JEREMAÏAH 22 - KA BAIBL

¹ Kumne u la ong U Trai: “To leit hiar sha ka ïing u syiem ka Judah, bad to kren hangta ïa kane ka ktien,

² bad to ong, ‘To sngew ïa ka ktien U Trai, ko syiem ka Judah, uba shong ha ka khet u Dabid, ma me, bad ki shakri jong me, bad ki briew jong me kiba rung na kine ki khyrdop.’ ”

³ Kumne u ong U Trai: “To leh ïa ka jingbishar bad ïa ka hok, bad pyllait ïa kiba la lute na ka kti u nongbanbeiñ: bad wat leh ïa ka basniew ei ei, wat leh jubor ïa u nongwei, ïa ki khunswet, lymne ïa ka riewkynthei, lymne wat pynmih ïa ka snam balui lui ha kane ka jaka.

⁴ Naba lada da shisha phin leh ïa kane, hangta te kin rung na ki khyrdop kane ka ïing ki syiem kiba shong halor ka khet u Dabid, kiba shong ha ki kali bad halor ki kulai, ma u, bad ki shakri jong u, bad ki briew jong u.

⁵ Hynrei, lada phin ym sngew ïa kine ki ktien, nga smai da lade hi,” ong U Trai, “ba kane ka ïing kan sa long ka jingkynjah.”

⁶ Naba kumne u ong U Trai shaphang ka ïing u syiem ka Judah: “Pha long ka Gilead ha nga, bad ka kliar u Lebanon: hynrei, da shisha ngan pynlong khlaw ïa pha, bad ki shnong ki bymshong briew.

⁷ Bad ngan khreh pyrshah ïa pha ki nongpynjot, uwei uwei baroh bad la ki atiar: bad kin khet noh ïa ki Kedar babha eh jong pha, bad kin bred noh ha ding.

⁸ “Bad bun ki jaid bynriew kin ïaid hajan kane ka shnong, bad kin ïa-ong uwei uwei baroh ïa la u paramarjan, ‘Namar balei ba U Trai u la leh kumne ïa kane ka shnong bakhraw?’

⁹ Ynda kumta, kin ïathuh, ‘Namar ki la lyndet ïa ka jutang U Trai U Blei jong ki, bad ki la mane ïa kiwei pat ki blei, bad ki la shakri ïa ki.’ ”

¹⁰ Wat ïam phi namar u baïap, lymne wat sngewsih namar jong u: hynrei, ïam sat namar uta uba leit noh; namar un ym wan phai shuh, bad un ym ïohi ïa ka ri ha kaba la kha ïa u.

Ka khubor ïa ki khun u Josaïah

¹¹ Namar kumne u ong U Trai shaphang u Shallum u khun u Josaïah, u syiem ka Judah, uba synshar ha ka jaka u Josaïah u kpa jong u, uba la leit mih noh na kane ka jaka: “Un ym wan phai shuh shane:

¹² hynrei, ha ka jaka sha kaba ki la ring mraw ïa u, hangta un ïap, bad un ym ïohi shuh ïa kane ka ri.”

¹³ Kordit ïa uta uba tei ïa la ka ïing da ka jingbymhok, bad ïa la ki kamra da ki jingleh bymdei; uba pyndonkam ei ïa ka jingtrei minot u paramarjan jong u, khlem ai ïa ka bainong jong u;

¹⁴ uba ong, “Ngan tei ha lade ka ïing kaba heh bad ki kamra kiba kylluid,” bad u khlaw ha u ki jingkhang ïit; bad la buh sad da ki dieng Kedar, bad la suit rong da kaba saw hain hain.

¹⁵ Hato men synshar, namar ba me pyrshang ban kham lah da u dieng Kedar? U kpa jong me um shym la bam um shym la dih, bad leh ïa ka jingbishar bad ïa ka hok? Hangta te ka la bha bad u.

¹⁶ U la bishar ïa ka kam jong u baduk bad u bakyrduh; hangta te ka la bha bad u. “Hato kane kam long kaba ithuh ïa nga?” ong U Trai.

¹⁷ “Hynrei, ki khmat bad ka dohnud jong me kim long, hynrei, tang ha ka jinglalot jong me, bad ha kaba pynmih ïa ka snam balui lui, bad ha ka jingbanbeiñ, bad ha ka jingleh-jubor, ïa ka ban leh ïa ka.”

¹⁸ Namar kata, kumne u ong U Trai shaphang u Jehoïakim u khun u Josaïah, u syiem ka Judah; “Kin ym ïambriew ïa u, da kaba ong, ‘A u para jong nga!’ lane, ‘A ka para!’ Kin ym ïambriew ïa u, da kaba ong, ‘A kynrad!’ lane, ‘A ka burom jong u!’

¹⁹ Yn tep ïa u da ka jingtep ka kadda, ba la ring bad ba la bred noh sha lyndet ki khyrdop ka Jerusalem.”

²⁰ “Khie leit kiew sha Lebanon, bad to pyrta; pynjam ïa la ka ktien ha Bashan: bad to pyrta na u Abarim; naba ïa kiba ieit jong pha baroh la pynjot noh.

²¹ Nga la kren ha pha ha ka jingmanbha jong pha; hynrei, pha la ong, ‘Ngan ym sngap.’ Kane ka la long ka rukom jong pha naduh ba pha dang samla, ba pham kohnguh ïa ka ktien jong nga keiñ.

²² Ka lyer kan bsa ïa ki nongaplangbrot jong pha, bad ki nongieit jong pha kin leit long mraw: hangta te shisha yn pynlehrain bad yn pynlyngngoh ïa pha namar ka jingleh bymman jong pha baroh.

²³ Ko pha kaba shong ha Lebanon, kaba thaw la ka skum ha ki dieng Kedar, A katno phan long ka ba'n sngewsynei ïa pha haba ka jingsuh kan wan ha pha, ka jingsuh kum ka kynthei kaba suhkhun!”

²⁴ “Katba nga im,” ong U Trai, “la u Konaïah u khun u Jehoïakim u syiem ka Judah u long ka sa'ti ha ka kti kamon jong nga, pynban, ngan da weng noh ïa ka nangta;

²⁵ bad ngan ai noh ïa me ha ka kti jong kita kiba wad ïa ka jingim jong me, bad ha ka kti jong kita ïa kiba me sheptieng, ha ka kti u Nebukhadressar u syiem ka Babilon keiñ, bad ha ka kti ki Khaldi.

²⁶ Bad ngan shop noh shabar ïa me, bad ïa ka kmie jong me kaba la kha ïa me, sha kawei pat ka ri, ha ka bym shym la kha ïa phi; bad hangta phin ïap.

²⁷ Hynrei, sha kata ka ri ba ka mynsiem jong ki ka kwah hir hir ban leit phai sha ka, hangta te kin ym ïoh leit phai.”

²⁸ Une u briew u Konaïah u long u khiew ba la pait? U long u khiew ha u bymdon ka jingsngewbha? Namar balei ba la shop noh ïa ki, ma u keiñ bad u symbai jong u, bad ba la bred noh ïa ki sha kata ka ri kaba kim ju ithuh?

²⁹ A ka khyndew, ka khyndew, ka khyndew, to sngew ïa ka ktien U Trai!

³⁰ Kumne u ong U Trai, “To thoh uba khlem khun ïa une u briew, u ban ym man bha ha ki sngi jong u: naba un ym man bha uno uno na u symbai jong u, u ban shong ha ka khet u Dabid, bad u ban synshar shuh ha Judah.”