JEREMAÏAH 34 - KA BAIBL

Ka jingmaham U Jeremaïah pyrshah ïa U Sedekaïah

¹ Ka ktien kaba la wan ha u Jeremaïah na U Trai, haba u Nebukhadnessar u syiem ka Babilon, bad baroh u paidïapom jong u, bad baroh ki hima jong ka pyrthei kiba hapoh ka jingsynshar jong u, bad baroh kita ki kynja bynriew ki la ïaleh ïa ka Jerusalem, bad ïa ki shnong jong ka, ka da ong:

² “Kumne u ong U Trai, U Blei ki Israel, Khie leit, kren ha u Sedekaïah u syiem ka Judah, bad ïathuh ha u, ‘Kumne u ong U Trai: Ha khmih, ngan ai ïa kane ka shnong ha ka kti u syiem ka Babilon, bad un thang ïa ka da ka ding:

³ te men ym lait na ka kti jong u, hynrei, da shisha yn kem ïa me, bad yn ai noh ha ka kti jong u; bad ki khmat jong me kin ïoh khmih ïa ki khmat u syiem ka Babilon, bad un ïakren bad me da la ka shyntur, bad men leit sha Babilon.’

⁴ La kumta ruh to sngew ïa ka ktien U Trai, ko Sedekaïah u syiem ka Judah: ‘Kumne u ong U Trai shaphang jong me: Men ym ïap da ka waitlam;

⁵ men ïap ha kaba suk; bad da ki jingthang ki kpa jong me, ki syiem kiba la mynshuwa jong me, kumta kin pynlong ka jingthang ïa me ruh; bad kin ïaïambriew ïa me, da kaba ong, “A kynrad!” namar nga la kren ïa ka ktien,’ ” ong U Trai.

⁶ Te u Jeremaïah u nongïathuhlypa u la kren ïa kine ki ktien baroh ha u Sedekaïah u syiem ka Judah ha Jerusalem,

⁷ haba u paidïapom u syiem ka Babilon u la ïaleh ïa ka Jerusalem, bad ïa ki shnong jong ka Judah kiba la pynsah, ïa ka Lakhish bad ïa ka Asekah; namar ki sah sa tang kine ki shnong ker kut na ki shnong jong ka Judah.

Ka jutang ba la pynkheiñ ha ka jingïadei bad ki mraw

⁸ Ka ktien kaba la wan ha u Jeremaïah na U Trai, hadien kaba u syiem Sedekaïah u la thaw ka jutang bad ki briew baroh kiba ha Jerusalem, ban pynbna ïa ka jingpyllait ha ki;

⁹ ba u briew baroh un pyllait noh ïa la u mraw, bad u briew baroh ïa la ka mraw, kiba long u Hebru ne ka Hebru; ban ym don u ban pynshakri ïa ki ha lade, kata, ïa u Jiw u para jong u;

¹⁰ bad baroh kita ki rangbah bad kita ki briew baroh ki la kohnguh, kiba la ïateh ka jutang, ba u briew baroh un pyllait noh ïa la u mraw, bad u briew baroh ïa la ka mraw, ban ym don u ban pynshakri shuh ïa ki ha lade; ki la kohnguh bad ki la pyllait ïa ki:

¹¹ hynrei hadien kata, ki la kylla, bad ki la wallam pat ïa la ki mraw shynrang bad ki mraw kynthei, kiba ki la pyllait, bad ki la pyndem ïa ki ban long ki mraw shynrang bad ki mraw kynthei:

¹² namar kata, ka ktien U Trai ka la wan ha u Jeremaïah na U Trai, ka da ong:

¹³ “Kumne u ong U Trai, U Blei ki Israel: ‘Nga la thaw ka jutang bad ki kpa jong phi ha kata ka sngi kaba nga la wallam noh ïa ki na ka ri Ijipt, na ka ïing ka jinglongmraw, nga da ong:

¹⁴ “Ha ka bakut ka hynñiew snem phin pyllait noh uwei uwei ïa la u para uba long u Hebru, ïa uba la die ha me, bad uba la shakri ïa me hynriew snem, men pyllait noh ïa u na me:” hynrei, ki kpa jong phi kim shym la sngap ïa nga, lymne shahshkor.

¹⁵ Bad mynta phi la kylla, bad phi la leh kaba dei ha ki khmat jong nga, ha kaba pynbna ïa ka jingpyllait uwei uwei baroh ïa la u paramarjan; bad phi la thaw ka jutang ha khmat jong nga ha ka ïing kaba la khot da ka kyrteng jong nga:

¹⁶ hynrei, phi la kylla bad phi la pyntngit ïa ka kyrteng jong nga, bad phi la wallam pat uwei uwei baroh ïa la u mraw, bad uwei uwei baroh ïa la ka mraw, kiba phi la pyllait katba ki mon; bad phi la pyndem ïa ki, ban long ki mraw shynrang bad ki mraw kynthei ïa phi.’ ”

¹⁷ Namar kata, kumne u ong U Trai: “Phim shym sngap ïa nga ban pynbna ïa ka jingpyllait, uwei uwei baroh ïa la u para, bad uwei uwei baroh ïa la u paramarjan: ha khmih, nga pynbna ha phi ïa ka jingpyllait,” ong U Trai, “ïa ka waitlam, ïa ka jingïapkhlam, bad ïa ka 'nemsniew; bad ngan pynshat ïa phi kylleng ki hima ka pyrthei.

¹⁸ Bad ngan ai ïa kita ki briew kiba la ryngkang ïa ka jutang jong nga, bad ki bym shym la pyndep ïa ki ktien kata ka jutang kaba ki la thaw ha khmat jong nga, haba ki la ïaphiah ar liang ïa uta u khun masi bad ki la ïaid hapdeng ki bynta jong uta;

¹⁹ ki rangbah Judah, bad ki rangbah Jerusalem, ki ïunok, ki lyngdoh, bad ïa ki briew ka ri baroh, kiba la ïaid hapdeng ki bynta uta u khun masi;

²⁰ ngan ai keiñ ïa ki ha ka kti ki nongshun jong ki, bad ha ka kti jong kita kiba wad ïa ka jingim jong ki: bad ki metïap jong ki kin long ka jingbam ïa ki sim bneng, bad ïa ki mrad khlaw jong ka khyndew.

²¹ Te ïa u Sedekaïah u syiem ka Judah bad ïa ki rangbah jong u ngan ai noh ha ka kti ki nongshun jong ki, bad ha ka kti kita kiba wad ïa ka jingim jong ki, bad ha ka kti u paidïapom u syiem ka Babilon, kiba la leit noh na phi.

²² Ha khmih, ngan hukum,” ong U Trai, “bad ngan pynkylla pat ïa ki sha kane ka shnong; bad kin ïaleh ïa ka, bad kin jop ïa ka, bad kin thang ïa ka da ka ding; bad ngan pynlong ïa ki shnong ka Judah ki jaka kynjah, ki bymshong briew.”