JEREMAÏAH 24 - KA BAIBL

Ka jinghikai na ka pharshi ki soh Dumbur

¹ U Trai u la pyni ïa nga, te, ha khmih, ar shang ki soh Dumbur ba la buh ha khmat ka templ U Trai; hadien kaba u Nebukhadressar u syiem ka Babilon u la ring mraw ïa u Jekonaïah u khun u Jehoïakim, u syiem ka Judah, bad ïa ki rangbah Judah, lem bad ki nongtrei stad bad ki bania, na Jerusalem, bad ba u la ïalam ïa ki sha Babilon.

² Ha kawei ka shang, la don ki soh Dumbur ki babha eh, kum ki soh Dumbur ba-ih nyngkong; te ha kata kawei ka shang, la don ki soh Dumbur ki basniew eh, ïa ki bym lah bam, ki la sniew haduh katta katta.

³ Ynda kumta, U Trai u la ong ha nga, “Me ïohi aïu, Jeremaïah?” Te nga la ong, “Ïa ki soh Dumbur; ki soh Dumbur ki babha, ki bha eh; bad ki basniew, ki sniew eh, bym lah ban bam ïa ki, ki sniew haduh katta katta.”

⁴ Te ka ktien U Trai ka la wan ha nga, ka da ong,

⁵ “Kumne u ong U Trai, U Blei ki Israel; ‘Kum kine ki soh Dumbur ki babha, kumta ngan ñiew ïa ki mraw Judah, kiba nga la phah noh na kane ka jaka sha ka ri ki Khaldi, ïa ka ban bha.

⁶ Naba ngan peit ïa la ki khmat halor jong ki, ïa ka ban bha, bad ngan wallam pat ïa ki sha kane ka ri: bad ngan tei ïa ki, te ngan ym pynpra ïa ki; bad ngan thung ïa ki, te ngan ym rat noh ïa ki.

⁷ Bad ngan ai ha ki ka dohnud ban ithuh ïa nga, ba nga long U Trai: bad kin long u paidlang jong nga, nga ruh ngan long U Blei jong ki: naba kin phai pat sha nga da ka dohnud jong ki baroh.

⁸ “ ‘Bad kum kita ki soh Dumbur ki basniew, ïa ki bym lah bam, ba ki sniew katta katta;’ ” da shisha kumne u ong U Trai, “Kumta ngan ai noh ïa u Sedekaïah u syiem ka Judah, bad ïa ki rangbah jong u, bad ïa ki ba sah jong ki Jerusalem kiba sah ha kane ka ri, bad ïa kiba shong ha ka ri Ijipt:

⁹ Ngan ai noh keiñ ïa ka ban pynpashat ïa ki shane shatai hapdeng ki hima baroh jong ka khyndew ïa ka ban sniew; ban long ka jingrkhiebeiñ bad ka proberb, ka jingkynshi bad ka jingtim, ha ki jaka baroh sha kiba ngan beh ïa ki.

¹⁰ Bad ngan phah ïa ka waitlam, ïa ka 'nemsniew, bad ïa ka jingïapkhlam, hapdeng jong ki, tad ynda la pynduh noh ïa ki na ka ri kaba nga la ai ha ki bad ha ki kpa jong ki.”