JEREMAÏAH 32 - KA BAIBL

U Jeremaïah u thied ïa ka lyngkha kaba ha Anathoth

¹ Ka ktien kaba la wan ha u Jeremaïah na U Trai ha ka snem ka bashiphew u Sedekaïah u syiem ka Judah, kaba la long ka snem ka bakhatphra jong u Nebukhadressar.

² Te ha kata ka por u paidïapom u syiem ka Babilon u la ker kut ïa ka Jerusalem: bad ïa u Jeremaïah u nongïathuhlypa la set ha ka phyllaw jong ka karod, kaba la long ha ka ïing u syiem ka Judah.

³ Namar u Sedekaïah u syiem ka Judah u la set ïa u, u da ong, “Balei me ïathuhlypa, bad me ong, ‘Kumne u ong U Trai, “Ha khmih, ngan ai ïa kane ka nongbah ha ka kti u syiem ka Babilon, bad un shim ïa ka:

⁴ bad u Sedekaïah u syiem ka Judah un ym ïohlait noh na ka kti ki Khaldi, hynrei, da shisha, ïa u yn ai noh ha ka kti u syiem ka Babilon, bad un ïakren bad u markhmat, bad ki khmat jong u kin khmih ïa ki khmat jong u;

⁵ bad un ïalam ïa u Sedekaïah sha Babilon, te hangta un long, tad ynda ngan wan-i ïa u,” ’ ong U Trai: ‘la phi ïaleh bad ki Khaldi, phin ym lah?’ ”

⁶ Te u Jeremaïah u la ong, “Ka ktien U Trai ka la wan ha nga, ka da ong:

⁷ ‘Ha khmih, u Hanamel u khun u Shallum u kñi jong me un wan ha me, u da ong, “To thied ma me ïa ka lyngkha jong nga kaba ha Anathoth: namar ka hok ka jingsiewspah ka long ka jong me ban thied ïa ka.”

⁸ Kumta u Hanamel u khun u kñi jong nga u la wan ha nga ha ka phyllaw ka karod katba kum ka ktien U Trai, bad u la ong ha nga, “To thied ïa ka lyngkha jong nga, nga kyrpad ïa me, kaba ha Anathoth, kaba long ha ka ri Benjamin: namar ka hok ka jingïoh pateng ka long ka jong me, bad ka jingsiewspah ka long ka jong me; to thied ïa ka ïa lade.” ’ ” Te nga la tip ba kane ka la long ka ktien jong U Trai.

⁹ Te nga la thied ïa kata ka lyngkha kaba ha Anathoth na u Hanamel u khun u kñi jong nga, bad nga la thew ïa ki sbai ha u, khathynñiew shekel rupa keiñ.

¹⁰ Te nga la soi ïa ka kot, bad nga la pyndait laha ïa ka, bad nga la khot ki sakhi, bad nga la thew ha u ïa ki sbai ha ka tarajur.

¹¹ Kumta nga la shim ïa kata ka kot thied, ïa kata kaba la pyndait laha katba kum ka aiñ bad ka rukom, bad ïa kata ruh ka bym shym la pyndait:

¹² Te nga la aiti ïa ka kot thied ha u Baruk u khun u Neraïah, u khun u Mahseïah, ha khmat u Hanamel u khun u kñi jong nga, bad ha khmat ki sakhi kiba la soi ïa ka kot thied, ha khmat baroh ki Jiw kiba la shong ha ka phyllaw ka karod.

¹³ Te nga la hukum ïa u Baruk ha khmat jong ki, nga da ong,

¹⁴ “Kumne u ong U Trai ki paid, U Blei ki Israel: ‘Shim ïa kine ki kot, ïa kane ka kot thied, ïa kata kaba la pyndait laha, bad ïa kane ka bym shym pyndait, bad to thep ïa ki ha u khiew khyndew; ba ki lah ban sah bun sngi.’ ”

¹⁵ Namar kumne u ong U Trai ki paid, U Blei ki Israel: “Ïa ki ïing bad ïa ki lyngkha bad ïa ki brisoh Waiñ yn dang ïathied pat ha kane ka ri.”

