JEREMAÏAH 25 - KA BAIBL

Ki hynñiewphew snem jong ka jinglongmraw

¹ Ka ktien kaba la wan ha u Jeremaïah shaphang u paidbah Judah baroh ha ka basaw snem jong u Jehoïakim u khun u Josaïah, u syiem ka Judah; kata ka la long ka snem ka banyngkong jong u Nebukhadressar u syiem ka Babilon;

² ïa kata, u Jeremaïah u nongïathuhlypa u la kren ha u paidbah Judah baroh, bad ha kita baroh kiba shong ha Jerusalem, u da ong:

³ “Naduh ka bakhatlai snem jong u Josaïah u khun u Amon, u syiem ka Judah, jin haduh kane ka sngi, kine arphew lai snem keiñ, ka ktien U Trai ka la wan ha nga, bad nga la kren ha phi, nga da khie dang step bad nga kren; phi, hynrei, phim shym sngap.

⁴ Bad U Trai u la phah sha phi ïa ki shakri jong u ki nongïathuhlypa baroh, u da khie dang step bad u da phah ïa ki; phi, hynrei, phim shym sngap, lymne pyndem ïa la ki shkor ban sngew;

⁵ ki ïa-ong, ‘To phai phi uwei uwei baroh na la ka lynti sniew jong u, bad na ka jingsniew ki jingleh jong u, bad to shong ha ka ri kaba U Trai u la ai ha phi bad ha ki kpa jong phi, naduh mynbarim bad haduh bymjukut:

⁶ bad wat leit bud ïa kiwei pat ki blei ban shakri ïa ki, bad ban mane ïa ki, bad wat pankwah ïa nga ban bitar da ka kam ki kti jong phi; te ngan ym pynsniew ïa phi.’

⁷ La kumta ruh, phim shym sngap ïa nga,” ong U Trai; “khnang ba phin ïoh pankwah ïa nga ban bitar da ka kam ki kti jong phi ïa la ka jong ka jingsniew.”

⁸ Namar kata, kumne u ong U Trai ki paid: “Namar ba phim shym la sngew ïa ki ktien jong nga,

⁹ ha khmih, ngan phah shim ïa ki kur na shatei baroh,” ong U Trai, “bad ngan phah sha u Nebukhadressar u syiem ka Babilon, u shakri jong nga, bad ngan wallam ïa ki pyrshah ïa kane ka ri, bad pyrshah ïa kiba shong ha ka, bad pyrshah ïa baroh kine ki jaid bynriew kiba baroh sawdong; bad ngan pynjot noh khoit ïa ki, bad ngan pynlong ïa ki ka jinglyngngoh, bad ka jingkynshi, bad ki jingkynjah kiba ha la ka rta.

¹⁰ Bad ngan pynduh noh ïa ka jingsawa ka jingshadkmen bad ïa ka jingsawa ka jingkmen, ïa ka jingsawa u nongleit-kurim bad ïa ka jingsawa ka nongleit-kurim, ïa ka jingsawa ki mawtylliat, bad ïa ka jingshai ka sharak.

¹¹ Bad kane ka ri baroh kan long ka jingkynjah, bad ka jinglyngngoh; bad kine ki jaid bynriew kin shakri ïa u syiem ka Babilon hynñiewphew snem.

¹² Te ynda la kut hynñiewphew snem, ngan pynshitom ïa u syiem ka Babilon, bad ïa kata ka jaid bynriew,” ong U Trai, “namar ka jingbymhok jong ki, bad ïa ka ri ki Khaldi; bad ngan pynlong ïa ka, kaba kynjah junom.

¹³ Bad ngan wallam halor kata ka ri ïa ki ktien jong nga baroh kiba nga la kren pyrshah ïa ka, ïa kata baroh keiñ kaba la thoh ha kane ka kitab, ïa kaba u Jeremaïah u la ïathuhlypa pyrshah ïa ki jaid bynriew baroh.

¹⁴ Naba bun ki jaid bynriew bad ki syiem ki bakhraw kin pynshakri ïa lade da ki, da kita keiñ: te ngan siew ïa ki katba kum ki jingleh jong ki, bad kat kum ka kam ki kti jong ki.”

Ka khuri ka jingbitar ïa ki jaid bynriew

¹⁵ Naba kumne u ong U Trai, U Blei ki Israel, ha nga: “To shim ïa kane ka khuri ka Waiñ kane ka jingbitar na ka kti jong nga, bad pyndih na ka, ïa ki jaid bynriew baroh, ha kiba nga phah ïa me.

¹⁶ Te kin dih, bad kin ïaid shen shen, bad kin lamwir, namar kata ka waitlam kaba ngan phah hapdeng jong ki.”

