JEREMAÏAH 3 - KA BAIBL

¹ Ki ong, “Lada u briew un pyllait noh ïa la ka tnga, bad ba kan leit noh na u, bad kan long ka jong uwei pat u briew, te un leit phai pat sha ka? yn ym pyntngit shikatdei eh ïa kata ka ri? Hynrei, pha la leh nuti bad shibun ki nongieit; pynban, to wan phai pat sha nga,” ong U Trai.

² “To khmied ïa la ki khmat sha ki jaka jrong balyngki, bad khmih; hangno kim shym la thiah bad pha? Harud lynti pha la shong ap ïa ki, kum ka nong Arab ha ri khlaw; bad pha la pyntngit ïa ka ri da la ka jingleh klim bad da ka jingleh bymman.

³ Namar kata, la khang ïa u 'lap praw, bad ym shym la don 'lap khatduh shuh; pynban, pha la don ka shyllangmat ka nuti, pham shym treh de ban sngewlehrain.

⁴ Naduh mynta, phan ym kyang ha nga, ‘Ko Kpa, me long u nongïalam ka jinglong samla jong nga?

⁵ Un bat sah ïa la ka jingbitar junom? Un ri ïa ka haduh ka bakut?’ Ha khmih, pha la kren bad pha la leh ïa kiei kiei ki basniew, bad pha la ïoh ïa la ka lynti.”

U Blei u khot ïa ki Israel bad Judah ban kylla-ka-bamut

⁶ U Trai u la kren ruh ha nga ha ki sngi u Josaïah u syiem, “Me la ïohi ïa kata kaba ka Israel baphai dien ka la leh? Ka la leit kiew halor u lum bajrong baroh bad hapoh u dieng bajyrngam baroh, bad hangta ka la leh nuti.

⁷ Te nga la ong hadien ba ka la lah leh ïa kine kiei kiei baroh, ‘Kan wan phai pat sha nga;’ hynrei, kam shym la wan phai: bad ka para bashetkylla jong ka, ka Judah ka la ïohi ïa kata.

⁸ Te nga la ïohi, haba na ka bynta kane ka daw ba ka Israel baphai dien ka la lah klim, nga la pyllait noh ïa ka bad nga la ai ïa ka, ka kot iehnoh, pynban, ka Judah bashetkylla, ka para jong ka, kam shym sheptieng; hynrei, ka ruh ka la leit bad la leh nuti de.

⁹ Bad da ka jingleh sting ka jingleh nuti jong ka, ïa ka ri la pyntngit, bad ka la ïaklim bad ki maw bad ki dieng.

¹⁰ La kumta ruh ka para bashetkylla jong ka, ka Judah kam shym la phai ha nga da ka dohnud jong ka baroh, hynrei, da kaba arsap,” ong U Trai.

¹¹ Te U Trai u la ong ha nga, “Ka Israel baphai dien ka la pynpaw ïa lade kaba kham hok ban ïa ka Judah bashetkylla.

¹² To khie leit pynbna ïa kine ki ktien shaphang shatei, bad to ong, “ ‘To phai pat, pha ka Israel baphai dien,’ ong U Trai; ‘ngan ym khmih ha pha ha ka jingbitar: naba nga uba isynei,’ ong U Trai, ‘ngan ym bat ïa ka jingbitar junom.

¹³ To tang shu phla ïa la ka jingleh bymhok, ba pha la leh palat ïa U Trai U Blei jong pha, bad pha la pynsakma ïa la ki lynti ha ki nongwei hapoh u dieng bajyrngam baroh, bad pham shym la kohnguh ïa ka ktien jong nga,’ ong U Trai.

¹⁴ ‘To phai, ko ki khun baphai dien,’ ong U Trai; ‘naba nga long u tnga ïa phi: bad ngan shim ïa phi uwei na kawei ka shnong, bad ar ngut na kawei ka ïing, bad ngan leit lam ïa phi sha Seïon:

¹⁵ “ ‘Bad ngan ai ïa phi ki nongaplangbrot kiba kat kum ka dohnud jong nga, ki ban bsa ïa phi da ka jingtip bad ka jingshemphang.

¹⁶ Te kan long, ynda phi la roi bad la man bun ha ka ri ha kita ki sngi,’ ” ong U Trai, “kin ym ong shuh, ‘Ka synduk ka jutang U Trai;’ lymne kan ym jia ha ka jingmut: lymne kin ym kynmaw ïa ka; lymne kin ym leit khmih ïa ka; lymne yn ym leh shuh ïa kata.

¹⁷ Ha kata ka por, kin khot ïa ka Jerusalem ‘ka khet jong U Trai’; bad yn ïalum lang ïa ki jaid bynriew baroh ha ka, sha ka kyrteng U Trai, ha Jerusalem keiñ; lymne kin ym ïaid shuh kat kum ka jingmutlop ka dohnud basniew jong ki.

¹⁸ Ha kita ki sngi, ka ïing Judah kan ïaid ryngkat bad ka ïing Israel, bad kin ïamih lang na ka ri kaba shaphang shatei sha kata ka ri kaba nga la ai ban long ka ri kynti ïa ki kpa jong phi.

¹⁹ “ ‘Hynrei, nga la ong, “Kumno ngan buh ïa me hapdeng kita ki khun, bad ai ïa me ka ri basngewtynnad ka ri kynti kaba itynnad jong ki paidbah ki jaid bynriew?” Bad nga la ong, “Phin khot ïa nga, ‘ko Kpa jong nga’; bad phin ym phai noh na kaba bud ïa nga.

²⁰ Da shisha, kumba ka tnga da kaba shetkylla ka leit noh na la u tnga, kumta phi la shetkylla ïa nga, A ka ïing Israel,” ’ ” ong U Trai.

²¹ Ïa ka ktien la sngew halor ki jaka jrong balyngki, ka jinglynñiar bad ki jingkyrpad ki khun Israel keiñ; namar ki la pynkylla ïa la ka lynti, ki la klet ïa U Trai U Blei jong ki.

²² “To wan phai, phi ki khun baphai dien, te ngan pynkhiah ïa ki jingphaidien jong phi.” “Ha khmih, ngi la wan sha me; naba me long U Trai U Blei jong ngi.

²³ Shisha, kaba lehnohei kata ka jingïarap ïa kaba la khmih lynti na ki lum rit, ka jingkhihwin halor ki lum bah: shisha, ka jingpynim u Israel ka long ha U Trai U Blei jong ngi.

²⁴ “Hynrei, kata kaba lehrain ka la bam duh ïa ka jingminot ki kpa jong ngi naduh ka jinglong samla jong ngi; ki kynhun jong ki bad ki jingri jong ki, ki khun jong ki ruh shynrang bad kynthei.

²⁵ To ïa ngin ïathiah noh ha ka jinglehrain jong ngi, bad to ai ba ka jingshaïong kan tap ïa ngi: naba ngi la leh pop ïa U Trai U Blei jong ngi, ma ngi bad ki kpa jong ngi, naduh ba ngi dang samla haduh kane ka sngi keiñ: bad ngim shym la kohnguh ïa ka ktien U Trai U Blei jong ngi.”