JEREMAÏAH 35 - KA BAIBL

Ka jingkohnguh ki Rekhab

¹ Ka ktien kaba la wan na U Trai ha u Jeremaïah ha ki sngi u Jehoïakim u khun u Josaïah, u syiem ka Judah, ka da ong,

² “Khie leit sha ïing ki Rekhab, bad kren ha ki, bad wallam ïa ki sha ka ïing U Trai, sha kawei na ki kamra, bad ai ka Waiñ ïa ki ban dih.”

³ Ynda kumta, nga la shim ïa u Jaasaniah u khun u Jeremaïah, u khun u Habassiniah, bad ki para jong u, bad ki khun shynrang jong u baroh, bad ka ïing ki Rekhab baroh kawei;

⁴ bad nga la wallam ïa ki sha ka ïing U Trai, sha ka kamra ki khun shynrang u Hanan u khun u Igdaliah, u briew jong U Blei, kaba hajan ka kamra ki bakhraw batri, kaba haneng ka kamra u Maaseïah u khun u Shallum, u nongap jingkhang:

⁵ bad nga la buh ïa ki pliang kiba dap da ka Waiñ, bad ïa ki khuri, ha khmat ki khun shynrang ka ïing ki Rekhab, bad nga la ong ha ki, “To dih Waiñ phi.”

⁶ Hynrei, ki la ong, “Ngin ym dih Waiñ: namar u Jonadab u khun u Rekhab u kpa jong ngi, u la hukum ïa ngi, u da ong, ‘Phin ym dih Waiñ lano lano ruh, ma phi, lymne ki khun shynrang jong phi:

⁷ lymne phin ym tei ïa ka ïing, lymne bet symbai, lymne thung brisoh, lymne ïoh ruh; hynrei, phin shong ha ki ïingjaiñ baroh ki sngi ka rta jong phi; ba phin ïoh shong bun sngi ha ka ri kaba phi ïashong.’

⁸ Bad ngi la kohnguh ïa ka ktien u Jonadab u khun u Rekhab u kpa jong ngi ha baroh ba u la hukum ïa ngi, ban ym dih Waiñ baroh ki sngi ka rta jong ngi, ma ngi, ki tnga jong ngi, ki khun shynrang jong ngi, lymne ki khun kynthei jong ngi;

⁹ lymne ban tei ïa lade ki ïing ban shong, lymne ngim don brisoh, lymne lyngkha, lymne symbai:

¹⁰ hynrei, ngi la shong ha ki ïingjaiñ, bad ngi la kohnguh, bad ngi la leh ïa baroh kat kumba u Jonadab u kpa jong ngi u la hukum ïa ngi.

¹¹ Hynrei, haba u Nebukhadressar u syiem ka Babilon u wan kiew sha kane ka ri, ngi la ong, ‘Ïa, ngin ïaleit sha Jerusalem namar ba sheptieng ïa u paidïapom ki Khaldi, bad namar ba sheptieng ïa u paidïapom ki nong Syria;’ kumta ngi shong ha Jerusalem.”

¹² Ynda kumta, la wan ka ktien U Trai ha u Jeremaïah, ka da ong:

¹³ “Kumne u ong U Trai ki paid, U Blei ki Israel: Khie leit, bad ong ha ki rangbah Judah bad kiba shong ha Jerusalem, ‘Hato phin ym pdiang ïa ka jinghikai ban sngap ïa ki ktien jong nga?’ ” ong U Trai.

¹⁴ “Ïa ki ktien u Jonadab u khun u Rekhab, kiba u la hukum ïa ki khun shynrang jong u, ban ym dih Waiñ, la pyndep, bad haduh kane ka sngi kim shym dih satia, namar ki kohnguh ïa ka hukum u kpa jong ki: hynrei, nga la kren ha phi, nga da khie dang step bad nga kren; te phim shym sngap ïa nga.

¹⁵ Nga la phah ruh ïa ki shakri jong nga ki nongïathuhlypa baroh ha phi, nga da khie dang step bad nga phah ïa ki, da kaba ong, ‘To phai phi mynta uwei pa uwei na la ka lynti basniew, bad pynbeit ïa ki jingleh jong phi, bad wat leit bud ïa kiwei pat ki blei ban shakri ïa ki, bad phi ïoh shong ha ka ri kaba nga la ai ha phi bad ha ki kpa jong phi: hynrei, phim shym la shahshkor, lymne sngap ïa nga.’

¹⁶ Namar ba ki khun shynrang u Jonadab u khun u Rekhab ki la pyndep ïa ka hukum u kpa jong ki ïa kaba u la hukum ïa ki, hynrei, une u paidbah um shym la sngap ïa nga;

¹⁷ namar kata,” kumne u ong U Trai, U Blei ki paid, U Blei ki Israel: “Ha khmih, ngan wallam halor ka Judah bad halor kiba shong ha Jerusalem baroh, ïa kata ka jingsniew baroh kaba nga la kren pyrshah ïa ki; namar nga la kren ha ki, hynrei, kim shym la sngap; bad nga la khot ïa ki, hynrei, kim shym phai ktien.”

¹⁸ Bad u Jeremaïah u la ong ha ka ïing ki Rekhab, “Kumne u ong U Trai ki paid, U Blei ki Israel: ‘Namar ba phi la kohnguh ïa ka hukum u Jonadab u kpa jong phi, bad phi la sumar ïa ki hukum jong u baroh, bad phi la leh ïa baroh kumba u la hukum ïa phi;’ ”

¹⁹ namar kata, kumne u ong U Trai ki paid, U Blei ki Israel: “u Jonadab u khun u Rekhab un ym kyrduh briew u ban ïeng ha khmat jong nga lano lano ruh.”