Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

JEREMAÏAH 36 - KA BAIBL


Kaba thang ïa ka kot bakli

1 Bad ha ka snem ka basaw jong u Jehoïakim u khun u Josaïah, u syiem ka Judah, kane ka ktien ka la wan na U Trai sha u Jeremaïah, ka da ong,

2 “To shim ha me kawei ka kot bakli, bad to thoh ha ka ïa ki ktien baroh kiba nga la kren ha me pyrshah ïa ki Israel, bad pyrshah ïa ki Judah, bad pyrshah ïa ki jaid bynriew baroh, naduh kata ka sngi ba nga la kren ha me, na ki sngi jong u Josaïah, haduh kane ka sngi keiñ.

3 Lehse ka ïing Judah kan shahshkor ïa kata ka jingsniew baroh ïa kaba nga la thmu ban leh ha ki; ba kin phai noh uwei uwei na ka lynti basniew jong u; ba ngan ïohmap ïa ki jingleh bymhok bad ki pop jong ki.”

4 Ynda kumta, u Jeremaïah u la khot ïa u Baruk u khun u Neraïah; bad u Baruk u la thoh na ka shyntur u Jeremaïah ïa ki ktien U Trai baroh, kiba u la kren ha u, ha ka kot bakli.

5 Bad u Jeremaïah u la hukum ïa u Baruk, u da ong, “La khang khop ïa nga; ngam lah ban leit sha ïing U Trai:

6 Namar kata, khie leit ma me, bad to pule ha kata ka kot bakli, kaba me la thoh na ka shyntur jong nga, ïa ki ktien U Trai ha ki shkor jong u paidbah ha ïing U Trai ha ka sngi shah jingit: bad men pule ruh ïa ki ha ki shkor ki Judah baroh kiba la wan mih na la ki shnong.

7 Lehse kin wallam ïa ki jingkyrpad jong ki ha khmat U Trai, bad kin phai noh uwei uwei baroh na ka lynti basniew jong u: namar ka bakhraw ka jingbitar bad ka jingkhih bitar ba U Trai u la kren pyrshah ïa une u paidlang.”

8 Bad u Baruk u khun u Neraïah u la leh katba kum kata baroh kaba u Jeremaïah u nongïathuhlypa u la hukum ïa u, u da pule ha kata ka kitab ïa ki ktien jong U Trai ha ka ïing U Trai.

9 Te ha ka snem ka basan jong u Jehoïakim u khun u Josaïah, u syiem ka Judah, ha u bnai u bakhyndai, ki briew baroh ha Jerusalem, bad ki briew baroh kiba la wan na ki shnong Judah sha Jerusalem, ki la pynbna ka jingshah jingit ha khmat U Trai.

10 Ynda kumta, u Baruk u la pule ha kata ka kitab ïa ki ktien u Jeremaïah ha ka ïing U Trai, ha ka kamra u Gemaraïah u khun u Shaphan u nongthoh, ha ka phyllaw ba kham haneng, ha ka jingkhang ka Khyrdop Thymmai ka ïing U Trai, ha ki shkor ki briew baroh.

11 Te haba u Mikaïah u khun u Gemaraïah, u khun u Shaphan, u la ïohsngew na kata ka kitab ïa ki ktien jong U Trai baroh,

12 u la leit hiar sha ka ïing u syiem, sha ka kamra jong uta u nongthoh: bad ha khmih, baroh ki bakhraw batri ki ïashong hangta, u Elishama u nongthoh, bad u Delaïah u khun u Shemaïah, bad u Elnathan u khun u Akhbor, bad u Gemaraïah u khun u Shaphan, bad u Sedekaïah u khun u Hananiah, bad baroh ki bakhraw batri.

13 Te u Mikaïah u la ïathuh ha ki, ïa baroh ki ktien ba u la ïohsngew, haba u Baruk u la pule ïa kata ka kitab ha ki shkor jong u paidbah.

14 Namar kata, kita ki bakhraw batri baroh ki la phah ïa u Jehudi, u khun u Nethanaïah, u khun u Shelemaïah, u khun u Kushi, sha u Baruk, ki ïa-ong, “To shim ha ka kti jong me ïa kata ka kot 'kli, ha kaba me la pule ha ki shkor u paidbah, bad to wan.” Kumta, u Baruk u khun u Neraïah u la shim ïa kata ka kot bakli ha ka kti jong u, bad u la wan sha ki.

15 Te ki la ong ha u, “To shong mynta, bad to pule ïa kata ha ki shkor jong ngi.” Kumta u Baruk u la pule ïa ka ha ki shkor jong ki.

16 Te haba ki la ïohsngew ïa kita ki ktien baroh, ki la ïaphai uwei sha uwei pat ha ka jingsheptieng, bad ki la ong ha u Baruk, “Da shisha ngin leit ïathuh ha u syiem ïa kine ki ktien baroh.”

