JEREMAÏAH 23 - KA BAIBL

Ka jingpynwan pat ïa i bynta ba dang sah

¹ “Kordit ïa kita ki nongaplangbrot kiba pynjot bad kiba pynsakma ïa ki langbrot ka jaka phlang jong nga!” ong U Trai.

² Namar kata, kumne u ong U Trai, U Blei ki Israel, pyrshah ïa kita ki nongaplangbrot kiba bsa ïa ki briew jong nga: “Phi la pynsakma ïa ka kynhun jong nga, bad phi la beh noh ïa ki, bad phim shym leit jngoh ïa ki; ha khmih, ngan pynwan halor jong phi ïa ka jingsniew ki jingleh jong phi,” ong U Trai.

³ “Bad ngan lum ïa kiba sah na ka kynhun jong nga na ki ri baroh sha kiba nga la beh noh ïa ki, bad ngan wallam pat ïa ki sha ki jingker jong ki: te kin sei soh bad kin nang bun.

⁴ Bad ngan buh ki nongsharai halor jong ki, ki ban bsa ïa ki: te kin ym sheptieng shuh, lymne khaw-eit, lymne kin ym duna kawei ruh,” ong U Trai.

⁵ “Ha khmih, ki sngi kin wan,” ong U Trai, “ba ngan pynmih ha u Dabid ïa U Tnat u bahok, te un synshar kum u syiem bad un leh stad, bad un leh ïa ka jingbishar bad ïa ka hok ha ka ri.

⁶ Ha ki sngi jong u, ïa u Judah yn pynim, bad u Israel un shong ha kaba suk: bad kane ka long ka kyrteng jong u da kaba yn khot ïa u, ‘U Trai u long ka hok jong ngi.’

⁷ “Namar kata, ha khmih, ki sngi kin wan,” ong U Trai, “ba kin ym ong shuh, ‘Katba im U Trai, uba la wallam noh ïa ki khun Israel na ka ri Ijipt;’

⁸ hynrei, ‘Katba im U Trai, uba la wallam noh bad uba la ïalam ïa u symbai ka ïing Israel na ka ri shatei, bad na ki ri baroh sha kiba nga la beh noh ïa ki;’ bad kin ïoh shong ha la ka jong ka ri.”

Ka jingpynrem ïa ki nongïathuhlypa balamler

⁹ Shaphang ki nongïathuhlypa: Ka dohnud jong nga hapoh jong nga ka la lwet jin, baroh ki shyieng jong nga ki khih; nga long kum uba buaid, bad kum uba la shah jop da ka Waiñ; namar U Trai, bad namar ki ktien ki bakhuid jong u.

¹⁰ Naba ka ri ka dap da ki nongklim; naba namar ka jingsmai ka ri ka sngewsih; ki jaka phlang ka ri khlaw ki la tyrkhong noh; bad ka lynti jong ki ka bymman, bad ka bor jong ki ka bymdei.

¹¹ “Naba u nongïathuhlypa bad u lyngdoh ki la tngit; shisha, ha ka ïing jong nga, nga shem ka jingbymman jong ki,” ong U Trai.

¹² “Namar kata, ka lynti jong ki kan long ha ki kum ki jaka kiba tyrsiang ha ka jingdum: yn nang beh ïa ki, te kin kyllon ha ka: naba ngan pynwan ïa ka jingsniew halor jong ki, ïa ka snem ka jingwan-i jong ki keiñ,” ong U Trai.

¹³ “Bad nga la ïohi ïa ka jingbieit ha ki nongïathuhlypa ka Samaria; ki la ïathuhlypa da u Baal, bad ki la pynbakla ïa ki briew jong nga ki Israel.

¹⁴ Ha ki nongïathuhlypa ka Jerusalem ruh nga la ïohi ïa kaba shyrkhei; ki klim, bad ki ïaid ha ka jinglamler, bad ki pynkhlaiñ ïa ki kti ki nongleh sniew, kumta ba ym don shuh uba phai noh na la ka jingbymman: ki baroh ki la wan long ha nga kum ka Sodom, bad kiba shong ha ka kum ka Gomorra.”

¹⁵ Namar kata, kumne u ong U Trai ki paid shaphang ki nongïathuhlypa: “Ha khmih, ngan bsa ïa ki da u 'hur kthang, bad ngan pyndih ïa ki da ka umksang: naba na ki nongïathuhlypa ka Jerusalem ka jingtngit ka la mih noh sha ka ri baroh.”

¹⁶ Kumne u ong U Trai ki paid, “Wat sngap ïa ki ktien ki nongïathuhlypa kiba ïathuhlypa ha phi: ki hikai ka jingthala ïa phi: ki kren ïa ka jingithuhpaw ka dohnud jong ki hi, te ym na ka shyntur U Trai.

¹⁷ Ki ong ha la ka sngi ha kita kiba ibeiñ ïa nga, ‘U Trai u la ong, “Phin ïoh suk;” bad ha uwei uwei baroh uba ïaid ha ka jingmutlop ka dohnud jong u hi ki ong, “Ka jingsniew ei ei kan ym jia ïa phi.” ’ ”

¹⁸ Naba uei uba la ïeng ha ka jingsylla jong U Trai, ba un sngewthuh bad ïohsngew ïa ka ktien jong u? Uei uba la sngapthuh ïa ka ktien jong nga, bad uba la ïohsngew ïa ka?

