JEREMAÏAH 28 - KA BAIBL

Ka jingïathuhlypa balamler U Hananaïah

¹ Te ha kajuh ka snem, ha kaba sdang ka jingsynshar u Sedekaïah u syiem ka Judah, ha ka basaw snem, ha u bnai u basan, u Hananaïah u khun u Assur u nongïathuhlypa, uba na Gibeon, u la kren ha nga ha ka ïing U Trai, ha khmat ki lyngdoh bad u paidbah baroh, u da ong,

² “Kumne u kren U Trai ki paid, U Blei ki Israel, u da ong, ‘Nga la pynkheiñ ïa ka lyngkor u syiem ka Babilon.

³ Hapdeng ar snem ngan wallam pat sha kane ka jaka ïa ki khiew ki pliang baroh ki jong ka ïing U Trai, kiba u Nebukhadnessar u syiem ka Babilon u la shim noh na kane ka jaka, bad u la kit noh sha Babilon:

⁴ bad ngan wallam pat sha kane ka jaka ïa u Jekonaïah u khun u Jehoïakim, u syiem ka Judah, lem bad ki Judah ba long mraw baroh, kiba la leit sha Babilon,’ ” ong U Trai: “naba ngan pynkheiñ ïa ka lyngkor u syiem ka Babilon.”

⁵ Ynda kumta, u Jeremaïah u nongïathuhlypa u la ong ha u Hananaïah u nongïathuhlypa ha khmat ki lyngdoh, bad ha khmat u paidbah baroh uba ïeng ha ka ïing U Trai,

⁶ u Jeremaïah u nongïathuhlypa keiñ u la ong, “Amen! to U Trai un leh kumta; to U Trai un pyndep ïa kita ki ktien jong me kiba me la ïathuhlypa, kat ban wallam pat ïa ki khiew ki pliang ka ïing U Trai, bad ïa kita baroh kiba na ka jinglongmraw, na Babilon sha kane ka jaka.

⁷ Hynrei, to sngew me mynta ïa kane ka ktien kaba nga kren ha ki shkor jong me, bad ha ki shkor jong une u paidbah baroh:

⁸ Kita ki nongïathuhlypa kiba la long mynhyndai mynshuwa jong nga bad mynshuwa jong me ki la ïathuhlypa pyrshah ïa bun ki ri, bad pyrshah ïa ki hima ki bakhraw, shaphang ka thma, bad shaphang ka jingsniew, bad shaphang ka jingïapkhlam.

⁹ Uta u nongïathuhlypa uba ïathuhlypa ïa ka jingsuk, haba ka ktien jong uta u nongïathuhlypa kan jia long, hangta keiñ yn sa ithuh ïa u nongïathuhlypa, ba U Trai u la phah shisha ïa u.”

¹⁰ Ynda kumta, u Hananaïah u nongïathuhlypa u la shim noh ïa uta u dieng lyngkor na ka ryndang u Jeremaïah u nongïathuhlypa, bad u la pynkheiñ ïa u.

¹¹ Bad u Hananaïah u la kren ha khmat u paidbah baroh, u da ong, “Kumne u ong U Trai: ‘Kumta keiñ ngan pynkheiñ ïa ka lyngkor u Nebukhadnessar u syiem ka Babilon hapdeng ar snem na ka ryndang ki jaid bynriew baroh.’ ” Te u Jeremaïah u nongïathuhlypa u la leit noh.

¹² Ynda kumta, ka ktien U Trai ka la wan ha u Jeremaïah, hadien kaba u Hananaïah u nongïathuhlypa u la pynkheiñ ïa u dieng lyngkor na ka ryndang u Jeremaïah u nongïathuhlypa, ka da ong,

¹³ “To khie, bad ïathuh ha u Hananaïah, da ong, ‘Kumne u ong U Trai: “Me la pynkheiñ ïa ki lyngkor dieng; hynrei, men thaw ki lyngkor nar ha ka jaka jong ki.”

¹⁴ Naba kumne u ong U Trai ki paid, U Blei ki Israel: “Nga la buh ïa ka lyngkor nar ha ka ryndang kine ki jaid bynriew baroh, ba kin shakri ïa u Nebukhadnessar u syiem ka Babilon; bad kin shakri ïa u keiñ: bad nga la ai ruh ha u ïa ki mrad ha khlaw.” ’ ”

¹⁵ Ynda kumta, u Jeremaïah u nongïathuhlypa u la ong ha u Hananaïah u nongïathuhlypa, “To sngew mynta, ko Hananaïah; U Trai um shym phah ïa me; hynrei, me shu pynshaniah ïa une u paidbah ha ka lamler.

¹⁶ Namar kata, kumne u ong U Trai, ‘Ha khmih, ngan phah noh ïa me na khmat ka khyndew: ha kane ka snem men ïap, namar ba me la kren ïa ka jingïaleh pyrshah ïa U Trai.’ ”

¹⁷ Kumta u Hananaïah u nongïathuhlypa u la ïap ha kata hi ka snem ha u bnai u bahynñiew.