¹⁶ Te ynda nga la lah aiti ïa ka kot thied ha u Baruk u khun u Neriah, nga la duwai ha U Trai, nga da ong,

¹⁷ “A Trai U Blei! ha khmih, me la thaw ïa ka bneng bad ïa ka khyndew da ka borbah jong me bad da ka ksang'ti ba la kner jong me; ym don ei ei ka bym lah bad me:

¹⁸ uba leh ïa ka jingisynei ha ki hajar, bad uba siew bainong ïa ka pop ki kpa ha ka shadem ki khun jong ki, hadien jong ki: U Blei bakhraw, bad badonbor, ‘U Trai ki paid’ long ka kyrteng jong u:

¹⁹ u bakhraw ha ka jingpyrkhat, bad u badonbor ha ka kam; uba ki khmat jong u ki peit ha ki lynti baroh jong ki khun bynriew; ban ai ha uwei uwei baroh katba kum ki lynti jong u, bad katba kum u soh ki jingleh jong u:

²⁰ uba la buh ki dak bad ki jingphylla ha ka ri Ijipt haduh kane ka sngi keiñ, kumjuh ha Israel bad hapdeng kiwei pat ki briew; bad uba la pynlong ïa lade ka kyrteng, kumba ka long ha kane ka sngi;

²¹ bad uba la ïalam noh ïa la ki briew ki Israel na ka ri Ijipt da ki dak, bad da ki jingphylla, bad da ka kti bakhlaiñ, bad da ka ksang'ti ba la kner, bad da ka jingitieng bakhraw;

²² bad uba la ai ïa ki kane ka ri, ïa kaba me la smai ha ki kpa jong ki ban ai ha ki, ka ri kaba tuid da ka dud bad ka ngap;

²³ te ki la wan, bad ki la ïoh ïa ka; hynrei, kim shym la kohnguh ïa ka ktien jong me, lymne ïaid ha ka hukum jong me; kim shym la leh ei ei na kata baroh ba me la hukum ïa ki ban leh: namar kata, me la pynwan ha ki ïa kane baroh ka jingsniew:

²⁴ ha khmih, ki kynton ïaleh ki la wan sha ka nongbah ban jop ïa ka; bad ïa ka nongbah la ai noh ha ka kti ki Khaldi kiba ïaleh ïa ka; namar ka waitlam, bad namar ka 'nemsniew, bad namar ka khlam: te kata kaba me la kren ka la jia; bad, ha khmih, me ïohi ïa ka.

²⁵ Te me la ong ha nga, A Trai U Blei, ‘To thied ma me ïa ka lyngkha da ki tyngka, bad to khot ki sakhi;’ la ïa ka nongbah la ai noh ha ka kti ki Khaldi.”

²⁶ Ynda kumta, la wan ka ktien U Trai ha u Jeremaïah, ka da ong,

²⁷ “Ha khmih, nga long U Trai, U Blei ka doh baroh: don ka bym lah bad nga?”

²⁸ Namar kata, kumne u ong U Trai: “Ha khmih, ngan ai noh ïa kane ka nongbah ha ka kti jong ki Khaldi, bad ha ka kti u Nebukhadressar u syiem ka Babilon, bad un jop ïa ka;

²⁹ te ki Khaldi, kiba ïaleh ïa kane ka nongbah, kin wan bad kin wiang ding ïa kane ka nongbah, bad kin thang ïa ka, lem bad ki ïing, halor jrong ïing jong kiba ki la ai jingiwbih ha u Baal, bad ki la theh ki jingainguh dih ha kiwei pat ki blei, ban pankwah ïa nga ban bitar.

³⁰ Namar ki khun Israel bad ki khun Judah ki la leh tang ïa ka basniew ha khmat jong nga naduh ka jinglong khynnah jong ki: namar ki khun Israel ki tang pankwah ïa nga ban bitar da ka jingleh ki kti jong ki,” ong U Trai.

