JEREMAÏAH 20 - KA BAIBL

Ka jingpynkut kaba itieng ïa U Pashur

¹ Te u Pashur u khun u Immer lyngdoh, uba long u nongkam ba kham rangbah ha ka ïing U Trai, u la ïohsngew ïa u Jeremaïah ba u la ïathuhlypa ïa kine kiei kiei.

² Ynda kumta, u Pashur u la shoh ïa u Jeremaïah u nongïathuhlypa, bad u la buh ïa u ha ka dieng song ha ka khyrdop ba haneng u Benjamin, kaba ha ka ïing U Trai.

³ Te kum lashai u Pashur u la pynmih noh ïa u Jeremaïah na kata ka dieng song. Ynda kumta, u Jeremaïah u la ong ha u, “U Trai um shym la khot kyrteng ïa me ‘U Pashur,’ hynrei, ‘U Magor-missabib.’

⁴ Naba kumne u ong U Trai, ‘Ha khmih, ngan pynlong ïa me ka jingshyrkhei ha lade, bad ha ki lok jong me baroh: kin kyllon da ka waitlam ki nongshun jong ki, bad ki khmat jong me kin ïohi ïa kata: bad ngan ai ïa ki Judah baroh ha ka kti u syiem ka Babilon, bad un ring mraw ïa ki sha Babilon, bad un pynïap ïa ki da ka waitlam.

⁵ Nalor kata ruh, ngan ai noh ïa ki spah baroh jong kane ka shnong, bad ïa ki jingïoh nong jong ka baroh, bad ïa kiei kiei kiba kordor jong ka baroh, wat ïa ki jingkynshew baroh ki syiem ka Judah ngan ai noh ha ka kti ki nongshun jong ki, ki ban lute ïa ki, bad ki ban shim ïa ki, bad kit noh ïa ki sha Babilon.

⁶ Bad ma me, u Pashur, bad baroh kiba shong ha ka ïing jong me kin leit ban long mraw; me ruh men leit sha Babilon, bad hangta men ïap, bad hangta yn tep ïa me, ma me, bad ki lok jong me baroh, kiba me la ïathuhlypa lamler ha ki.’ ”

Ka jingud U Jeremaïah

⁷ A Trai, me la shukor ïa nga, te la shukor ïa nga: me kham khlaiñ ïa nga, bad me la jop: nga la long ka jingrkhiebeiñ baroh shi sngi, uwei uwei baroh u krenbeiñ ïa nga.

⁸ Naba katba nga kren, nga pyrta; nga pyrta, “Ka jingleh-jubor bad ka jinglute:” namar ïa ka ktien U Trai la pynlong ka jingkrenbeiñ ha nga, bad ka jingrkhiebeiñ, baroh shi sngi.

⁹ Bad lada nga ong, “Ngan ym kren shuh shaphang jong u, ngan ym kren shuh ha ka kyrteng jong u,” hangta te don ha ka dohnud jong nga kum ka ding kaba meh ba la set khop hapoh ki shyieng jong nga, nga la thait ban kan, bad ngam lah shuh.

¹⁰ Namar nga la ïohsngew ïa ka jingpynbudnam kiba bun, “Ka jingshyrkhei baroh sawdong. To kynnoh sniew, te ngin kynnoh sniew ïa u,” ong ki lok bajan jong nga baroh, kita kiba ap ba ngan dkoh; “lehse yn riam pah ïa u, bad ngin lah ïa u, bad ngin pynhiar kput halor jong u.”

¹¹ Hynrei, U Trai u long lem bad nga kum uba don bor bad uba itieng: namar kata, ki nongbehbeiñ ïa nga kin jynthut, te kin ym jop; yn pynlehrain sat ïa ki, namar kim shym leh sian, da ka jingjahburom kaba junom keiñ ïa ka ban ym klet noh lano lano.

¹² Hynrei, A Trai ki paid, uba tynjuh ïa ki bahok, uba ïohi ïa ki khyllai bad ïa ka dohnud, to ai ngan ïohi ïa ka jingpynhiar kput jong me halor jong ki; naba ha me nga la pynpaw ïa la ka kam.

¹³ To rwai ha U Trai, to ïaroh phi ïa U Trai: naba u la pyllait ïa ka mynsiem jong u baduk na ka kti ki nongleh sniew.

¹⁴ Long ba la tim kata ka sngi ha kaba la kha ïa nga; to kata ka sngi ha kaba ka kmie jong nga ka la kha ïa nga kan ym long ba la kyrkhu.

¹⁵ Long ba la tim uta u briew uba la ïathuh ha u kpa jong nga, u da ong, “La kha khun shynrang ha me;” ba u da pynkmen ïa u shibun.

¹⁶ Bad to uta u briew un long kum kita ki shnong kiba U Trai u la pynkyllon, bad um shym kylla-ka-bamut: bad to un ïohsngew ka jinglynñiar mynstep, bad ka jingpyrta shiteng sngi;

¹⁷ namar ba um shym la pynïap ïa nga naduh ka kpoh, bad kumta ka kmie jong nga ka la long ka jingtep ïa nga, bad ka kpoh ka 'pohbah borabor.

¹⁸ Balei nga la mih noh na ka kpoh ban ïohi ïa ka jingshitom bad ka jingsngewsih, ba yn pynduh ïa ki sngi jong nga ha ka jinglehrain?