JEREMAÏAH 39 - KA BAIBL

Ka jingpynjot ïa ka Jerusalem

¹ Bad haba la jop noh ïa ka Jerusalem, (ha ka snem ka bakhyndai jong u Sedekaïah u syiem ka Judah, ha u bnai u bashiphew, u Nebukhadressar u syiem ka Babilon u la wan lem bad ki paidïapom jong u baroh ban ïaleh ïa ka Jerusalem, bad u la ker kut ïa ka;

² ha ka snem ka bakhatwei jong u Sedekaïah, ha u bnai u basaw, ka sngi ka bakhyndai jong uta u bnai, la pynlong ka jingpait ha kata ka nongbah:)

³ ba ki rangbah u syiem ka Babilon baroh ki la ïarung, bad ki la ïashong ha ka khyrdop pdeng, u Nergal-shar-esar, u Samgar-nebo, u Sarsekhim, u Rab-saris, u Nergal-shar-esar, u Rab-mag, ryngkat bad kita kiwei ki rangbah u syiem ka Babilon baroh.

⁴ Te haba u Sedekaïah u syiem ka Judah bad ki nongïapom baroh ki la ïohi ïa ki, ki la phet ïap, bad ki la mih noh na kata ka nongbah mynmiet, na kata ka lynti ka kper u syiem, na ka khyrdop kaba hapdeng ki ar tylli ki kynroh: bad u la mih noh sha ka lynti jong ka Arabah.

⁵ Hynrei, ki paidïapom ki Khaldi ki la beh nadien jong ki, bad ki la lap ïa u Sedekaïah ha ka madan ka Jerikho: bad haba ki la kem ïa u, ki la leit lam ïa u sha u Nebukhadressar u syiem ka Babilon ha Riblah ha ka ri Hamath, bad u la bishar ïa u.

⁶ Ynda kumta, u syiem ka Babilon u la pynïap ïa ki khun shynrang jong u Sedekaïah ha Riblah ha khmat jong u: u syiem ka Babilon u la pynïap ruh ïa ki bakhraw batri ka Judah baroh.

⁷ U la khlaw noh ruh ïa ki khmat u Sedekaïah, bad u la khum ïa u da ki kynjri, ban leit lam ïa u sha Babilon.

⁸ Bad ki Khaldi ki la wiang da ka ding ïa ka ïing u syiem, bad ïa ki ïing jong ki paidbah, bad ki la pynkyllon ïa ki kynroh ka Jerusalem.

⁹ Ynda kumta, u Nebusaradan u kaptan jong ka karod u la ring mraw noh sha Babilon ïa kiba dang sah na ki briew kiba la sah ha ka nongbah, ïa ki shipai ba la phet ruh, kiba leit hap noh sha u, bad ïa kita kiba dang sah na ki briew kiba la sah.

¹⁰ Hynrei, u Nebusaradan u kaptan jong ka karod u la pynsah ïa ki baduk na ki briew, ki bym shym la don ei ei, ha ka ri Judah, bad ha kata hi ka por u la ai ïa ki, ki brisoh Waiñ bad ki lyngkha.

Ka hukum u Nebukhadressar ban leh bha ïa u Jeremaïah

¹¹ Te u Nebukhadressar u syiem ka Babilon u la ai hukum shaphang u Jeremaïah ha u Nebusaradan u kaptan jong ka karod, u da ong,

¹² “To shim ïa u, bad khmih bha ïa u, bad wat pynmynsaw ei ei ïa u; hynrei, leh ïa u katba un ong ïa me keiñ.”

¹³ Kumta, u Nebusaradan u kaptan ka karod u la phah bad u Nebushasban, u Rab-saris, bad u Nergal-shar-esar, u Rab-mag, bad ki shakri rangbah u syiem ka Babilon baroh;

¹⁴ ki la phah, bad ki la pynmih ïa u Jeremaïah na ka phyllaw jong ka karod, bad ki la ai ïa u ha u Gedalaïah u khun u Ahikam, u khun u Shaphan, ba un leit lam ïa u sha ïing: kumta u la shong hapdeng u paidbah.

Ka jingkular U Blei ïa u Ebed-melek

¹⁵ Te ka ktien U Trai ka la wan ha u Jeremaïah, mynba dang set ïa u ha ka phyllaw jong ka karod, ka da ong,

¹⁶ “Khie leit, kren ha u Ebed-melek u nong Ethiopia, da kaba ong, ‘Kumne u ong U Trai ki paid, U Blei ki Israel: “Ha khmih, ngan pynwan ïa ki ktien jong nga halor kane ka shnong ïa ka ban sniew, bad ym ïa ka ban bha: bad yn sa pyndep ïa ki ha khmat jong me ha kata ka sngi.

¹⁷ Hynrei, ngan pyllait ïa me ha kata ka sngi,” ong U Trai: “bad yn ym ai ïa me ha ka kti kita ki briew kiba me sheptieng.

¹⁸ Namar da shisha ngan pynim ïa me, bad men ym kyllon da ka waitlam, hynrei, ka jingim jong me kan sa long kum ka jinglute ha me: namar me la buh la ka jingshaniah ha nga,” ’ ” ong U Trai.