JEREMAÏAH 37 - KA BAIBL

La set byndi ïa u Jeremaïah

¹ Te u Sedekaïah u khun u Josaïah u la synshar kum u syiem, ha ka jaka u Konaïah u khun u Jehoïakim ïa uba u Nebukhadressar u syiem ka Babilon u la thung syiem ha ka ri Judah.

² Hynrei ma u, lymne ki shakri jong u, lymne ki briew jong kata ka ri, kim shym la shahshkor ïa ki ktien U Trai, ïa kiba u la kren da u Jeremaïah u nongïathuhlypa.

³ Te u Sedekaïah syiem u la phah ïa u Jehukal u khun u Shelemaïah, bad ïa u Sephanaïah u khun u Maaseïah u lyngdoh, sha u Jeremaïah u nongïathuhlypa, u da ong, “To duwai ha U Trai U Blei jong ngi na ka bynta jong ngi.”

⁴ Ha kane ka por, u Jeremaïah u la ïawan ïaleit hapdeng u paidbah naba kim pat shym la set byndi ïa u.

⁵ Te ki shipai u Pharaoh ki la wan mih na Ijipt: te haba ki Khaldi kiba la ker kut ïa ka Jerusalem ki la bna shaphang jong ki, ki la kynriah noh na Jerusalem.

⁶ Te la wan ka ktien U Trai ha u Jeremaïah u nongïathuhlypa, ka da ong:

⁷ “Kumne u ong U Trai, U Blei ki Israel: ‘Kumne phin ong ha u syiem ka Judah, uba la phah ïa phi ha nga ban ïakylli ïa nga, “Ha khmih, ki shipai u Pharaoh, kiba la wan ban ïarap ïa phi, kin leit phai noh sha Ijipt sha ka ri jong ki hi.

⁸ Bad ki Khaldi kin wan pat, bad kin ïaleh thma ïa kane ka nongbah; bad kin jop ïa ka, bad kin thang ïa ka da ka ding.” ’ ”

⁹ Kumne u ong U Trai: “Wat shukor ïa lade, da kaba ong, ‘Da shisha, ki Khaldi kin kynriah noh na ngi:’ naba kin ym kynriah noh.

¹⁰ Naba la phi la pom ïa ki shipai baroh jong ki Khaldi kiba ïaleh thma ïa phi, bad ba la sah sa tang kiba la mynsaw hapdeng jong ki, pynban, kin da ïaïeng man la u briew baroh ha la ka ïingjaiñ, bad kin da ïathang ïa kane ka shnong da ka ding.”

La set byndi ïa U Jeremaïah

¹¹ Te haba ki shipai jong ki Khaldi ki la kynriah noh na Jerusalem namar ba sheptieng ïa ki shipai u Pharaoh,

¹² u Jeremaïah te u la mih noh na Jerusalem ban leit sha ka ri Benjamin, ban shim ïa ka bynta jong u hangta, hapdeng u paidbah.

¹³ Te haba u la don ha ka Khyrdop Benjamin, u rangbah ki nongap phira u la don hangta, uba ka kyrteng jong u ka long “u Irijah,” u khun u Shelemaïah, u khun u Hananaïah; te u la kem ïa u Jeremaïah u nongïathuhlypa, u da ong, “Me kynriah sha ki Khaldi keiñ.”

¹⁴ Te u Jeremaïah u la ong, “Kata ka long kaba lamler; ngam kynriah sha ki Khaldi;” hynrei, um shym pynsngew ïa u: kumta, u Irijah u la kem ïa u Jeremaïah, bad u la leit lam ïa u ha ki rangbah.

¹⁵ Te ki rangbah ki la bitar ïa u Jeremaïah, bad ki la shoh ïa u, bad ki la set byndi ïa u ha ka ïing u Jonathan u nongthoh; naba ki la pynlong ka ïing byndi ïa kata.

U Sedekaïah u pan jingmut jar jar na u Jeremaïah

¹⁶ Haba u Jeremaïah u la wan hapoh ka ïing byndi khrum, bad hapoh ki pulit, bad ba u Jeremaïah u la sah hangta bun sngi;

¹⁷ ynda kumta, u Sedekaïah syiem u la phah wallam ïa u: te u syiem u la kylli ïa u jar jar ha la ïing, bad u la ong, “Don ktien ei ei na U Trai?” Te u Jeremaïah u la ong, “Don.” U la ong ruh, “Yn sa ai noh ïa me ha ka kti u syiem ka Babilon.”

¹⁸ Nalor kata, u Jeremaïah u la ong ruh ha u syiem Sedekaïah, “Ha-ei nga la leh pop ïa me, lane ïa ki shakri jong me, lane ïa une u paidbah, ba phi la set byndi ïa nga?

¹⁹ Hangno mynta ki nongïathuhlypa jong phi kiba la ïathuhlypa ha phi, ki ïa-ong, ‘U syiem ka Babilon un ym wan ïaleh ïa phi, lymne ïa kane ka ri’?

²⁰ To sngew te mynta, nga duwai ïa me, A syiem kynrad jong nga: ai ba ka jingkyrpad jong nga, nga duwai ïa me, kan long ba la pdiang sngewbha ha khmat jong me; ba men ym pynphai pat ïa nga sha ka ïing u Jonathan u nongthoh, ïoh nga ïap hangta.”

²¹ Te u Sedekaïah syiem u la hukum, bad ki la set ïa u Jeremaïah ha ka phyllaw jong ki nongap phira, bad ki la ai ïa u man la ka sngi uwei u kpu na Ka Lynti Bah Ki Nongshet Kpu, haduh ba u kpu baroh ha kata ka shnong la lut. Kumne u Jeremaïah u la sah ha ka phyllaw ki nongap phira.