JEREMAÏAH 31 - KA BAIBL

¹ “Ha kata ka por,” ong U Trai, “ngan long U Blei jong ki ïing Israel baroh, bad kin long ki briew jong nga.”

² Kumne u ong U Trai: “Ki briew kiba la lait na ka waitlam ki la shem ka jingisynei ha ka ri khlaw; u Israel keiñ, haba nga la leit ban pynshong thait ïa u.”

³ La slem U Trai u la mihpaw ha nga, u da ong, “Shisha, nga la ieit ïa pha da ka jingieit bymjukut: namar kata, da ka jingleh ieit nga la ring ïa pha.

⁴ Ngan tei pat ïa pha, bad phan long ïa kaba la tei, ko theisotti Israel: yn sa pynkieng pat da ki kanjari jong pha, bad phan leit mih ha ki jingïashad jong kita kiba leh kmen.

⁵ Phan sa thung brisoh Waiñ pat halor ki lum Samaria: ki nongthung kin thung, bad kin bam ïa u soh jong ki.

⁶ Naba ka sngi kan poi, ba ki nongap halor ki lum Ephraim kin ïapyrta, ‘To ïeng phi, ïa ngin ïaleit kiew sha Seïon sha U Trai U Blei jong ngi.’ ”

⁷ Naba kumne u ong U Trai, “To rwai da kaba kmen na ka bynta u Jakob, bad to risa na ka bynta ki rangbah ki jaid bynriew: ïa-pynbna phi, to ïaroh phi, bad to ong, ‘A Trai, pynim ïa ki briew jong me, kiba sah na ki Israel.’

⁸ Ha khmih, ngan wallam ïa ki na ka ri shatei, bad ngan ïalum ïa ki na ki bakut ka khyndew, bad ryngkat bad ki, ïa u matlah bad u dkoh, ïa kaba punkhun bad kata kaba suhkhun lang: kin ïaphai pat shata shi kynhun bah.

⁹ Kin sa ïawan da kaba ïam, bad da ki jingkyrpad ngan ïalam ïa ki: harud ki wah um ngan pynïaid ïa ki, na ka lynti kaba beit, ha kaba kin ym jynthut: namar nga long u kpa ïa ki Israel, bad u Ephraim u long u khun nyngkong jong nga.”

¹⁰ “To sngew ïa ka ktien U Trai, ko phi ki jaid bynriew, ban pynpaw ïa ka ha ki 'dewlynnong kiba jngai: bad to ong, ‘uta uba la pynsakma ïa u Israel un lum pat ïa u, bad un sumar ïa u, kumba u nongaplangbrot u leh ïa la ka kynhun.’

¹¹ Naba U Trai u la siewspah ïa u Jakob, bad u la pyllait ïa u na ka kti jong uta uba kham khlaiñ ïa u.

¹² Bad kin sa ïawan rwai ha u lum Seïon, bad kin sa ïatuid lang sha ka jingbha jong U Trai, sha u Kew, bad sha ka Waiñ, bad sha ka umphniang, bad sha ki khun blang bad ki khun masi: bad ka mynsiem jong ki kan long kum ka kper ba la ai um, bad kin ym ïasngewsih shuh lano lano ruh.

¹³ Ynda kumta, ka theisotti kan sa kmen ha kaba shad, bad ki samla shynrang bad ki tymmen lang: namar ngan pynkylla ïa ka jingïam jong ki sha ka jingkmen bad ngan pyntngen ïa ki, bad ngan pynkmen ïa ki na ka jingsngewsih jong ki.

¹⁴ Bad da ka jingkhleiñ ngan pynkdang ïa ka mynsiem ki lyngdoh, bad da ka jingbha jong nga yn pynhun ïa ki briew jong nga,” ong U Trai.

¹⁵ Kumne u ong U Trai: “Ha Ramah la ïohsngew ïa ka jingsawa ka jinglynñiar, bad kaba ïam kthang eh, ka Rakhel ka da ïam na ka bynta la ki khun; kam treh ban pyntngen ïa ka na ka bynta ki khun jong ka, namar ba kim don shuh.”

¹⁶ Kumne u ong U Trai: “To khang noh la ka ktien na kaba ïam, bad la ki khmat na ki ummat: namar ïa ka kam jong pha yn sa ai nong,” ong U Trai; “bad kin sa wan pat na ka ri jong u nongshun.

¹⁷ Bad don jingkyrmen ïa ka por bakhatduh jong pha,” ong U Trai; “bad ki khun jong pha kin sa ïawan pat sha la ki pud.

¹⁸ Shisha nga la ïohsngew ïa u Ephraim ba u da ud ïa lade kumne, ‘Me la sympat ïa nga, bad nga la ïoh jingsympat, kum i khun masi i bym pat mlien ïa ka lyngkor: to pynphai ma me ïa nga, te yn sa pynphai ïa nga; naba me long U Trai U Blei jong nga.

¹⁹ Shisha, hadien ba la pynphai ïa nga, nga la kylla-ka-bamut; bad hadien ba la hikai ïa nga, nga la thab ïa la ka lbong: nga la lehrain, shisha, nga la shaïong, namar nga la shah ïa ki jingkrenbeiñ ïa ka jinglong samla jong nga.’

²⁰ U Ephraim u long u khun ba-ieit jong nga? U long u khun uba itynnad? Namar katno katno sien ba nga kren pyrshah ïa u, nga shu dang kynmaw kyndiang ïa u: namar kata, la pynkhih ïa ki snier jong nga na ka bynta jong u; da shisha ngan isynei ïa u,” ong U Trai.

