JEREMAÏAH 29 - KA BAIBL

Ka shithi U Jeremaïah sha kiba shong mraw

¹ Te kine ki long ki ktien jong kata ka shithi kaba u Jeremaïah u nongïathuhlypa u la phah na Jerusalem sha kiba dang sah na ki tymmen basan jong kiba shong mraw, bad sha ki lyngdoh, bad sha ki nongïathuhlypa, bad sha u paidbah baroh, ïa kiba u Nebukhadnessar u la ring mraw na Jerusalem sha Babilon:

² (hadien ba u Jekonaïah u syiem, bad ka kmie u syiem, bad ki ïunok, bad ki rangbah Judah bad ka Jerusalem, bad ki nongtrei stad, bad ki bania, ki la leit noh na Jerusalem;)

³ da ka kti u Elasah u khun u Shaphan, bad u Gemaraïah u khun u Hilkaïah, (ïa uba u Sedekaïah u syiem ka Judah u la phah sha Babilon ha u Nebukhadnessar u syiem ka Babilon,) u da ong,

⁴ “Kumne u ong U Trai ki paid, U Blei ki Israel, ha kiba shong mraw baroh, ïa kiba nga la pynring mraw na Jerusalem sha Babilon:

⁵ ‘To tei ki ïing phi, bad to shong ha ki; to thung ki kper, bad to bam ïa u soh jong ki.

⁶ To ïoh ïa ki tnga, bad to pynkha ïa ki khun shynrang bad ïa ki khun kynthei; bad to pynïoh tnga ïa ki khun shynrang jong phi, bad to ai kurim ïa la ki khun kynthei ha ki tnga, ba kin kha khun shynrang bad khun kynthei; bad nang bun hangta, to wat nang duna.

⁷ Bad to wad ïa ka jingsuk jong kata ka shnong sha kaba nga la pynring mraw ïa phi, bad to duwai ha U Trai na ka bynta jong ka: naba ha ka jingsuk jong ka, ka shong ka jingsuk jong phi.’ ”

⁸ Naba kumne u ong U Trai ki paid, U Blei ki Israel: “Wat shah ïa ki nongïathuhlypa jong phi kiba hapdeng jong phi, bad ki nongkhan jong phi, ba kin shukor ïa phi, lymne wat sngap ïa ki jingphohsniew ïa kiba phi phohsniew.

⁹ Naba ki ïathuhlypa lamler ha phi ha ka kyrteng jong nga: ngam shym phah ma nga ïa ki,” ong U Trai.

¹⁰ “Naba kumne u ong U Trai: ‘Ynda la pyndep hynñiewphew snem ïa ka Babilon, ngan wan-i ïa phi, bad ngan pyndep ïa la ki ktien babha shaphang jong phi, da kaba pynphai pat ïa phi sha kane ka jaka.

¹¹ Naba nga tip ïa ki jingmut kiba nga pyrkhat shaphang jong phi,’ ” ong U Trai, “ki jingmut ka jingsuk keiñ, te ym ki jong ka jingsniew, ban ai ka jingkyrmen ïa phi ha ka por bakut jong phi.

¹² Te phin khot kyrpad ïa nga, bad phin ïoh leit ban duwai ha nga, nga ruh ngan shahshkor ïa phi.

¹³ Bad phin wad ïa nga, bad phin shem ïa nga, haba phin wad ïa nga da ka dohnud baroh.

¹⁴ Bad phin ïoh shem ïa nga,” ong U Trai, “bad ngan phai noh, bad ngan pynphai noh pat ïa ka jinglongmraw jong phi, bad ngan lum ïa phi na ki jaid bynriew baroh, bad na ki jaka baroh sha kiba nga la beh noh ïa phi,” ong U Trai; “bad ngan wallam ïa phi pat sha ka jaka na kaba nga la pynring mraw ïa phi.”

¹⁵ Naba phi la ong, “U Trai u la pynmih ki nongïathuhlypa ïa ngi ha Babilon.”

¹⁶ Naba kumne u ong U Trai shaphang uta u syiem uba shong halor ka khet u Dabid, bad shaphang uta u paidlang baroh uba shong ha kane ka shnong, ki para jong phi keiñ, ki bym shym mih lem bad phi bad long mraw.

¹⁷ Kumne u ong U Trai ki paid: “Ha khmih, ngan phah halor jong ki da ka waitlam, da ka 'nemsniew, bad da ka jingïapkhlam, bad ngan pynlong ïa ki, kum ki soh Dumbur kiba pyut, ki bym lah ban bam, ki sniew katta katta.

