JEREMAÏAH 21 - KA BAIBL

Ka jingïathuhlypa ïa ka jingpynjot ïa ka Jerusalem

¹ Ka ktien kaba la wan ha u Jeremaïah na U Trai, haba u syiem Sedekaïah u la phah ha u ïa u Pashur u khun u Malkhijah, bad u Sephanaïah u khun u Maaseïah u lyngdoh, u da ong,

² “Nga kyrpad ïa me, to ïakylli na U Trai na ka bynta jong ngi; naba u Nebukhadressar u syiem ka Babilon u ïaleh thma ïa ngi: lehse U Trai un leh bad ngi katba kum ki kam phylla jong u baroh, ba un leit kiew noh na ngi.”

³ Ynda kumta, u Jeremaïah u la ong ha ki, “Kumne phin ong ha u Sedekaïah:

⁴ ‘Kumne u ong U Trai, U Blei ki Israel, “Ha khmih, ngan pynphai dien ïa kita ki tiar ïapom kiba ha ki kti jong phi, da kiba phi ïaleh ïa u syiem ka Babilon, bad ïa ki Khaldi kiba ker kut ïa phi, shabar ki kynroh, bad ngan lum ïa ki haduh hapdeng kane ka shnong.

⁵ Bad nga hi ngan ïaleh ïa phi da ka kti ba la kner bad ka ksang'ti bakhlaiñ, ha ka jingbitar keiñ, bad ha kaba otshla, bad ha kaba ing khait.

⁶ Bad ngan shoh tangon ïa kiba shong ha kane ka shnong, bad briew bad mrad: kin ïap na ka jingïapkhlam kaba jur.

⁷ Bad hadien kata,” ’ ” ong U Trai, “Ngan ai noh ïa u Sedekaïah u syiem ka Judah, bad ïa ki shakri jong u, bad ïa u paidbah, kat ïa kiba la pynsah ha kane ka shnong na ka jingïapkhlam, na ka waitlam, bad na ka 'nemsniew, ha ka kti u Nebukhadressar u syiem ka Babilon, bad ha ka kti ki nongshun jong ki, bad ha ka kti jong kita kiba wad ïa ka jingim jong ki: bad un pom ïa ki da ka syrti waitlam; un ym map shuh ïa ki, lymne sngewsynei, lymne leh isynei.

⁸ “Bad ha une u paidbah men ong, ‘Kumne u ong U Trai: “Ha khmih, nga buh ha khmat jong phi ïa ka lynti ka jingim bad ïa ka lynti ka jingïap.

⁹ Uta uba shong ha kane ka shnong un ïap da ka waitlam, bad da ka 'nemsniew, bad da ka jingïapkhlam: hynrei, uta uba mih noh, bad uba kynriah noh sha ki Khaldi kiba ker kut ïa phi, un im, bad ka jingim jong u kan long ha u kum ka jinglute.

¹⁰ Naba nga la buh ïa la ka khmat pyrshah ïa kane ka shnong ïa ka ban pynsniew, te ym ïa ka ban pynbha,” ’ ” ong U Trai: “yn ai noh ïa ka ha ka kti u syiem ka Babilon, bad un thang ïa ka da ka ding.”

Ka jingïathuhlypa pyrshah ïa ki syiem ka Judah

¹¹ Te shaphang ka ïing u syiem ka Judah, to sngew phi ïa ka ktien U Trai:

¹² “Ko ka ïing u Dabid, kumne u ong U Trai, “ ‘To leh ïa ka jingbishar ha kaba mynstep, bad to pyllait ïa kiba la lute na ka kti u nongbanbeiñ, ïoh ba ka jingbitar lep jong nga kan mih noh kum ka ding, bad kan meh ba ym don uba lah ban pynlip ïa ka, namar ka jingsniew ki jingleh jong phi.’

¹³ “Ha khmih, nga long pyrshah ïa pha, ko kaba shong ha ka them, bad kaba ha u mawsiang ka madan,” ong U Trai; “phi kiba ong, ‘Uei u ban hiar ban ïaleh ïa ngi? lane uei u ban rung sha ki jaka shong jong ngi?’

¹⁴ Bad ngan pynshitom ïa phi katba kum u soh ki jingleh jong phi,” ong u Trai: “bad ngan wiang ding ha ka khlaw jong ka, te kan bam duh ïa baroh kaba baroh sawdong ïa ka.”