JEREMAÏAH 26 - KA BAIBL

La byrngem ïa U Jeremaïah ba u dei ban ïap

¹ Ha kaba sdang ka jingsynshar u Jehoïakim u khun u Josaïah, u syiem ka Judah, ka la wan kane ka ktien na U Trai, ka da ong,

² “Kumne u ong U Trai: ‘To ïeng ha ka phyllaw ka ïing U Trai, bad to kren ha ki shnong Judah baroh, kiba wan mane ha ka ïing U Trai, ïa ki ktien baroh kiba nga la hukum ïa me ban kren ha ki; wat tyngkai wat kawei ka ktien.’

³ Lehse kin sngap, bad kin phai noh uwei uwei ruh na la ka lynti sniew; ba ngan ïoh kylla-ka-bamut na kata ka jingsniew, kaba nga thmu ban leh ïa ki namar ka jingsniew ki jingleh jong ki.

⁴ Te men ong ha ki, ‘Kumne u ong U Trai: “Lada phin ym sngap ïa nga, ïa ka ban ïaid ha ka aiñ jong nga, kaba nga la buh ha khmat jong phi,

⁵ ïa ka ban sngap ïa ki ktien ki shakri jong nga ki nongïathuhlypa, ïa kiba nga phah ha phi, da kaba khie dang step bad phah ïa ki, hynrei, phim shym sngap;

⁶ te ngan pynlong ïa kane ka ïing kum ka Sheiloh, bad ngan pynlong ka jingtim ïa kane ka shnong ha ki jaid bynriew baroh jong ka khyndew.” ’ ”

⁷ Te ki lyngdoh bad ki nongïathuhlypa bad u paidbah baroh ki la ïohsngew ïa u Jeremaïah ba u kren ïa kine ki ktien ha ka ïing U Trai.

⁸ Te haba u Jeremaïah u la dep kaba kren ïa kata baroh ba U Trai u la hukum ïa u ban kren ha u paidbah baroh, ki lyngdoh bad ki nongïathuhlypa bad u paidbah baroh ki la kem ïa u, ki ïa-ong, “Da shisha men ïap!

⁹ Balei ba me la ïathuhlypa ha ka kyrteng U Trai, me da ong, ‘Kane ka ïing kan long kum ka Sheiloh, bad kane ka shnong kan long kaba kynjah, ka bymshong briew’?” Bad u paidbah baroh ki la ïalang ha u Jeremaïah ha ka ïing U Trai.

¹⁰ Te haba ki rangbah Judah ki la ïohsngew ïa kine kiei kiei, ki la wan kiew na ka ïing u syiem sha ka ïing U Trai; bad ki la shong ha kaba rung na ka khyrdop thymmai ka ïing U Trai.

¹¹ Ynda kumta, ki lyngdoh bad ki nongïathuhlypa ki la kren ha kita ki rangbah bad ha u paidbah baroh, ki ïa-ong, “Une u briew uba dei ban ïap: naba u la ïathuhlypa pyrshah ïa kane ka shnong, kumba phi la ïohsngew da la ki shkor.”

¹² Ynda kumta, u Jeremaïah u la kren ha kita ki rangbah baroh bad ha uta u paidbah baroh, u da ong, “U Trai uba la phah ïa nga ban ïathuhlypa pyrshah ïa kane ka ïing bad pyrshah ïa kane ka shnong ïa kine ki ktien baroh kiba phi la ïohsngew.

¹³ Namar kata te, to pynbha ïa ki lynti jong phi bad ïa ki jingleh jong phi, bad to kohnguh ïa ka ktien U Trai U Blei jong phi; te U Trai un kylla-ka-bamut na kata ka jingsniew kaba u la kren pyrshah ïa phi.

¹⁴ Hynrei, shaphang jong nga, ha khmih, nga long ha ka kti jong phi: to leh ïa nga katba ibit bad idei ha khmat jong phi.

¹⁵ Tang ba phin tip skhem ba lada phin pynïap ïa nga, phin pynhap ïa ka snam balui lui halor lade, bad halor kane ka shnong, bad halor kiba shong ha ka: naba da shisha, U Trai u la phah ïa nga ha phi ban kren ïa kine ki ktien baroh ha ki shkor jong phi.”

La pyllait ïa u Jeremaïah na ka jingïap

¹⁶ Ynda kumta, ki rangbah bad u paidbah baroh ki la ong ha ki lyngdoh bad ha ki nongïathuhlypa: “Une u briew um dei ban ïap; naba u la kren ha ngi ha ka kyrteng U Trai U Blei jong ngi.”

¹⁷ Ynda kumta, ki la ïeng kiba na ki tymmen basan jong ka ri, bad ki la kren ha ka jingïaseng baroh jong u paidlang, ki ïa-ong,

¹⁸ “U Mikaïah u nong Morasht u la ïathuhlypa ha ki sngi u Hesekaïah u syiem ka Judah; bad u la kren ha u paidbah Judah baroh, u da ong, ‘Kumne u ong U Trai ki paid: “ ‘Ïa ka Seïon yn lur kum ïa ka lyngkha, bad ka Jerusalem kan long lymbher, bad u lum jong ka ïing kum ki jaka bajrong jong ka khlaw.’

¹⁹ “Hato u Hesekaïah u syiem ka Judah bad ki Judah baroh ki la pynïap ïa u? U la sheptieng ne em ïa U Trai, bad u la kyrpad ne em ïa ka jingisynei U Trai, bad U Trai u la kylla-ka-bamut na kata ka jingsniew kaba u la kren pyrshah ïa ki? Kumne ngi la leh sniew pyrshah ïa la ki jong ki mynsiem.”

²⁰ Bad la don ruh u briew uba la ïathuhlypa ha ka kyrteng U Trai, u Uriah u khun u Shemaïah u nong Kiriath-jearim; bad u la ïathuhlypa pyrshah ïa kane ka shnong bad pyrshah ïa kane ka ri katba kum ki ktien u Jeremaïah baroh:

²¹ Te haba u syiem Jehoïakim, bad ki riewkhlaiñ jong u baroh, bad ki rangbah jong u baroh, ki la ïohsngew ïa ki ktien jong u, u syiem u la pyrshang ban pynïap ïa u; hynrei, haba u Uriah u la ïohsngew ïa kata, u la sheptieng, bad u la phet ïap, bad u la leit sha Ijipt:

²² bad u syiem Jehoïakim u la phah briew sha Ijipt, kata, ïa u Elnathan u khun u Akhbor, bad ki briew lem bad u, sha Ijipt:

²³ bad ki la wallam noh ïa u Uriah na Ijipt, bad ki la wallam ïa u sha u syiem Jehoïakim; uba la pynïap ïa u da ka waitlam, bad u la bred ïa ka metïap jong u ha ki jingtep ki riewpoh.

²⁴ Hynrei, ka kti u Ahikam u khun u Shaphan ka la don bad u Jeremaïah, ba kin ym ïoh ai noh ïa u ha ka kti u paidbah ban pynïap ïa u.