JEREMAÏAH 2 - KA BAIBL

U Blei u pynrem ïa ki Israel namar ba ki la phai noh na u

¹ Te ka ktien U Trai ka la wan ha nga, kaba ong,

² “Khie leit, pyrta ha ki shkor ka Jerusalem, to ong, “Kumne u ong U Trai, Nga kynmaw shaphang jong pha ïa ka jingsbun ka jinglong samla jong pha, ka jingieit ka jingïateh ktien jong pha; kumba pha la leit bud ïa nga ha ka ri khlaw, ha ka ri bym ju rep.

³ U Israel u la long ka jingkhuid ïa U Trai, u soh nyngkong ka jingmih jong u: baroh kiba bam duh ïa u yn ñiew kiba rem ïa ki; ka jingsniew kan ngat halor jong ki,” ong U Trai.

⁴ To sngew phi ïa ka ktien U Trai, A ka ïing u Jakob, bad baroh ki kur ka ïing Israel:

⁵ kumne u ong U Trai, “Ka jingbymhok aïu ki kpa jong phi ki la shem ha nga, ba ki la leit jngai na nga, bad ki la ïabeh ïa ka jingthala, bad ba ki la kylla thala?

⁶ Lymne kim shym ong, ‘Hangno U Trai uba la wallam noh ïa ngi na ka ri Ijipt; uba la ïalam ïa ngi lyngba ka ri khlaw, lyngba ka ri ka jingkynjah bad ki 'liewlong, lyngba ka ri ki jingryngkhiang bad ka syrngiew ka jingïap, ka ri ka bym ju ïaid briew, bad ha ka bym ju shong briew?’

⁷ Bad nga la wallam ïa phi sha ka ri ba-dap kyrhai, ban bam ïa u soh jong ka bad ïa ka jingbha jong ka; hynrei, ynda phi la leit shapoh, phi la pyntngit ïa ka ri jong nga, bad ïa ka ri kynti jong nga phi la pynlong ka jingijli.

⁸ Ki lyngdoh kim shym ong, ‘Hangno U Trai?’ Bad kita kiba bat ïa ka hukum kim shym ithuh ïa nga: ki nongsynshar ruh ki la leh palat ïa nga, bad ki nongïathuhlypa ki la ïathuhlypa da u Baal, bad ki la ïabeh ïa kita kiei kiei ki bymmyntoi.

⁹ “Namar kata, ngan shu dang ïasaid bad phi,” ong U Trai, “bad ngan ïasaid bad ki khun ki khun jong phi.

¹⁰ Namar to ryngkang sha ki 'dewlynnong Kittim, bad to khmih; bad to phah sha Kedar de, bad da pyrkhat bha; bad to khmih lada ju don kaba kum kane.

¹¹ Ka jaid bynriew ka la ïabujli ne em ïa la ki blei, wat ki bymlong ki blei ruh? Hynrei, ki briew jong nga ki la ïabujli ïa la ka burom na ka bynta kata ka bymmyntoi.

¹² To sngewkyndit ha kane, A phi ki bneng, bad to sngewshyrkhei rem, to long kiba kynjah eh,” ong U Trai.

¹³ Naba ki briew jong nga ki la leh ar tylli ki jingsniew; ki la lyndet ïa nga ka umpohliew ki um ba-im, bad ki la shna ïa lade ki pukri, ki pukri kiba pei, ki bym lah pynsah um.

¹⁴ “Hato u Israel u long u shakri? Hato u long u mraw ba la kha ha ïing? balei u la long ka jinglute te?

¹⁵ Ki sing samla ki la kyrhuh ïa u, bad ki la kyang: bad ïa ka ri jong u ki la pynkynjah; ïa ki shnong jong u la thang duh, bymshong briew shuh.

¹⁶ Ki khun ka Noph ruh bad ka Tahpanhes ki la pynpait ïa ka shynrong khlieh jong me.

¹⁷ Hato mem shym pynïoh ïa kane ïa lade, ha kaba me la lyndet ïa U Trai U Blei jong me, mynba u la ïalam ïa me ha ka lynti?

¹⁸ Mynta te me donkam aïu ha ka lynti sha Ijipt, ban dih ïa ki um ka Shihor? lane me donkam aïu ha ka lynti sha Assyria, ban dih ïa ki um jong kata ka wah?

¹⁹ Ka jingbymman jong me hi kan pynbeit ïa me, bad ki jingphaidien jong me kin sneng ïa me: to tip namar kata bad to khmih ba ka long ka kam ka basniew bad ka bakthang, ba me la lyndet ïa U Trai U Blei jong me, bad ba ka jingsheptieng jong nga kam don ha me,” ong U Trai, U Trai ki paid.

