JEREMAÏAH 30 - KA BAIBL

Ka jingkular ïa ka jingwan phai pat ki Israel

¹ Ka ktien kaba la wan ha u Jeremaïah na U Trai, ka da ong,

² “Kumne u kren U Trai, U Blei ki Israel, u da ong: ‘To men thoh ïa ki ktien baroh kiba nga la kren ha me ha ka kitab.

³ Namar, ha khmih, ki sngi ki wan,’ ” ong U Trai, “ba ngan pynphai pat ïa ka jinglongmraw u paidlang jong nga, ki Israel bad ki Judah,” ong U Trai: “bad ngan pynphai pat ïa ki sha ka ri kaba nga la ai ha ki kpa jong ki, bad kin ïoh ïa ka.”

⁴ Bad kine ki long ki ktien kiba U Trai u la kren shaphang ki Israel bad shaphang ki Judah:

⁵ Namar kumne u ong U Trai: “Ngi la ïohsngew ïa ka ktien ka jingkhynñiuh, ka jingsheptieng, bad ym ka jong ka jingsuk.

⁶ To phin kylli mynta, bad to khmih la u briew u ju suhkhun: namar balei ba nga ïohi ïa u briew baroh bad la ki kti ha ka syngkai jong u, kum ka briew ha kaba suhkhun, bad ki khmat baroh ki la kylla lam lieh?

⁷ Dur lanot! namar kata ka sngi ka long ka bakhraw, kumta ba ym don kano kano kaba kum ma ka: ka long ka por jynjar u Jakob; hynrei, un ïohlait im noh na ka.

⁸ “Bad kan jia ha kata ka sngi,” ong U Trai ki paid, “ba ngan pynkheiñ ïa ka lyngkor jong u na ka ryndang jong me, bad ngan pyndkut ïa ki jingkhum jong me; bad ki nongwei kin ym ïoh pynshakri shuh ïa lade da u:

⁹ hynrei, kin shakri ïa U Trai U Blei jong ki, bad ïa u Dabid u syiem jong ki, ïa uba ngan pynmih ha ki.

¹⁰ “Namar kata, wat sheptieng, ko Jakob, u shakri jong nga,” ong U Trai; “lymne wat khaw-eit, ko Israel: namar, ha khmih, ngan pynim ïa me na jngai, bad ïa u symbai jong me na ka ri ka jinglongmraw jong ki; bad u Jakob un wan phai pat, bad un long jai jai, bad ha kaba suk, bad yn ym don mano mano u ban pynsheptieng ïa u.

¹¹ Namar nga long lem bad me,” ong U Trai, “ban pynim ïa me: namar ngan pynduh khoit ïa ki jaid bynriew baroh sha kiba nga la pynphriang ïa me, hynrei, ngan ym pynduh khoit ïa me; hynrei, ngan sneng pynbeit ïa me da ka jingbishar, bad haba da lei lei ngan ym iehnoh ïa me khlem da pynshitom.”

¹² Namar kumne u ong U Trai: “Ka jingmynsaw jong me ka long ka bym lah pynkhiah, bad ka jingmong jong me kaba jur.

¹³ Ym don mano mano ban ïasaid ïa ka kam jong me, ba yn lah ban sop spaiñ ïa me: mem don ki dawai bapynkhiah.

¹⁴ Kiba ieit ïa me baroh ki la klet noh ïa me; kim wad shuh ïa me: naba nga la pynmong ïa me da ka jingmong u nongshun, da ka jingsympat jong uba runar; namar ka bakhraw ka jingbymhok jong me, namar ki pop jong me ki la man bun.

¹⁵ Balei me ïam namar ka jingmynsaw jong me? Ka jingpang jong me ka long ka bym lah pynkhiah: namar ka bakhraw ka jingbymhok jong me, namar ba ki pop jong me ki la man bun, nga la leh ïa kine kiei kiei ha me.

¹⁶ Namar kata, ïa kita baroh kiba bam duh ïa me yn bam duh noh; bad ki nongshun jong me baroh uwei pa uwei na ki kin leit sha ka jinglongmraw; ba kita kiba pynjot ïa me kin long ka jingjot, bad ïa kita baroh kiba lute ïa me ngan ai ban long ka jinglute.

¹⁷ Naba ngan ai pat ka jingkoit jingkhiah ha me, bad ngan pynkhiah ïa me na ki jingmong jong me,” ong U Trai; “namar ki la khot ïa me uba la kyntait noh, ki ïa-ong, ‘Ka long ka Seïon ïa ka bymdon ba wad shuh!’ ”

¹⁸ Kumne u ong U Trai: “Ha khmih, ngan pynphai pat ïa ka jinglongmraw jong ki ïingjaiñ u Jakob, bad ngan isynei ïa ki jaka shong jong u; bad yn tei ïa ka nongbah halor ka kynton jong ka hi; bad ka ïingsyiem kan sah katba kum ka rukom jong ka.

¹⁹ Bad na ki, kan mih ka jingainguh bad ka jingsawa jong kita kiba ïalehkmen; bad ngan pynroi ïa ki, te kin ym long kiba khyndiat; ngan pyndonburom ruh ïa ki, te kin ym long ki barit.

²⁰ Ki khun jong ki ruh kin long kumba mynshuwa, bad u paidlang jong ki un long uba la pynskhem ha khmat jong nga, bad ngan pynshitom ïa kita baroh kiba banbor ïa ki.

²¹ Bad u syiem jong ki un long napdeng jong ki hi, bad u nongsynshar jong ki un mih napdeng jong ki: bad ngan pynwan ïa u hajan, bad un wan sha jan jong nga: namar uei uta uba la ïoh ka jingshlur ban wan sha jan jong nga?” ong U Trai.

²² “Te phin long ki briew jong nga, bad nga ngan long U Blei jong phi.”

²³ Ha khmih, ka 'erïong jong U Trai, ka jingbitar jong u keiñ, ka la mih noh, ka 'erïong kaba sar noh: kan paswut halor ka khlieh jong ki bymman.

²⁴ Ka jingbitar ba-itieng jong U Trai kan ym wan phai pat, tad ynda u la pyndep, bad tad ynda u la leh ïa ki jingthmu ka dohnud jong u: ha ki sngi ki bakhatduh phin sa sngewthuh ïa ka.