17 Bad ki la kylli ïa u Baruk, ki ïa-ong, “To ïathuh ha ngi, kumno me la thoh ïa kine ki ktien baroh na ka shyntur jong u?”

18 Te u Baruk u la ïathuh ha ki, “U la kren ïa kine ki ktien baroh ha nga da ka shyntur jong u, bad nga la thoh ïa ki da ka sia ha ka kitab.”

19 Te kita ki bakhraw batri ki la ong ïa u Baruk, “Khie leit, buhrieh ïa lade, ma me bad u Jeremaïah; bad wat ai mano mano ban tip hangno phi don.”

20 Bad ki la leit rung sha u syiem shapoh ka phyllaw; hynrei, ki la buh noh ïa kata ka kot bakli ha ka kamra jong u Elishama u nongthoh; bad ki la ïathuh ïa kita ki ktien baroh ha ki shkor u syiem.

21 Kumta, u syiem u la phah ïa u Jehudi ban wallam ïa kata ka kot bakli; bad u la shim noh ïa ka na ka kamra u Elishama u nongthoh. Bad u Jehudi u la pule ïa ka ha ki shkor u syiem, bad ha ki shkor kita ki bakhraw batri baroh kiba ïeng hajan u syiem:

22 U syiem te u shong ha ka ïingshong tlang ha u bnai u bakhyndai: bad la don ka ding ba-meh ha u khiew buh ding ha khmat jong u.

23 Bad haba u Jehudi u la pule lai ne saw sla, u syiem u la ot ïa ka da ka shaku, bad u la bred ïa ka ha ka ding kaba don ha uta u khiew buh ding, haduh ba ïa kata ka kot bakli baroh la thang ha kata ka ding kaba don ha uta u khiew buh ding.

24 Te kim shym la sheptieng, lymne kad ïa ki jaiñ jong ki, lymne u syiem, lymne uno uno na ki shakri jong u kiba la ïohsngew ïa kine ki ktien baroh.

25 Nalor kata, u Elnathan bad u Delaïah bad u Gemaraïah ki la lah kyrpad ïa u syiem ba un ym thang ïa kata ka kot bakli: hynrei, um sngap ïa ki.

26 Bad u syiem u la hukum ïa u Jerahmil u khun jong u syiem, bad ïa u Seraïah u khun u Asriel, bad ïa u Shelemaïah u khun u Abdil, ban leit kem ïa u Baruk u nongthoh bad ïa u Jeremaïah u nongïathuhlypa: hynrei, U Trai u la buhrieh ïa ki.

27 Te ka ktien U Trai ka la wan sha u Jeremaïah, hadien ba u syiem u la thang ïa kata ka kot bakli, bad ïa kita ki ktien ba u Baruk u la thoh na ka shyntur u Jeremaïah, ka da ong:

28 “To shim ha me ïa kawei pat ka kot bakli, bad to thoh ha ka ïa kita ki ktien kiba mynshuwa baroh kiba la don ha kata ka kot bakli banyngkong, kaba u Jehoïakim u syiem ka Judah u la thang.

29 Bad shaphang u Jehoïakim u syiem ka Judah men ong, ‘Kumne u ong U Trai: Me la thang ïa kane ka kot bakli, me da ong, Balei me la thoh ha ka, me da ong, u syiem ka Babilon un wan da shisha bad un pynjot ïa kane ka ri, bad un pynduh noh na ka bad briew bad mrad?’ ”

30 Namar kata, kumne u ong U Trai shaphang u Jehoïakim u syiem ka Judah: “Un ym ïoh ïano ïano ban shong halor ka khet u Dabid: bad ïa ka metïap jong u yn bred noh shabar mynsngi ha ka jingshit, bad mynmiet ha u thah.

31 Bad ngan pynshitom ïa u bad ïa u symbai jong u bad ïa ki shakri jong u namar ka jingleh bymhok jong ki; bad ngan wallam halor jong ki, bad halor kiba shong ha Jerusalem bad halor ki rangbah Judah, ïa ka jingsniew baroh kaba nga ïakren pyrshah ïa ki, hynrei, ki kim shym sngap.”

32 Te u Jeremaïah u la shim ïa kawei pat ka kot bakli, bad u la ai ïa ka ha u Baruk u nongthoh, u khun u Neraïah; uba la thoh ha ka na ka shyntur u Jeremaïah ïa baroh ki ktien jong kata ka kitab kaba u Jehoïakim u syiem ka Judah u la thang ha ding: bad la pynlang shuh ruh ha ki, shibun kum kita ki ktien.

The Bible Society of India

Bible Society of India
ကြှနျုပျတို့နောကျလိုကျပါ:



ကြော်ငြာတွေ