²¹ “To phan thung ki jingkdew lynti, to phan thaw ki dieng pynbeit lynti: to pynbeit la ka dohnud sha ka lynti bah, kata ka lynti kaba pha la leit keiñ: to phai pat, A theisotti Israel, to phai pat sha kine ki nongbah jong pha.

²² Sa katno phan dang leit shane bad shatai, A pha ka khun baphai dien? naba U Trai u la thaw kaba khyllah ha ka khyndew, ka kynthei kan piam ïa u rangbah.”

²³ Kumne u ong U Trai ki paid, U Blei ki Israel: “Te kin dang kren pat ïa kane ka ktien ha ka ri Judah, bad ha ki shnong jong ka, haba ngan pynphai pat ïa ka jinglongmraw jong ki: “ ‘U Trai un kyrkhu ïa me, A ka jaka shong jong ka hok, A u lum bah ka jingkhuid.’

²⁴ “Bad ka Judah bad ki shnong jong ka baroh kin shong lang hangta; ki nongrep, bad kita kiba ïamih bad ki kynhun langbrot.

²⁵ Naba nga la pynhun ïa ka mynsiem bathait, bad nga la pyndap ïa ka mynsiem baroh kaba khuslai.”

²⁶ Hamar kane nga la kyndit, bad nga la khmih; bad ka jingïohthiah jong nga ka bang eh ïa nga.

Ka jutang ka bathymmai

²⁷ “Ha khmih, ki sngi kin poi,” ong U Trai, “ba ngan bet ïa ka ïing Israel bad ïa ka ïing Judah da u symbai u briew, bad da u symbai u mrad.

²⁸ Bad kan jia ba kumba nga la ap ïa ki ban rat noh bad ban pyntwa noh, bad ban pynkyllon bad ban pynjot noh, bad ban pynshitom; kumta hi ngan ap ïa ki ban tei bad ban thung,” ong U Trai.

²⁹ “Ha kita ki sngi kin ym ong shuh, “ ‘Ki kpa ki la ïabam ïa ki soh Dumbur ki bajew, bad ki bniat ki khun ki shyrkhei.’

³⁰ “Hynrei, uwei uwei baroh un ïap na ka bynta la ka jong ka jingbymhok: uwei pa uwei uba bam ïa ki soh Dumbur ki bajew, ki bniat jong u hi kin shyrkhei.

³¹ “Ha khmih, ki sngi kin poi,” ong U Trai, “ba ngan thaw ïa ka jutang bathymmai bad ka ïing Israel, bad ka ïing Judah ruh:

³² ym kum kata ka jutang kaba nga la thaw bad ki kpa jong ki ha ka sngi ba nga la btin ïa ki na ka kti ban wallam ïa ki na ka ri Ijipt; ïa kata ka jutang jong nga ki la pynkheiñ, la nga la long u tnga ïa ki,” ong U Trai.

³³ “Hynrei, kane ka long ka jutang ba ngan thaw bad ka ïing Israel hadien kita ki sngi,” ong U Trai; “ngan buh ïa ka hukum jong nga ha ki bynta kiba shapoh jong ki, bad ngan thoh ïa ka ha ka dohnud jong ki; bad ngan long U Blei jong ki, bad ki kin long ki briew jong nga:

³⁴ bad kin ym hikai shuh uwei uwei ïa la u paramarjan, bad uwei uwei ïa la u para, da kaba ong, ‘To tip ïa U Trai:’ namar ki baroh kin sa ithuh ïa nga, naduh uba poh tam haduh u bakhraw tam na ki,” ong U Trai: “namar ngan map ïa ka jingbymhok jong ki, bad ngan ym kynmaw shuh ïa ka pop jong ki.”

³⁵ Kumne u ong U Trai, u ba ai ïa ka sngi ban long jingshai mynsngi, bad ïa ki rukom u bnai bad ki khlur ban long ka jingshai mynmiet, uba kynroi ïa ka duriaw, ba ki jingat phyllung jong ka kin kyrhuh; “U Trai ki paid” long ka kyrteng jong u:

³⁶ “Lada kine ki jingbuh rukom ki leit noh na khmat jong nga,” ong U Trai, “kumta u symbai Israel ruh un duh noh na ka ban long ka jaid bynriew ha khmat jong nga ha la ka rta.”

³⁷ Kumne u ong U Trai: “Lada lah ban thew ïa ka bneng sha jrong, bad ban ïitbniah ruh ïa ki nongrim ka khyndew shapoh, te nga ruh ngan kyntait noh ïa u symbai Israel baroh na ka bynta kata baroh kaba ki la leh,” ong U Trai.

³⁸ “Ha khmih, ki sngi kin poi,” ong U Trai, “ba yn tei ïa ka nongbah ha U Trai naduh ka kut Hananil haduh ka Khyrdop Dong.

³⁹ Bad u ksai thew un nang leit beit shaphrang haduh u lum Gareb, bad un phai sawdong sha Goah.

⁴⁰ Bad ki ri them ki metïap baroh, bad ka jong ka dpei, bad ki lyngkha baroh haduh ka wah duid Kidron, haduh ka dong ka Khyrdop Kulai shaphang mihngi, kan long ka bakyntang ha U Trai; yn ym rat shuh, lymne pynkyllon ïa ka shuh ha la ka rta.”