³¹ “Namar kane ka nongbah ka la long ha nga ka jingpankwah ban bitar bad ban bitar shla naduh ka sngi ba ki la tei ïa ka haduh kane ka sngi keiñ; ba nga dei ban weng noh ïa ka na khmat jong nga:

³² namar baroh kata ka jingsniew ki khun Israel bad jong ki khun Judah, ïa kaba ki la leh ban pankwah ïa nga ban bitar, ma ki, ki syiem jong ki, ki rangbah jong ki, ki lyngdoh jong ki, bad ki nongïathuhlypa jong ki, bad ki rangbah Judah, bad kiba shong ha Jerusalem.

³³ Te ki la phai ingdong sha nga, te ym ka khmat: bad la nga la hikai ïa ki, nga da khie dang step bad nga hikai ïa ki; pynban, kim shym shahshkor ban pdiang la ka jinghikai.

³⁴ Hynrei, ki la buh ïa ki jingijli jong ki ha ka ïing ïa kaba la khot da ka kyrteng jong nga, ban pyntngit ïa ka.

³⁵ Bad ki la tei ïa ki jaka bajrong jong u Baal, kiba long ha ka them u khun u Hinnom, ban pynïaid ïa ki khun shynrang bad khun kynthei jong ki lyngba ïa ka ding sha u Molek; ïa kaba ngam shym la hukum ïa ki, lymne kam shym la poi ha ka jingmut jong nga, ba kin leh ïa kane ka jingijli; ban pynleh pop ïa u Judah.”

³⁶ Bad namar kata te, kumne u ong U Trai, U Blei ki Israel, shaphang kane ka nongbah ïa kaba phi ong, “La ai ïa ka ha ka kti u syiem ka Babilon da ka waitlam, bad da ka 'nemsniew, bad da ka jingïapkhlam:”

³⁷ “Ha khmih, ngan ïalum ïa ki na ki ri baroh, sha kiba nga la beh noh ïa ki ha ka jingbitar jong nga, bad ha ka jingshla jong nga, bad ha ka jingbitar lep; bad ngan wallam pat ïa ki sha kane ka jaka, bad ngan pynshong suk ïa ki:

³⁸ bad kin long ki briew jong nga, bad ngan long U Blei jong ki:

³⁹ bad ngan ai ïa ki kawei ka dohnud bad kawei ka lynti ba kin ïoh sheptieng ïa nga ha la ka rta; namar ka jingbha jong ki, bad jong ki khun jong ki hadien jong ki:

⁴⁰ bad ngan thaw ka jutang bymjukut bad ki, ba ngan ym phai lyndet na ki, ïa ka ban leh bha ïa ki; bad ngan buh ïa ka jingsheptieng jong nga ha ka dohnud jong ki, ba kin ym kynriah noh na nga.

⁴¹ Shisha, ngan kmen halor jong ki ïa ka ban leh bha ïa ki, bad da shisha ngan thung ïa ki ha kane ka ri da ka dohnud jong nga baroh bad da ka mynsiem jong nga baroh.”

⁴² Namar kumne u ong U Trai: “Kumjuh hi kumba nga la wallam ïa kane ka jingsniew bakhraw baroh halor une u paidlang, kumta ruh ngan wallam halor jong ki baroh ïa ka jingbha ba nga la kular ïa ki.

⁴³ Te ïa ki lyngkha yn ïathied ha kane ka ri, shaphang kaba phi ong, ‘Ka la long kynjah, khlem u briew ne u mrad; la ai noh ïa ka ha ka kti ki Khaldi.’

⁴⁴ Ki briew kin thied ïa ki lyngkha da ki sbai, bad kin soi ïa ki kot, bad kin pyndait laha ïa ki, bad kin khot ki sakhi, ha ka ri Benjamin, bad ha ki jaka sawdong ka Jerusalem, bad ha ki nongbah jong ka Judah, bad ha ki nongbah ka ri lum, bad ha ki nongbah ka ri them, bad ha ki nongbah ka ri shathie: namar ngan pynphai noh ïa ka jinglongmraw jong ki,” ong U Trai.