JEREMAÏAH 38 - KA BAIBL

La pyllait ïa u Jeremaïah na ka byndi khrum

¹ Te u Shephatiah u khun u Mattan, bad u Gedalaïah u khun u Pashur, bad u Jukal u khun u Shelemaïah, bad u Pashur u khun u Malkhijah, ki la ïohsngew ïa ki ktien kiba u Jeremaïah u la kren ha u paidlang baroh, ba u ong,

² “Kumne u ong U Trai, ‘Uta uba ïaishong ha kane ka shnong un ïap da ka waitlam, da ka 'nemsniew, bad da ka jingïapkhlam: hynrei, uta u ban leit mih noh sha ki Khaldi un im keiñ, bad ka jingim jong u kan long ha u kum ka jinglute, te un im keiñ.’ ”

³ Kumne u ong U Trai, “Da shisha yn ai noh ïa kane ka shnong ha ka kti u paidïapom jong u syiem ka Babilon, bad un jop ïa ka.”

⁴ Ynda kumta, ki rangbah ki la ong ha u syiem, “To pynïap noh ïa une u briew, ngi kyrpad ïa me; namar u pyntlot ïa ki kti jong ki riewïapom kiba sah hapoh kane ka shnong, bad ïa ki kti jong u paidlang baroh, ha kaba u kren kum kita ki ktien ha ki: naba une u briew um wad ïa ka jingbha jong une u paidlang, hynrei, ïa ka jingsniew keiñ.”

⁵ Te u Sedekaïah u syiem u la ong, “Ha khmih, u don ha ka kti jong phi: naba u syiem um long uba lah ban leh ei ei pyrshah ïa phi.”

⁶ Ynda kumta, ki la shim ïa u Jeremaïah, bad ki la set ïa u ha ka byndi khrum jong u Malkhiah u khun u syiem, kaba la don hapoh phyllaw ka karod: bad ki la pynhiar shapoh ïa u Jeremaïah da ki 'sai tyllai. Bad hapoh kata ka byndi khrum ym shym la don um, hynrei, tang ka ktieh: bad u Jeremaïah u la ngam hapoh ktieh.

La pyllait ïa U Jeremaïah na ka byndi khrum

⁷ Te haba u Ebed-melek u nong Ethiopia, u ïunok, uba la don ha ka ïing u syiem, u la ïohsngew ba ki la thep ïa u Jeremaïah ha ka byndi khrum; mynba u syiem u dang shong ha ka khyrdop u Benjamin;

⁸ u Ebed-melek u la leit mih noh na ka ïing u syiem, bad u la kren ha u syiem u da ong,

⁹ “Ko kynrad syiem, kine ki briew ki la leh sniew ha baroh kaba ki la leh ïa u Jeremaïah u nongïathuhlypa ïa uba ki la thep shapoh ka byndi khrum; bad sa ba un sa ïap ha ka jaka kaba u don na ka bynta ka 'nemsniew: naba ym don kpu shuh ha ka shnong.”

¹⁰ Te u syiem u la hukum ïa u Ebed-melek u nong Ethiopia, u da ong, “To shim lem bad me nangne laiphew ngut ki rangbah, bad to sei noh ïa u Jeremaïah u nongïathuhlypa na kata ka byndi khrum, haba um pat ïap.”

¹¹ Kumta u Ebed-melek u la ïalam ïa kita ki briew bad u, bad u la leit sha ka ïing u syiem hapoh ka jaka kynshew, bad u la shim nangta ïa ki jaiñ rim kiba la bred noh bad ki jaiñ nep barim kiba la pyut, bad u la pynhiar ïa ki shapoh ka byndi khrum da ki 'sai tyllai ha u Jeremaïah.

¹² Bad u Ebed-melek u nong Ethiopia u la ong ha u Jeremaïah, “To buh mynta ïa kine ki jaiñ rim kiba la bred noh bad ïa ki jaiñ nep barim kiba la pyut hapoh ki tohtit jong me hapoh ki 'sai tyllai.” Bad u Jeremaïah u la leh kumta.

¹³ Kumta ki la khring ïa u Jeremaïah da ki 'sai tyllai, bad ki la sei noh ïa u na kata ka byndi khrum: bad u Jeremaïah u la sah ha ka phyllaw ka karod.

