïa kata, bad ngam shym la kylla-ka-bamut, lymne ngan ym phai noh na kata.”

²⁹ Ka shnong baroh kawei kan phet ïap na ka bynta ka jingsawa ki nongshong kulai bad ki nongrah ryntieh; ki leit sha ki 'law bniap, bad ki kiew shalor ki mawsiang: man ka shnong la iehnoh, bad ym don briew ba shong ha ki.

³⁰ Te pha, ynda la lute ïa pha, phan leh aïu? La pha pynkup ïa lade da ka jaiñ saw bthuh, la pha pyndeng ïa lade da ki jingdeng ksiar, la pha ai rong ïa la ki khmat, pha pynitynnad lehnohei ïa lade; ki nongieit jong pha ki ibeiñ ïa pha, ki wad ïa ka jingim jong pha.

³¹ Naba nga la sngew ka jingsawa kum ka jong ka kynthei kaba suhkhun, ka jingpisa kum ka jong kata kaba kha ïa la i khun nyngkong, ka jingsawa ka khun ka Seïon, kaba kut mynsiem, kaba pyiar ïa la ki kti, kaba ong, “Kordit ïa nga mynta! naba ka mynsiem jong nga ka la ïapler ha khmat ki nongpynïap.”