¹⁷ Ynda kumta, nga la shim ïa kata ka khuri na ka kti U Trai, bad nga la pyndih ïa ki jaid bynriew baroh, kiba U Trai u la phah ïa nga sha ki;

¹⁸ ïa ka Jerusalem bad ïa ki nongbah Judah, bad ïa ki syiem jong ki, bad ïa ki rangbah jong ki, ïa ka ban pynlong ïa ki ka jingkynjah, ka jinglyngngoh, ka jingkynshi, bad ka jingtim; kumba ka long ha kane ka sngi:

¹⁹ ïa u Pharaoh u syiem ka Ijipt, bad ïa ki shakri jong u, bad ïa ki rangbah jong u, bad u paidlang jong u baroh;

²⁰ bad ïa uta u paid khleh, bad ïa ki syiem baroh ka ri Us, bad ïa ki syiem baroh ka ri ki Philistia, bad ïa ka Ashkelon, bad ïa ka Gasa, bad ïa ka Ekron, bad ïa kaba sah jong ka Ashdod;

²¹ ïa ka Edom, bad ïa ka Moab, bad ïa ki khun u Ammon;

²² bad ïa ki syiem ka Tyros baroh, bad ïa ki syiem ka Sidon baroh, bad ïa ki syiem ka 'dewlynnong kaba sha lyndet ka duriaw;

²³ ïa ka Dedan, bad ïa ka Tema, bad ïa ka Bus, bad ïa baroh kiba khap ïa ki dong u shñiuh jong ki;

²⁴ bad ïa ki syiem ka Arabia baroh, bad ïa baroh ki syiem jong u paid khleh kiba shong ha ri khlaw;

²⁵ bad ïa ki syiem ka Simri baroh, bad ïa ki syiem ka Elam baroh, bad ïa baroh ki syiem ki Mid;

²⁶ bad ïa ki syiem shatei baroh, kiba jngai bad kiba jan, uwei bad uwei pat; bad ïa ki hima baroh jong ka pyrthei, kiba ha khmat ka khyndew: bad u syiem Sheshak un dih hadien jong ki.

²⁷ “Bad men ong ha ki, ‘Kumne u ong U Trai ki paid, U Blei ki Israel: “To dih phi, to buaid noh, to prie, to kyllon, bad wat ïeng shuh, namar kata ka waitlam kaba ngan phah hapdeng jong phi.” ’

²⁸ “Te lada kim treh ban shim ïa ka khuri na kti jong me ban dih, ynda kumta, men ong ha ki, ‘Kumne u ong U Trai ki paid: “Da shisha phin dih keiñ.

²⁹ Naba ha khmih, nga sdang ban pynsniew ïa ka shnong ïa kaba la khot da ka kyrteng jong nga, phi te phin lait phar khlem jingshitom? Phin ym lait na ka jingshitom: naba ngan phah khot ïa ka waitlam halor baroh kiba shong ha ka khyndew,” ’ ” ong U Trai ki paid.

³⁰ “Namar kata, to ïathuhlypa pyrshah ïa ki, ïa kine ki ktien baroh, bad to ong ha ki, “ ‘U Trai un kyrhuh na jrong, bad un pynmih ïa la ka ktien na la ka jaka shong ka bakhuid; un kyrhuh jam pyrshah ïa la ka jingker; un pyrta, kum kita kiba ïuh ïa ki soh Waiñ, pyrshah ïa kiba shong ha ka khyndew baroh.

³¹ Ka jingsawa kan poi jin haduh ka bakut ka khyndew; naba U Trai u don ka jingïaleh bad ki jaid bynriew, un ïasaid bad ka doh baroh; te ïa ki bymman un ai noh ha ka waitlam,’ ” ong U Trai.

³² “Kumne, u ong U Trai ki paid, ‘Ha khmih, ka jingsniew kan mih na ka jaid bynriew sha ka jaid bynriew, bad ka 'erïong ka bakhraw kan khie na ki bakut ka khyndew.

³³ “ ‘Te ïa kiba la pynïap ki jong U Trai ha kata ka sngi kin long naduh ka bakut ka khyndew haduh ka bakut ka khyndew: yn ym ïambriew ïa ki, lymne yn ym lum, lymne yn ym tep; kin long ka kynsha halor ka khmat ka khyndew.

³⁴ “ ‘To lynñiar, phi ki nongaplangbrot, bad to kyang; bad to ïaksaid ha ka dpei, phi ki nongïalam jong ka kynhun: naba ki sngi ka jingpynïap ïa phi ki la poi hi, te ngan pynlwet jin ïa phi, bad phin hap kum ka pliang kaba itynnad.

³⁵ Te ki nongaplangbrot kin ym ïoh lad ban phet ïap, lymne ki nongïalam jong ka kynhun ban lait.

³⁶ Ka jingsawa ka jingkyang ki nongaplangbrot, bad ka jinglynñiar ki nongïalam jong ka kynhun! Naba U Trai u pynjot ïa ka jaka phlang jong ki.

³⁷ Bad ïa kita ki jingker kiba suk la pynjar jar namar ka jingbitar lep ka jong U Trai.

³⁸ U la iehnoh ïa la ka jaka dem, kum u sing: naba ka ri jong ki ka la wan long ka jinglyngngoh namar ka jingdom jong ka waitlam babanbor, bad namar ka jingbitar ba-meh ding jong u.’ ”