U Sedekaïah u wad jingmut jar jar na u Jeremaïah

¹⁴ Te u Sedekaïah syiem u la phah khot, bad u la ïalam ïa u Jeremaïah u nongïathuhlypa ha u sha ka khyrdop ka balai kaba don ha ka ïing U Trai: bad u syiem u la ong ha u Jeremaïah, “Ngan kylli ei ei ïa me; wat buhrieh ei ei ruh na nga.”

¹⁵ Te u Jeremaïah u la ong ha u Sedekaïah, “Lada nga pynpaw ïa ka ha me, hato men ym pynïap noh ïa nga? Bad lada nga ïa-ai buit ïa me, men ym sngap satia ïa nga.”

¹⁶ Kumta u Sedekaïah syiem u la smai jar jar ha u Jeremaïah, u da ong, “Katba U Trai u im, uba la thaw ïa ngi kane ka mynsiem, ngan ym pynïap noh ïa me, lymne ngan ym ai noh ïa me ha ka kti jong kine ki briew kiba wad ïa ka jingim jong me.”

¹⁷ Ynda kumta, u Jeremaïah u la ong ha u Sedekaïah, “Kumne u ong U Trai, U Blei ki paid, U Blei ki Israel: ‘Lada men leit mih noh sha ki rangbah u syiem ka Babilon, te ka mynsiem jong me kan im, bad yn ym thang shuh da ka ding ïa kane ka shnong; bad me men im, bad ka ïing jong me:

¹⁸ hynrei, lada men ym leit mih noh sha ki rangbah u syiem ka Babilon, te yn ai noh ïa kane ka shnong ha ka kti jong ki Khaldi, bad kin thang ïa ka da ka ding, bad men ym ïohlait noh na ka kti jong ki.’ ”

¹⁹ Te u Sedekaïah syiem u la ong ha u Jeremaïah, “Nga sheptieng ïa ki Jiw kiba la hap noh sha ki Khaldi, ïoh ba kin ai ïa nga ha ka kti jong ki, bad ba kin rkhiebeiñ ïa nga.”

²⁰ Hynrei, u Jeremaïah u la ong, “Kin ym aiti noh ïa me. To kohnguh, nga kyrpad ïa me, ïa ka ktien U Trai, ha kata kaba nga kren ha me: kumta kan long bha bad me, bad ka mynsiem jong me kan im.

²¹ Hynrei, lada me kyntait ban leit mih noh, kane ka long ka ktien kaba U Trai u la pyni ha nga:

²² Ha khmih, baroh ki kynthei kiba la iehnoh ha ïing u syiem ka Judah yn leit lam noh ha ki rangbah u syiem ka Babilon, bad kita ki kynthei kin ong, “ ‘Ki lok ba ithuh ithaw jong me ki la kynshu ïa me, bad ki la jop ïa me: mynta ba ki kjat jong me ki la ngam hapoh ka ktieh, ki la phai dien noh pat.’

²³ “Bad kin wallam noh ïa ki tnga jong me baroh bad ïa ki khun jong me ha ki Khaldi: bad men ym lait na ka kti jong ki, hynrei, yn kem ïa me da ka kti u syiem ka Babilon: bad men pynlong ïa kane ka shnong ka ban thang da ka ding.”

²⁴ Te u Sedekaïah u la ong ha u Jeremaïah, “Wat ai mano mano ban tip ïa kine ki ktien, bad men ym ïap.

²⁵ Hynrei, lada ki rangbah ki ïohsngew ba nga la ïakren bad me, bad ki wan ha me, bad ki ong ha me, ‘To pynpaw ha ngi mynta ïa kaei ba me la ong ha u syiem; wat buhrieh ïa ka na ngi, bad ngin ym pynïap ïa me; ruh ïa kaei ba u syiem u la ong ha me:’

²⁶ te men ong ha ki, ‘Nga la leit lam ïa la ka jingkyrpad ha khmat u syiem, ba un ym pynphai pat ïa nga sha ka ïing u Jonathan, ban ïap hangta.’ ”

²⁷ Te ki rangbah baroh ki la wan ha u Jeremaïah, bad ki la kylli ïa u: bad u la ïathuh ha ki, ïa kine ki ktien baroh kat kiba u syiem u la hukum. Kumta, kim ïakren shuh bad u; naba ym shym la tip ïa ka kam.

²⁸ Kumta, u Jeremaïah u la ïaishong hapoh ka phyllaw ka karod haduh kata ka sngi ba la jop thiaw ïa ka Jerusalem.