JEREMAÏAH 27 - KA BAIBL

Ka jinghikai na ka pharshi ki jingkhum bad ki jingteh

¹ Ha kaba sdang ka jingsynshar u Jehoïakim u khun u Josaïah, u syiem ka Judah, ka la wan kane ka ktien ha u Jeremaïah na U Trai, ka da ong,

² “Kumne u ong U Trai ha nga: To thaw ha me ïa ki jingkhum bad ki dieng lyngkor, bad buh ïa ki ha ka ryndang jong me;

³ bad to phah ïa ki sha u syiem ka Edom, bad sha u syiem ka Moab, bad sha u syiem ki khun u Ammon, bad sha u syiem ka Tyros, bad sha u syiem ka Sidon, ha ka kti kita ki nonglam-ktien kiba wan sha Jerusalem ha u Sedekaïah u syiem ka Judah;

⁴ bad to ai ka hukum ïa ki sha ki kynrad jong ki, to ong, ‘Kumne u ong U Trai ki paid, U Blei ki Israel: Kumne phin ong ha ki kynrad jong phi;

⁵ “Nga la thaw ïa ka khyndew ïa u briew bad u mrad kiba halor ka khmat ka khyndew, da la ka borbah bad da la ka ksang'ti ba la kner; bad nga ai ïa ka kat ha kiba nga sngewdei.

⁶ Mynta te nga la ai noh ïa kine ki ri baroh ha ka kti u Nebukhadnessar u syiem ka Babilon, u shakri jong nga; bad ïa ki mrad ha khlaw nga la ai ha u ban shakri ïa u.

⁷ Bad ki jaid bynriew baroh kin shakri ïa u, bad ïa u khun jong u, bad ïa u khun u khun jong u, ha ban da poi ka por ka ri jong u hi: hangta te shibun ki jaid bynriew bad ki syiem ki bakhraw kin pynlong shakri ïa u ha ki.

⁸ “ ‘ “Te kata ka jaid bynriew bad kata ka hima ki ban ym shakri ïa une u Nebukhadnessar u syiem ka Babilon, bad ki ban ym buh ïa la ka ryndang hapoh ka lyngkor u syiem ka Babilon, ïa kata ka jaid bynriew ngan pynshitom,” ’ ” ong U Trai, “da ka waitlam, bad da ka 'nemsniew, bad da ka jingïapkhlam, tad ynda nga la pynduh ïa ki da ka kti jong u.

⁹ Hynrei ma phi, to wat sngap ïa la ki nongïathuhlypa, lymne ïa la ki nongkhan, lymne ïa la ki jingphohsniew, lymne ïa la ki nongkren shwar, lymne ïa la ki nongkren byrtong, kiba kren ha phi, ki ïa-ong, ‘Phin ym shakri ïa u syiem ka Babilon:’

¹⁰ naba ki ïathuhlypa ïa ka lamler ha phi, ïa ka ban pynkynriah noh ïa phi sha jngai na la ka ri; bad ba ngan beh noh ïa phi bad ba phin ïap.

¹¹ Hynrei, kata ka jaid bynriew ka ban ai noh ïa la ka ryndang hapoh ka lyngkor u syiem ka Babilon, bad ka ban shakri ïa u, ïa kata, ngan shah ba kan sah ha la ka ri hi,” ong U Trai; “bad kin rep ïa ka, bad shong ha ka.”

¹² Bad nga la kren ha u Sedekaïah u syiem ka Judah katba kum kine ki ktien baroh, nga da ong, “To ai la ka ryndang hapoh ka lyngkor u syiem ka Babilon, bad to shakri ïa u bad ïa ki briew jong u, bad to im.

¹³ Balei phin ïap, ma me bad ki briew jong me, da ka waitlam, da ka 'nemsniew, bad da ka jingïapkhlam, kumba U Trai u la kren shaphang kata ka jaid bynriew ka ban ym shakri ïa u syiem ka Babilon?

¹⁴ Bad wat sngap ïa ki ktien jong kita ki nongïathuhlypa kiba kren ha phi, ki ïa-ong, ‘Phin ym shakri ïa u syiem ka Babilon:’ naba ki ïathuhlypa ïa ka lamler ha phi.

¹⁵ Naba ngam shym phah ma nga ïa ki,” ong U Trai, “hynrei ki ïathuhlypa lamler ha ka kyrteng jong nga; khnang ba ngan beh noh ïa phi, bad ba phin ïap noh, ma phi, bad kita ki nongïathuhlypa kiba ïathuhlypa ha phi.”

¹⁶ Nga la kren ruh ha ki lyngdoh bad ha une u paidlang baroh, nga da ong, “Kumne u ong U Trai: ‘Wat sngap ïa ki ktien ki nongïathuhlypa jong phi kiba ïathuhlypa ha phi, da kaba ong, “Ha khmih, mynta ïa ki khiew ki pliang ka ïing U Trai yn sa wallam pat kloi na Babilon:” naba ki ïathuhlypa ïa ka lamler ha phi.

¹⁷ Wat sngap ïa ki; to shakri ïa u syiem ka Babilon, bad to im: balei ba kane ka shnong kan long kaba kynjah?’

¹⁸ Hynrei, lada ki long ki nongïathuhlypa, bad lada ka ktien U Trai ka don ha ki, to mynta kin ïasaid ha U Trai ki paid, ba kita ki khiew ki pliang kiba sah ha ka ïing U Trai, bad ha ka ïing u syiem ka Judah, bad ha Jerusalem, kin ym leit sha Babilon.”

¹⁹ Naba kumne u ong U Trai ki paid shaphang kita ki rishot, bad shaphang kata ka duriaw, bad shaphang kita ki jingpynshong, bad shaphang kita ki khiew ki pliang ïa kiba la pynsah ha kane ka shnong,

²⁰ kiba u Nebukhadnessar u syiem ka Babilon um shym shim, mynba u la ring mraw ïa u Jekonaïah u khun u Jehoïakim, u syiem ka Judah, na Jerusalem sha Babilon, bad ki bakhraw batri baroh ki jong ka Judah bad ka Jerusalem;

²¹ shisha keiñ, kumne u ong U Trai ki paid, U Blei ki Israel, shaphang kita ki khiew ki pliang ïa kiba la pynsah ha ka ïing U Trai, bad ha ka ïing u syiem ka Judah, bad ha Jerusalem:

²² “Yn leit lam noh ïa ki sha Babilon, bad hangta kin long, haduh kata ka sngi ba ngan wan-i ïa ki,” ong U Trai; “ynda kumta, ngan wallam artet ïa ki, bad ngan pynphai noh pat ïa ki sha kane ka jaka.”