¹⁸ Bad ngan beh nadien jong ki da ka waitlam, da ka 'nemsniew, bad da ka jingïapkhlam, bad ngan ai noh ïa ka ban pynpashat ïa ki shane shatai hapdeng ki hima baroh jong ka khyndew, ban long ka jingtim, bad ka jinglyngngoh, bad ka jingkynshi, bad ka jingibeiñ hapdeng ki jaid bynriew baroh sha kiba nga la beh noh ïa ki:

¹⁹ namar kim shym la sngap ïa ki ktien jong nga,” ong U Trai, “kiba nga la phah ha ki da ki shakri jong nga ki nongïathuhlypa, nga da khie dang step bad nga phah ïa ki; hynrei, phim treh ban sngap,” ong U Trai.

²⁰ To sngew namar kata, ïa ka ktien U Trai, phi baroh kiba shong mraw, ïa kiba nga la phah noh na Jerusalem sha Babilon.

²¹ Kumne u ong U Trai ki paid, U Blei ki Israel, shaphang u Ahab u khun u Kolaïah, bad shaphang u Sedekaïah u khun u Maaseïah, kiba ïathuhlypa ïa ka lamler ha phi ha ka kyrteng jong nga: “Ha khmih, ngan ai noh ïa ki ha ka kti u Nebukhadressar u syiem ka Babilon; bad un pynïap ïa ki ha khmat jong phi;

²² bad na kita baroh na Judah kiba shong mraw ha Babilon kin shim ka jingtim, da kaba ong, ‘To U Trai un pynlong ïa me kum u Sedekaïah bad kum u Ahab, ïa kiba u syiem ka Babilon u la syang ha ka ding:’

²³ namar ki la leh ïa ka jingbieit ha Israel, bad ki la klim bad ki tnga ki paramarjan jong ki, bad ki la kren ki ktien lamler ha ka kyrteng jong nga, ïa kiba ngam shym la hukum ïa ki; te nga long ma nga uba tip, bad nga long u sakhi,” ong U Trai.

Ka Jingïathuhlypa lamler u Shemaïah

²⁴ Bad shaphang u Shemaïah u nong Nehelam men kren, da kaba ong,

²⁵ “Kumne u kren U Trai ki paid, U Blei ki Israel, u da ong, ‘Namar ba me la phah ki shithi ha la ka jong ka kyrteng ha u paidbah baroh kiba ha Jerusalem, bad ha u Sephanaïah u khun u Maaseïah u lyngdoh, bad ha ki lyngdoh baroh, me da ong,

²⁶ “U Trai u la pynlong lyngdoh ïa me ha ka jaka u Jehoïada u lyngdoh,” ba phin long ki nongkam ha ka ïing U Trai, halor u briew baroh uba lamwir, bad uba pynlong nongïathuhlypa ïa lade, ba men buh ïa u ha ka dieng song bad ki nar pyndait.

²⁷ Namar kata te, balei ba mem shym sneng ïa u Jeremaïah na Anathoth, uba pynlong ïa lade u nongïathuhlypa ha phi,

²⁸ namar ba u la phah sha ngi ha Babilon, u da ong, “Ka jingshong mraw ka long kaba slem: to tei phi ïa ki ïing, bad to shong ha ki; bad to thung ki kper, bad to bam ïa u soh jong ki?” ’ ”

²⁹ Bad u Sephanaïah u lyngdoh u la pule ïa kane ka shithi ha ki shkor u Jeremaïah, u nongïathuhlypa.

³⁰ Ynda kumta, ka ktien U Trai ka la wan ha u Jeremaïah, ka da ong,

³¹ “To phah sha kita kiba shong mraw baroh, to ong, ‘Kumne u ong U Trai shaphang u Shemaïah, u nong Nehelam: “Namar ba u Shemaïah u la ïathuhlypa ha phi, bad ba ngam shym phah ma nga ïa u, bad ba u la pynshaniah ïa phi ha ka lamler;” ’ ”

³² namar kata, kumne u ong U Trai: “Ha khmih, ngan pynshitom ïa u Shemaïah u nong Nehelam bad ïa u symbai jong u; un ym ïoh ïa u briew ïa ka ban shong hapdeng une u paidbah, lymne un ym ïohi ïa kata ka babha kaba ngan leh ha u paidbah jong nga,” ong U Trai: “namar u la kren ïa ka jingïaleh pyrshah ïa U Trai.”