²⁰ “Naba naduh mynhyndai nga la pynkheiñ ïa ka lyngkor jong me, bad nga la pyndkut ïa ki jingteh jong me; bad me la ong, ‘Ngan ym shakri;’ naba ha u lum bajrong baroh bad hapoh u dieng bajyrngam baroh me la dem ïa lade, da kaba leh nuti.

²¹ Hynrei, nga la lah thung ïa me u dieng Waiñ u babha, u symbai u bahok suda: hato kumno me la kylla long ha nga u jingthung u basniew jong u dieng Waiñ u bapher?

²² Namar la me pynsum ïa lade da ka dpei, bad me shim shibun ka sabon, pynban, ïa ka jingbymhok jong me la thoh dak ha khmat jong nga,” ong U Trai U Blei.

²³ “Kumno me lah ban ong, ‘Ym shym pyntngit ïa nga, ngam shym leit bud ïa ki Baal?’ To khmih ïa la ka lynti ha ka them, to tip kaei ba me la leh: me long ka dromedari kaba stet kaba pom pyngkiang ïa la ki lynti;

²⁴ ka kadda khlaw kaba la mlien ha ka ri khlaw, kaba iw ïa ka lyer ha la ka jingkwah; ha la ka jingkwah, uei uba lah ban pynphai noh ïa ka? Kita baroh kiba wad ïa ka kin ym pynshitom ïa lade; ha u bnai jong ka hi kin sa shem ïa ka.

²⁵ Khang ïa la ka kjat na kaba long lyngkhuit, bad ïa la u pdot na kaba sliang: hynrei, pha la ong, ‘Ym don jingkyrmen: em, naba nga la ieit ïa ki nongwei, bad nadien jong ki ngan leit.’

²⁶ “Kumba u nongtuh u lehrain haba lap ïa u, kumta ka ïing Israel ka lehrain: ma ki, ki syiem jong ki, ki rangbah jong ki, bad ki lyngdoh jong ki, bad ki nongïathuhlypa jong ki;

²⁷ kiba ong ha u dieng, ‘Me long u kpa jong nga;’ bad ha u maw, ‘Me la pynkha ïa nga:’ naba ki la pynphai ïa la ka ingdong sha nga, te ym ïa la ka khmat: hynrei, ha ka por ka jingjynjar jong ki kin ong, ‘To ïeng, bad to pynim ïa ngi.’

²⁸ Hynrei, hangno ki blei jong me kiba me la thaw ïa lade? to kin ïeng kita, lada ki lah ban pynim ïa me ha ka por ka jingjynjar jong me: naba, A Judah, kat kum ka jingkheiñ ki shnong jong pha katta ki don ki blei jong pha.

²⁹ “Balei te phin dang ïasaid bad nga? Phi baroh phi la leh palat ïa nga,” ong U Trai.

³⁰ “Nga la sympat lehnohei ïa ki khun jong phi; kim shym la pdiang ïa ka jingsneng: ka waitlam jong phi hi ka la bam duh ïa ki nongïathuhlypa jong phi, kum u sing u bapynjot.

³¹ A ka pateng bynriew, to khmih phi ïa ka ktien U Trai. Hato nga la long ka ri khlaw ha u Israel? Lane ka ri ka jingdum tliw tliw? Balei u paidlang jong nga u ong, ‘Ngi la lait war; ngin ym wan shuh ha me?’

³² Ka khynraw ka lah ban klet ïa la ki jingdeng, lane ka nongleit-kurim ïa la ka jingriam? Hynrei, u paidlang jong nga u la klet ïa nga kat bym lah ñiew sngi shuh.

³³ “Katno pha pynitynnad ïa la ka lynti khnang ban wad ïa ka jingieit! Namar kata, wat ïa ki kynthei basniew pha la hikai ïa la ki lynti.

³⁴ Ha ki rmiang jaiñ jong pha ruh la shem ïa ka snam ki baduk balui lui: ngam shym la shem ïa ka ha ka jaka kaba pei ba la prat, hynrei, halor kine baroh.

³⁵ Pynban, pha la ong, ‘Nga khuid; da shisha la pynphai noh ïa ka jingbitar jong u na nga.’ Ha khmih, ngan tian bishar ïa pha, naba pha ong, ‘Ngam shym la leh pop.’

³⁶ Balei pha ïaid sakma katta katta kat ban pynkylla ïa la ka lynti? Phan sa lehrain ïa ka Ijipt ruh, kumba pha la lehrain ïa ka Assyria.

³⁷ Na u ruh phan sa mih noh, bad ki kti jong pha halor la ka khlieh: naba U Trai u la kyntait ïa ki jingshaniah jong pha, bad phan ym man bha ha ki.”