¹⁹ Ha khmih, ka 'erïong U Trai, ka jingbitar lep keiñ, ka la mih noh, shisha, ka lyer langthari: kan paswut halor ka khlieh ki bymman.

²⁰ Ka jingbitar U Trai kan ym wan phai, tad ynda u la pyndep, bad tad ynda u la leh ïa ki jingthmu ka dohnud jong u: ha ki sngi ki bakhatduh phin sa sngewthuh janai ïa kata.

²¹ “Ngam shym phah ïa kine ki nongïathuhlypa, pynban, ki la phet: ngam shym kren ha ki, pynban, ki la ïathuhlypa.

²² Hynrei, lada ki la ïeng ha ka jingsylla jong nga, kumta kin da la pynsngew ïa ki briew jong nga ïa ki ktien jong nga, bad kin da la pynphai ïa ki na ka lynti basniew jong ki, bad na ka jingsniew ki jingleh jong ki.

²³ “Nga long ma nga U Blei uba hajan,” ong U Trai, “te ym U Blei uba ha jngai?

²⁴ U lah uno uno ban buhrieh ïa lade ha ki jaka barieh ba ngan ym ïohi ïa u?” ong U Trai. “Nga ngam dap ïa ka bneng bad ïa ka khyndew,” ong U Trai.

²⁵ “Nga ïohsngew ïa kaba la ong ki nongïathuhlypa, kiba ïathuhlypa ïa ki jinglamler ha ka kyrteng jong nga, ki ïa-ong, ‘Nga la phohsniew, nga la phohsniew.’

²⁶ Slem katno kane kan long ha ka dohnud jong kine ki nongïathuhlypa kiba ïathuhlypa ïa ki jinglamler; ki nongïathuhlypa ka jingshukor ka dohnud jong ki hi keiñ?

²⁷ Kiba mut ban lam ïa ki briew jong nga ban klet ïa ka kyrteng jong nga da la ki jingphohsniew kiba ki ïathuh uwei uwei ïa la u paramarjan, kumba ki kpa jong ki, ki klet ïa ka kyrteng jong nga na ka bynta u Baal.

²⁸ U nongïathuhlypa uba don ka jingphohsniew, to un ïathuh ïa ka jingphohsniew; bad uta uba don ka ktien jong nga, to un kren biang biang ïa ka ktien jong nga. U jyntang Kew u long aïu bad u Kew?” ong U Trai.

²⁹ “Hato ka ktien jong nga kam long kum ka ding?” ong U Trai; “bad kum u tyrnem uba pynlwet jin ïa u mawsiang?

³⁰ Namar kata, ha khmih, nga long pyrshah ïa kita ki nongïathuhlypa,” ong U Trai, “kiba tuh ïa ki ktien jong nga uwei uwei na la u paramarjan.

³¹ Ha khmih, nga long pyrshah ïa kita ki nongïathuhlypa,” ong U Trai, “kiba pyndonkam ïa la ki thylliej, bad ki ong, ‘U ong ma U.’

³² Ha khmih, nga long pyrshah ïa kita kiba ïathuhlypa ïa ki jingphohsniew kiba lamler,” ong U Trai, “bad kiba ïathuh ïa kita, bad kiba pynbakla ïa ki briew jong nga da ki jinglamler jong ki, bad da ki jingkren sarong thala jong ki: hynrei, ngam shym phah ïa ki, lymne hukum ïa ki; lymne kin ym pynmyntoi satia ïa une u paidbah,” ong U Trai.

³³ “Te haba une u paidbah, lane u nongïathuhlypa, lane u lyngdoh, un kylli ïa me, da kaba ong, ‘Kaei ka jingkit U Trai?’ men ong te ha ki, ‘Ka jingkit aïu? Ngan kynther noh ïa phi,’ ” ong U Trai.

³⁴ “Te shaphang uta u nongïathuhlypa, bad u lyngdoh, bad u paidbah, u ban ong, ‘Ka jingkit U Trai,’ ngan pynshitom keiñ ïa uta u briew bad ïa ka ïing jong u.

³⁵ Kumne phin ong uwei uwei ïa la u paramarjan, bad uwei uwei ïa la u para, ‘U Trai u la ïathuh aïu?’ bad, ‘U Trai u la kren aïu?’

³⁶ Te ïa ‘ka jingkit U Trai’ phin ym ong ei ei shuh: namar ka ktien jong uwei uwei baroh kan long ka jingkit jong u; namar phi la pynkylla ïa ki ktien jong U Blei u ba-im, ki jong U Trai ki paid, U Blei jong ngi.

³⁷ Kumne men ong ïa u nongïathuhlypa, ‘U Trai u la ïathuh aïu ïa me?’ bad, ‘U Trai u la kren aïu?’

³⁸ Hynrei, lada phi ong, ‘Ka jingkit U Trai;’ ” namar kata, kumne u ong U Trai: “Namar ba phi ong ïa kane ka ktien, ‘Ka jingkit U Trai,’ bad ba nga la phah ïa phi, da kaba ong, ‘Phin ym ong, “Ka jingkit U Trai.” ’

³⁹ Namar kata, ha khmih, ngan klet noh khoit ïa phi, bad ngan kynther noh na khmat jong nga ïa phi, bad ïa ka nongbah kaba nga la ai ïa phi, bad ïa ki kpa jong phi:

⁴⁰ Bad ngan pynwan halor jong phi ïa ka jingjahburom kaba junom, bad ïa ka jinglehrain kaba borabor, ka ban ym klet shuh.”